講聯泰控股前, 先簡單講一講聯泰母公司聯泰集團, 聯泰集團係一間有好多不同種類業務既企業, 佢有2個仔, 一個係聯泰控股, 主力做成衣相關, 另一個仔係聯泰私營集團, 聯泰私營集團其下有間聯泰企業有限公司, 呢間公司包括左好多不同業務, 有漁業, 地產, 旅遊, 船運等, 另外仲包括Skechers鞋響中國同香港既業務,

聯泰控股, 可能大概知佢係做製衣, 製衣方面主要分休閒服及時裝分部同毛衣分部, 除左造製衣之外, 佢仲有包括手袋, 為客戶完成供應鍊服務, 叫做"D2S" "Design to Store", 物流, 地產等, 而且不斷利用收購或合營業務而壯大自己. 雖然業務唔係集中專注於一樣, 但好處係可以分散風險, 而且陳氏家族一直都係多業務發展, 所以我認為多業務發展不會影響公司太大.

生產地區主要響中國, 菲律賓, 柬埔寨, 越南, 印尼, 印度, 孟加拉等地方, 公司將會加大越南廠既投資. 減少中國方面既成本. 越南方面公司考慮成立合營公司投資一個紡織工業園.

主要客戶分佈響美國, 歐洲, 日本同中國, 客戶包括Adidas, Coach, Dillard's, Esprit, Fast Retailing, Limited Brands, Polo Ralph Lauren, Targus等, 2013年年報話年底成功增加一名名貴手袋客戶, 相信係指佢年報幅相個袋Michael Kors.

休閒服方面, 主力都係Adidas, Uniqlo等客戶, 服裝業呢幾年差不多都是Zara, H&M, Uniqlo稱霸, Fast Retailing旗下除左Uniqlo之外, 仲有幾個品牌, GU, Theory, Comptoir des Cotonniers, Princess tam.tam, J Brand.

手袋業務方面, Coach的下滑, 但有新客戶Michael Kors幫補.

毛衣方面上半年夏天少人買, 下半年應該好D.

D2S業務模式主要係將客戶既設計師派去廠房, 變左可以加快生產, 物流, 令產品更快可以推出市場. 呢個係聯泰其中一個比其他對手有優勢既業務.

另外佢地有一電腦套系統管理原料, 生產進度, 追查單, 監察機械使用, 製成品物流等.

公司2011年搞房地產項目, 由陽光壹佰, 聯泰地產同聯泰控股成立合營公司, 呢個住宅項目係響廣州同清遠既鐵路, 廣清輕軌附近, 廣清輕軌預期2016年完工, 而呢個地產項目預計2015年可以為公司帶黎額外收入.

收購方面, 聯泰同裕元成立左合營公司元泰生產運動及休閒服裝, 原本大家50%, 2012年聯泰收購埋其餘50%成為100%權益, 裕元0551係一間好出名做波鞋既廠. 2012年收購天河針織發展毛衣部, 2013年收購Ocean Sky開發柬埔寨同越南既產能.

總結公司比我印象相當穩健, 一邊營運現有業務, 一邊以收購同合營公司發展.