港股(2)
按此訂閱RSS

交易時段長利咖啡股?

發表時間:2011-03-07 16:34:36

延長交易時段,同事們都早了返工,人人一到午市就打呵欠,食完午飯,飯氣攻心之時就開市,感覺相當難頂!在這時候,唯有一杯咖啡能令暫時提神,頂到收市,魏力想了想,有咩股與咖啡有關?可能有得炒下喎! 

想了1分鐘左右,呀!其士泛亞(508)咪做Pacific Coffee囉!即時望望股價,嘩,原來已經爆升左17%…..炒股想賺錢,真係要轉數夠快,兼有想像力,才可搵到食。但上望睇508年報,發現原來唔多關事!皆因508已於去年6月,向華創(291)賣80%Pacific Coffee股權,賺2.17億元,並已入賬。由於508現只餘20%,所以Pacific Coffee唔再係508附屬公司,只係聯營公司。
 
508主要係做餐飲業務,旗下有Igor’s及新收購的峰景餐廳,Igor’s經營36間店舖、包括10間餐廳、14間餐廳酒吧、7間Wildfire連鎖店及5間小賣亭,主要位於商業區及旅遊景點,但一點也賺不到錢,去年9月底止半年蝕3060萬元,撇除商譽減值3020萬元,即係微蝕40萬元。
 
峰景餐廳則以「Cafe Deco」之商號,從事餐飲務,於香港、澳門及澳洲擁有5間餐廳及一間特許經營餐廳,由於去年底才收購,估計對全年盈利貢獻不大。
 

咁其實508炒咩呢?魏力都好想知……


第一次寫blog

發表時間:2011-03-06 15:58:07

 一直想開blog寫投資,但一來懶惰,二來怕肚裡墨水不夠,寫出來貽笑大方,但想呀想,其實有咩好怕?借寫blog迫自己多閱讀、多思考、多分析,總比閒時上網閒聊睇forum有意義得多,於是今日鼓起勇氣寫了第一篇,日後亦會盡力多update,無論是市場分析、股評、股場八卦趣事都會有此分享!

明日港股就延長交易一小時,魏力亦要早半小時返工,但放工時間不變,變相減薪了。苦了魏力,賺的是誰?自然是港交所(388),以現時平均700億元成交計,每小時就是175億元,加時後就算不按比例增長,打個7折亦有120億元,故雖然港交所近日公布業績後,大行普遍唱淡兼降目標價,但每日成交至少多百幾億,港交所至少也因此多賺15%吧!摩通估今年港股日均成交只有730億元,即是延長交易一小時,成交只會增加30億元,實在離譜得很!