2009-09-03  AD





 

證 監會自從雷曼爆煲後積極亡羊補牢,大搞投資者教育,5月底舉辦嘅第三屆《你我的投資故事比賽》,首次「升呢」,歡迎學生拍片參賽,大會收到100份作品, 其中25%來自15至25歲組別,至架勢係3名IVE應屆畢業同學(陳家豪、邱冠燊、林曉灃),靠一段講述大專生拎政府學生貸款、盲目聽冧巴炒股嘅短片, 鍊贏所有幾經風浪嘅投資心得,喺公開組奪冠,贏得5000蚊獎金。今次比賽邀得部份傳媒機構合辦,評判之一嘅有線電視新聞總監趙應春在場狂讚,話呢齣短片 好專業,尤其係配角聽到消息後,想賺又唔敢去馬嘅思想鬥爭,相當扣人心弦。導演陳家豪堅稱,故事唔係親身經歷,但主角猛嗌「升升升」,同賭徒冇分別,佢希 望可點醒股民切忌有羊群心理,凡事要量力而為。

勉勵勿拎學生貸款炒股

至於剛大學畢業嘅朱喬立,就憑一篇抒情文章贏得學生組冠 軍同3000蚊。佢話,海嘯前同老竇倉卒買入國壽(2628)等股票掛鈎票據,令老竇逾6位數嘅退休金賬面最多蝕過半,呢個教訓咪話唔大,所以未來投資會 做足功課。證監會主席方正話,今屆公開組同學生組三甲作品,將會改編為廣播劇,本月中起喺商台播出。李華華LiWaWa@AppleDaily.com