2014-08-14  NM
 
 

 

俗語都有云:「行不改名,坐不改姓。」更何況係大孖沙,個名咁值錢,好易俾人攞住個朵去招搖撞騙。不過,凡事總有例外,小宗聽聞香港興業(480)副主席兼董事總經理查懋成,中英文名的登記方法有成八款咁多!一臉鬍鬚嘅查懋成好低調,但就有個叻老婆——行政會議成員兼金發局主席查史美倫是也。

講番查生,一個人點可能有咁多個化身?小宗去公司註冊處網頁查找,發現用查生嘅香港身份證號碼,單係中文已有「查懋成」同「查懋誠」兩款,再配合英文名、拼音、縮寫等,就變化出八個不同登記方法,加埋有成一百一十二間公司。其中兩個寫法疑似係手民之誤,將英名姓氏「CHA」,寫錯為「CHAN」及「CUA」。

睇番上市公司香港興業的網頁及年報,都是寫「查懋成」,之但係,在開曼群島註冊的香港興業,香港授權代表人卻寫為「查懋誠」,就連港交所股權披露中,亦只得「查懋誠」,而沒有「查懋成」。

小宗睇到頭都大,索性搵個律師朋友問嚇。佢話有啲人身份證會有兩個中文名,呢啲「別名」、「又名」會加括號;其實要核對一個人嘅身份,除咗中英文名,仲要對證件冧巴、簽名等。小宗最關心仲係查生要行使股權時,究竟用「成」定「誠」,港交所使唔使核實嚇查生的身份呢又?

中環寸嘴A貨黃油蟹齋食蟹膏

成日俾人話有我咁有錢,又無我咁得閒。有時真係得閒到,揸住架遊艇唔知去邊好。星期日,我就直搗南丫島索罟灣天虹海鮮酒家食海鮮。天虹有間貴賓房,最低消費幾皮嘢,私隱度高,班伙記拍心口話會幫你擋記者,帶幾多條僆模開飯都無人影到。不過,嚟得離島食海鮮,梗係坐海邊嘆海風。

訂位時,留咗煲海鮮湯。海鮮係老闆新鮮喺海度撈返嚟,有啲乜海鮮,除咗睇收穫,都要睇你face!嚟得呢度食海鮮,唔識叫一定俾人劏。炒蟶子、蒸扇貝呢啲普通菜式就唔啱我。反而呢度有味龍井茶葉雞,必食!食完個口有陣陣茶香不散。海鮮我只叫兩樣,第一係海魚,講明係海呀,咪俾養魚我;第二係奄仔蟹。喺出麵食蟹,黃油蟹嘅價錢,奄仔蟹嘅質素;今日俾我食到黃油蟹嘅質素、奄仔蟹價錢,每隻只需$168。唔好話我寸,有時嫌拆肉煩,我淨係啜啖蟹膏。

海鮮唔飽肚,行過隔籬兩間鋪飲埋杯奶茶,嘆份西多。(唔記得鋪名,認住水吧前有個三花淡奶陣。)唔夠喉,再駛隻船落香港仔街市買海鮮,返屋企慢慢拆。

楊國佳

工廈大王楊耀松大仔,家族的收租物業,遍佈港九,屬正牌收租公。自認寸得起,謂「有我咁得閒,無我咁有錢;有我咁有錢,又無我咁得閒」,經常流連富豪飯堂品嚐美食,仲喜歡到新開食肆「踢竇」試新菜。

本週鬆一鬆

近排零售市道咁差,莎莎(178)老闆郭氏兩公婆索性鬆一鬆,週日一家人揸隻快艇入南丫島避世,食完海鮮,仲買埋一大袋手信先走人。小宗行埋去同佢哋傾兩句,兩公婆一臉無奈咁話:「星期日想放嚇假,唔想理生意嘢。」辛苦也。

「PLAN B」出現

689表現不濟,政界不時盛傳中央有Plan B,換走689。Plan B未等到,小宗早前竟然見到架掛住「PLAN B」車牌的Benz。即刻上運輸署查嚇車牌登記資料,睇嚇邊個「咁有心」。可惜,答案同政治冇關,不過都有段古。車牌主人叫陳偉強,堂妹係N年前做過小龍女嘅影星陳玉蓮。陳偉強係資深攝影師,開過「為你鍾情」及「天長地久」等婚紗攝影公司,幫過佘詩曼同楊思琦等港姐影相,叫做略有名氣。不過做生意個「朵」就麻麻哋。破過產的陳,○九年聲稱要「東山再起」,搞培訓中心,未成事已俾合作夥伴圍攻,指控佢呃錢。之後搵冼國林夾份開詠春班,搞到冼最後要入稟小額錢債審裁處追教練費。銷聲匿跡咗一排,陳偉強去年用七千元,投咗「PLAN B」車牌自用。車牌登記地址係元朗八鄉一間車房,泊咗好多架舊款勞斯萊斯,職員承認陳是老闆。睇來「PLAN B」似是暗示陳偉強已搵到新財路噃。

澄清

本刊上期發表的「基金之王」文章,內容有關太盟投資集團主席單偉建先生及其公司的資料,經查證與事實不符,特予澄清,並向單偉建先生表示誠摯的歉意。

金牙大狀講嘢水哥數口精

十二年前,攞命.陳德霖仲喺金管局做緊冧巴吐,新地想撬佢過檔。問過價,方知人工要成1,660萬元一年。水哥郭炳湘認為唔值,故此冇撬到。水哥有冇計錯數呢?肯定冇。十二年後,攞命陳坐正,做咗金管局一哥,你估家嚇佢收緊幾多錢人工?996.5萬元。銀碼絕對唔細,但亦不過係十二年前叫價嘅六成而已。水哥之眼光,到你唔服咩?抑或十二年前有人大喉腩,嗌高咗!