2009-10-07 AD






 

上市3個幾月嘅內地運動品牌商361度(1361),09年度(截至6月底止)純利爆升2.5倍,佢哋一上市除咗公佈佳績外,董事酬金亦水漲船高。據噚日公佈嘅年報,董事局09年度嘅總酬金大約係487.8萬銀(人民幣.下同),比上市前加2.5倍。

主席加人工逾兩倍

拆 開嚟睇,作為執行董事兼總裁嘅丁伍號,雖則加咗2.61倍人工至159.6萬元,但加幅唔算最勁,最勁係佢堂細佬、執董兼副總裁丁輝榮,09年度總年薪 127.3萬,大升3.6倍!而丁輝榮親大佬、執董兼主席丁輝煌亦加咗2.23倍至127.3萬。其實三位丁生原本年薪都唔過45萬,今次搖身一變成為百 萬年薪。如果同佢哋同級數嘅特步國際(1368)比較,特步主席丁水波亦喺舊年上市後年薪加咗3.26倍至76.6萬,但都未到百萬水平噃。361度雖然 加執董人工,奇怪嘅係非執董就依然無人工,上市後3名非執董人工依然係「零」。唔知今個年度會唔會畀人工佢地呢?李華華 LiWaWa@AppleDaily.com