2009-10-28  AD





 

有 時口味呢家嘢真係好難掌握,好似意馬國際(585)套動畫電影《阿童木》,華華有睇過,雖然整體質素同上咗神枱嘅Pixar冇得比,但似乎好過佢哋第一套 嘅《忍者龜》,點知勢估唔到,小飛俠喺美國同日本票房都唔係好得。阿童木飛唔起,結果連累意馬股價噚日大跌37%至0.208元收市。

美日票房唔掂

據 美國電影票房網站《Box Office Mojo》統計,喺當地上周五、超過3000家戲院上畫嘅《阿童木》,只係以大約5200萬港元累積票房排第六,輸比一啲無乜卡士嘅恐怖片同劇情片。睇番 日本票房仲慘情,一個禮拜都唔使,就跌出票房十大……美日兩地票房暫時唔係好掂,咁中國內地票房又點呢?同樣喺上周五上畫,3日累積票房就超過4500 萬,都算唔錯o架喇。據國泰君安嘅報告推算,若果《阿童木》美國票房收到3.59億,每股就應該值0.314港元。睇番o依家條數,唔怪之得噚日股價好似 倒水咁啦!股價大跌,意馬公關大員就大派定心丸,話雖然票房暫時唔係咁好,但管理層對套戲仍然充滿信心喎。華華都希望係咁,都唔想睇唔到佢哋下一套《神勇 飛鷹俠》嘅。李華華LiWaWa@AppleDaily.com