2015-01-08  NM

 

近日內銀股升到嘭嘭聲,識睇,一定睇埋呢輪一樣掃內銀掃到手軟、急速冒起嘅安邦保險。安邦保險近月成為民生銀行、招商銀行大股東,又持有工商銀行A股,佢仲喺海外收購有百年歷史嘅老牌酒店Waldorf Astoria。(Waldorf 除咗係美國駐聯合國大使官邸,亦係好多總統首相下榻嘅酒店,唔嘢小也!)跟手又收購老牌比利時保險公司同銀行。計吓數,舊年一年已使咗逾六百億!呢間公司○二年註冊資本五億,而家急增至六百一十九億,總資產達七千億元,真係好疊水。

咁啲錢點嚟o架?睇揸弗人咩料囉,市場一直傳由鄧小平外孫女婿吳小暉牽頭,開國元帥陳毅個仔陳小魯、朱鎔基個仔朱雲來、首創集團董事長劉曉光等等有份,即係紅二代。

再睇睇安邦嘅P & L,佢哋保險收入來源十二億五千萬,當中99.3%都係「分紅業務」,其他如壽險、意外險同健康保險,總共只佔0.7%。呢啲分紅業務就即係理財產品,安邦會搵大量內銀代銷。即係賺到錢,又走去投資內銀股。內銀升價,資本又可以借俾安邦發展,實行塘水滾塘魚。

講吓講吓,令人諗起當年雷曼兄弟同影子銀行,小宗真係怕怕。 早於○八年,大陸銀監會及保監會已規定,保險機構參與控股銀行數量不得超過兩間,但安邦竟可以成為三間銀行股東。何止有阿爺祝福,係阿爺有份呀,今年仲排隊來港上市,其他民企恨都恨唔到!

踢竇白沙灣隱密談情竇

踢咗竇咁耐,無理由唔踢啲談情私竇。位於西貢三星灣的白沙灣遊艇會,夠晒隱蔽,連李澤楷同緋聞女友撐枱腳,都係揀呢度。呢個會英文名叫Hebe Haven,Hebe喺希臘神話中象徵青春女神,簡直切合埋主題啦!遊艇會歷史有四、五十年,聽落遊艇會好似富豪級玩意,但實則入會資格相當大眾化,個人會籍只需六皮,公司會籍亦只係十二萬,遊艇會之中絕對係平民價。而個會睇準後生仔鍾意玩水上運動,為咗年輕化,小宗問過,二十六至三十歲組別會籍半價,只需三皮,二十一至二十五歲組別半價再半價,只要一萬五千。再後生啲,十八至二十一歲嘅,六千蚊搞掂!筍就筍,不過waiting list兩年咁耐。遊艇會中嘅餐廳,午市揀set lunch就最抵,價錢由七十八蚊到一百四十八蚊。以咁嘅價錢,包前菜(沙律/湯)主菜同飲品,算抵食。餐廳保留殖民地時期留落嘅傳統英式裝潢,個bar仲有個大鐘,last call / last order時侍應會敲一下鐘向饗客示意,好british!不過唔知係咪日久失修,部分地板出現少少凹陷。今次試個西檸雞飯,西檸雞好厚炸漿,咬落漿住口;牛扒套餐件牛扒亦只不過不失,不過來談情嘅,食咩都咁好味。呢度會員大半係金髮碧眼嘅外國人,配合四面靚景有山有海,藍天白雲,仲以為去咗南法海岸添! 難怪小小超唔怕偷影,成日來偷……呀唔係,係談情。爽喎!

胡應湘伯爺點發跡

上輪灣仔跌錢事件,執到錢嘅一班街坊就好似發咗場春秋大夢,還嘅還、匿嘅匿。最搞笑係有人將錢放喺屋企床下底,以為最危險嘅地方最安全,點知人贓並獲! 呢件事令小宗諗番起段舊聞。嗱!而家大地產商胡應湘,係人都知佢伯爺胡忠揸的士起家,後來儲落多部的士成為「的士大王」。傳聞有日佢揸的士,有個客大懵,留低咗大堆花旗紙(美金)喺佢處。個客後來當然報警,但警察摷到去胡忠屋企,搵埋床下底,咩都搵唔到!結果事情不了了之。過咗一段時間,胡忠就有錢大力投資,成就咗之後嘅故事。早年傳到街知巷聞時,胡應湘曾走出來代父否認澄清。其實講真,如果有筆橫財都無智慧用來投資,反而攞去過大海,咪一樣一場空,你話係咪?

劏房波嫁女貫徹新亞精神

劏房波做外父,聖誕後三日於四季擺嫁女酒。不惜紆尊降貴,親自打電話俾新亞校友,請佢哋撥冗光臨,以增榮寵,更加拍晒心口,一定準時八點開席,絕無花假。結果?咪一樣搞到九點幾都未起到筷。 非但餓親班校友,連689亦一樣領嘢。所以話呢,啲人慣咗手勢,一次冇句真,就永世都冇句真;即使嫁女請飲亦唔例外,話之你係神明子孫又點啫。莫非劏房波要藉呢餐嫁女酒等班校友毋忘「餓我體膚勞我精」嘅新亞精神 ?

金牙大狀講嘢法國大餐競委會

班人以惠康、百佳、華潤瓜分超市天下,指證香港有寡頭壟斷,由是成立由胡紅玉擔大旗之競爭委員會以保障消費者利益。點知委員會尚未嚟得切運作,成個市場已經俾林偉駿之759阿信屋翻轉。寡頭壟斷云乎哉?俗語有云,冇鬼唔死得人。同樣,冇政府干預唔會有壟斷。林老闆喺四年間開咗超過兩百間鋪,引發優品360等爭相效顰。零食以至超市有否壟斷,睇怕都唔使多講矣。點解佢哋可以輕易入市?政府冇架起門檻阻止佢哋入市囉。本來無一物,何處惹塵埃?個市本來充分競爭,班人則以促進競爭為名搞干預。結果會係乜?胡主席為咗證明其存在價值,你估佢會任得市場自己搞掂,抑或諸多干預呢?