來源: http://hkcitizensmedia.com/2015/01/13/%E8%B2%A1%E6%8A%80%E6%8E%8C%E9%96%80%E4%BA%BA/

大家近期或者會覺得老狐貍少左寫文,或者會有人估係咪老狐貍早前估油價見底輸到收左皮,定係因為估佳兆業唔會摺怕俾人趙所以唔敢寫,老狐貍係縱橫股海咁多年,有咩未見過會唔見得人呢?無錯油價老狐貍早前估係$50美元一桶應該差不多,但卻被插穿,但如果大家有跟開我個FANPAGE就知,老狐貍買的三隻石油相關股,當中昆侖能源上升了約10%,華油能源升了13%,只有巨濤較買入價下跌了約7%,以小弟平均出註的方法,大家應該知我輸定贏。

至於隻佳兆業,小弟由寫文的一刻已該停了牌,沒有累人輸錢,應該唔會俾人掟汽油彈既,只係老狐貍覺得堂堂一間去年深圳銷售第一的房企,居然受政治事件接近崩潰,甚至有百幾億現金存款都唔拎去還,諗住攬炒,可知中國政治風險之高。

(按: 政治風險係最難預測的,因為政治永遠都係屎咁臭)

咁點解老狐貍會少左文呢?

主要係工作太忙,同好多作者不同,老狐貍真真正正係活在證券市場(只係唔需要再跟客),近期project 纏身,而且開始要準備做appraisal,所以日日8點未到做到深夜,完全心力交瘁,回家乜都舉唔起,更加唔好話拎起對手寫文,實在對不起各位的愛戴,加上天氣寒冷,狐貍係要冬眠既動物,所以就算炒左day-trade,都無力放上fanpage給大家參考參考。

本來老狐貍見到呢幾日財經界的最大財技新聞,都好想寫番篇文,但係老人家手腳慢,好多點都俾人寫左,大家睇下d同業既都差不多了,或者你會問老狐貍有無贏呢隻股?老狐貍只會同你講我印象中自出道以來自己都好似無買過呢兩隻野,點解? 老狐貍只有分享一句我以前大佬的一句名言:「佢咁x有錢都係因為你買佢d野。」,老狐貍呢句說話深深的印記在狐貍心內,到我稍為懂事就明白了,你係永遠贏不到呢d財技高手既,除非你死死持有唔放咯,人家係咪意就釋放千幾億內在價值了,其他的所謂財技派可以收皮了,老狐貍的皮當然唔想輸俾佢啦,right?
老狐貍其實好佩服呢個家族,如果有家有睇開的股票史,由成功轉型地產,如何買入和記黃埔、港燈,到科網潮的TOM.COM,近年發展長江基建,無一不是好好的財技教材。

好地地點解要又分又合又改註冊地?

其實好簡單,又分又合主要係因為釋放價值,自己贏曬,同時跑番贏馬先生做其首富,更改註冊地更加簡單,作為一個咁大既集團,點都要顧及下政治風險,你睇下佳兆業一個浪就俾人打到醫番都浪費藥費,比老狐貍更老江湖的家族點會唔知呢?至於第日買邊隻?老狐貍始終唔夠佢玩,都係買其他。

自老狐貍FANPAGE開立之後,好多朋友都係個度私訊問我問題,老狐貍答到你的都會盡量答,但係一來老狐貍唔係隻隻都有睇到,二來真的時間唔係好夠駛,所以有時做唔到唔好怪。

近期老狐貍開始留意D體育用品股,老狐貍覺得2014年佢地用左好多時間去蕪存菁的減存貨,關店和在低BASE下或會出現反彈,二來國內有數字指體育產業在2025年或會達5萬億元,中國或會成功建立自己的國際品牌,故此呢系股票大家都可以考慮下,有邊幾隻?大家做下RESEARCH好D喎。

最後,好多謝全民媒體的另一位作者渾水的稱讚,令老狐貍感到有點光榮,渾水小子年紀輕輕,但卻有量度,文章亦有字字有POINT,相信假以時日必成大器,到時請照顧一下老狐貍。

如大家有興趣,歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍