2009-11-26  AD





 

本港由家族打理嘅銀行買少見少,只剩下李氏家族東亞銀行(023)、馮氏家族永亨銀行(302)、廖氏家族創興銀行(1111)、王氏家族大新銀行(2356)等,大部份家族銀行掌舵人雖年事已高,位位已過花甲之年,奈何物色接班人並非易事。

廖烈文退任榮譽主席

創 興銀行同埋廖創興企業(194)兩間家族企業,噚日就公佈換接班人,主席廖烈文由於年紀及身體原因而退下火線,改由細佬廖烈武接任,佢只係細廖烈文8歲, 現年都七十有一,唔算係後浪接棒。廖烈文同時辭去董事職務,只留番榮譽主席嘅「虛銜」。根據創興08年年報顯示,廖烈文已年屆79歲高齡,早應退休享福, 估唔到接班人一樣高齡,看破紅塵接近四分三世紀,諗落都何其悲凉。

綜觀本港家族銀行,最終下場只有兩個:其一係積極培養下一代做接班人,不過由於培養需時,好似暫時未有完全成功嘅案例;其二係賣盤,伍氏家族就趕及金融海嘯爆發前,成功以高價出售永隆銀行畀招行(3968),成為一時佳話。

李華華

LiWaWa@AppleDaily.com