2015-03-05  NM
 
 

 

亞視賣盤講咗成個月都未有新進展,傳聞萬達商業老闆王健林夥拍香港資源(2882)主席黃英豪、遠東發展主席邱達昌,同埋匯友資本(8088)主席胡景邵都入咗標,但一直無回音。有做開融資嘅老友爆料話,王征嫌呢三條友出價五億元,計唔掂數,「王征之前要還錢俾查家,向救過HMV嘅私募基金匯友資本借咗三億;黃炳均幫王征揸住一成嘅股份係由王征做擔保,如果亞視執笠王征要賠一億俾黃炳均;再加埋欠蔡衍明四千萬,同員工出糧嗰五千萬,計埋都要五億啦!」他又話,王征天真相信廠房值十億,寧願清盤賣廠再扣埋欠債,都拎得番五億,所以點都唔肯賤賣亞視,「問題係個廠房咁殘舊,點會值十億呀?仲要喺工業區,無得改變用途,邊個同你買?」

老友仲爆,三個入標者都係被阿爺逼o架咋,「邱達昌講明唔想玩,佢連邊個幫佢營運都未諗到呀!」黃英豪就諗定搵曾志偉幫手,但原來馬時亨都有幫手打電話,向人推介佢表弟,不過係人都知志偉係娛樂人唔係做生意啦!今次阿爺都幫到盡,王征仲要扭pat pat,真係唔怕得罪人o架喎!

中環爆笑

週日晨早,小宗支「四季針」來電謂「胡文新喺四季酒店結婚」,嘩,咁「筍」嘅鑽石王老五肯結婚,肯定震撼中環;遂致電向公關先道賀再求證;原來胡公子當日做戥穿石而已。似乎好多人都關心佢嘅人生大事。

蘇浙滬廳房多

新正頭金融老友搵小宗聚頭午飯,約去中環萬年大廈入面嘅上海幫鐵竇——蘇浙滬同鄉會,擺到明唔使爭找數,事關呢個竇只接待會員,堅嗰隻要會員親自簽單找數,現金同信用卡都唔收o架。想入會都要會員推薦,入會費五萬銀;呢個竇勝在廳房都多過寧波同鄉會或上海總會;早兩年又重新裝修過,唔少愛國團體都喜歡在此搞飯局,抵佢招積嘅。 至於菜式,任總同陳四萬都愛嘅熏蛋仍保持水準;但一道煙熏河鰻魚更有驚喜,肥美又juicy、濃郁嘅煙熏味隨鰻魚肉飄出,想食?要預早訂喎。一餐business lunch有房坐,有侍應招呼,每人唔使兩嚿水,喺中環算係抵食。創辦同鄉會的一班蘇、浙、滬鄉里唔少都騎鶴西去,仍有董伯伯做榮譽贊助人,佢哋都幾貼心o架,除咗以食來聯誼,喺北角仲開咗蘇浙滬醫療中心和屯門安老院,想幫襯睇醫生,做吓體檢,唔使入會o架,不過有得揀,梗係食住上海菜來聯誼過癮啲啦。

中文大學嘅英文

今年九月,香港中文大學會喺深圳開辦「金融工程碩士課程」,講明以英文授課、對學生英文水平有基本要求。但睇其相關嘅廣告,則令人對課程之英文水平,不無疑慮。今年九月係半年後嘅事,又何來newly launch呢? 若是新近推出,此又豈非newly launched乎?在深圳校園舉辦,理應唔係騎在校園之上,此又何on之有哉? 唔知道中大榮譽產品、中大校董、民建聯之立法會搓胸議員陳克勤可否對其母校呢個廣告評說一二。不過,搓胸議員原產漢華中學,未必夠火候睇得出乜;但中大護法香大俠就肯定可以贈番兩句。唔該吖!

本週愛之深

集財務公司兼演藝界老闆於一身嘅冼國林,無緋聞是個奇跡。不過上星期五,小宗竟然撞到佢同個靚女喺信德中心行街街,但就好鬼勞氣,唔知嘈緊咩。小宗梗係打個電話問吓求證啦,原來靚女係佢新簽藝人,「佢叫Rachel(周嘉莉),之前喺亞視做六合彩,而家做埋我行政助理,咪要跟出跟入囉!」佢仲話放個靚女喺身邊,係老婆嘅意思,等佢有得睇無得食,果然高招。 不過做乜咁勞氣先?「佢蠢囉!唔識答記者問題,有記者打嚟問,亞視無錢唔出糧,但有錢派利是俾記者,員工就無份,有冇問題。佢淨係答自己唔喺現場,你應該話如果亞視淨係派利是俾記者梗係有問題啦!員工見到都唔舒服啦係咪先!」雖然師傅口講勞氣,但最後都補番句:「其實佢都好有潛質嘅。」但小宗聽得出佢好錫呢個徒弟,正所謂愛之深,責之切呀嘛!

金牙大狀講嘢