2015-09-10  NM

阿里巴巴主席同副主席蔡榮信為要成立family office(家族辦公室),要「舉」咗名下股票融資廿億美金,family office呢家嘢漸為唐人受落,賭王三太早於四年前,即係「分燊家」後,就成立咗UNIR Group安利集團,唔使好似馬雲咁要「籌旗」o架。

三太把過去賭王「醒」佢遍布中港澳及海外嘅物業、賭場、直升機、金銀珠寶一籮籮生意隊晒入去,公司家族色彩極濃,就係以陳婉珍博士為首。UNIR係葡文, 意謂團結,代表三太希望家族上下團結齊心,管理如此豐厚資產,三太都好識用人,UNIR行政總裁就係唐家榮(Carl Tong),會計佬嘅佢花旗出身,侍候過林建岳,八十年代仲做過半山區議員同埋立法會議員,有番啲政治「智慧」,689參選特首當年,Carl唐捐咗一球 俾佢o架,成為689「金主」。馬雲構思嘅family office都唔輸蝕,由Blue Pool合夥人Alexander West打骰,呢位老外唔簡單,佢團隊九十年代打理過瑞典Wallengberg家族辦公室。呢個家族控制瑞典巨企如Saab汽車製造、電器 Electrolux、Ericsson;搵得咁嘅團隊,馬雲嗰碗茶飯又豈會奀豬豬呢?

金融逍遙客:鄧小平有巨人氣場

游走於中港台併購、私募投資的金融多棲動物,現為多間上市公司主要股東及董事與一班夾埋袋住幾百億美金嘅私募基金大佬吹水,席間有位年輕投行賓架問道,決 定投資一個項目與否,到底最重要是看什麼呢?大家一致答案:人。逍遙客完全認同,項目五花八門,創意亦日新月異,但怎樣去落實執行卻全靠人。大家加埋投資 經驗過百年,投過千個項目,總結血淚史,得出一個真理:一個好項目,落在一個不好的人身上會搞彎;而一個貌似不好的項目,落在一個有能力的人身上,卻很有 可能將項目變好。但如何去判斷人,是一個終生課題,更是一門藝術,學校冇得教,教授也唔知點教,全要靠慧根。雖然發掘一個有潛質嘅人好難,但若用排除法先 過濾出庸人,卻相對容易。成功嘅人都有一種「氣場」,哈佛教授傅高義在《鄧小平時代》一書中,形容鄧雖矮小,但在任何場合都散發着巨人的氣場。有時對住電 視新聞,看看現在受政府重用的一些人士,立即有舉一反三的感覺。嗰位行政會議成員張志剛,擘大眼都只剩一條線闊,若謂眼鏡是靈魂之窗,我哋連接觸佢靈魂的 機會都冇!副門牙似撑大咗嘅龍門,論賣相講佢真係唔啱,但佢講話也是扭橫折曲,成個村幹部咁款。無意發現那位樹根兄竟然是港大校董,就似一班美心熟客衝入 半島吉地士歎一盅二件般,格格不入!最有型有款叫張震遠,但又睇得唔打得。特首馬房人才之凋零,已到可怕程度。喺投資角度,這個政府點叫人投得落手?

中環寸嘴:阿純,唔好學大陸作風,有裝修冇維修!

工廈大王楊耀松長子,是各大有名食肆之VIP,喜歡研究城中有錢佬對食之要求,透過美酒佳餚,察看人生百態,讓讀者「嗒」落有味。星光大道單嘢,純官出嚟 講話:「好心做壞事。」咁即係默認係壞事啦!大家都係順德鄉里唔怕講喇,創業難,守業更難,嗰條「壞鬼」星光大道又殘又舊,俾CNN評為最劣景點,真係 disgrace to Hong Kong,奉勸純官唔好學大陸作風:有裝修冇維修。既然星光大道管咗九年都蝕錢,點解仲要擸埋尖東嗰邊海濱嚟管啫,嗰邊可以俾尖東業主會(包括呂志和、黃 志祥等人)佢哋管吖?如果嫌班友係隔夜油炸鬼冇魄力去搞,咪攞出嚟招標,你又點知冇人投啫!好過益新世界當做臨時貨倉地。唉,其實我喺新世界中心都留低唔 少腳毛o架,七十年代尾,讀緊大學,放暑假返香港,朝早去會所打完網球,搵地方hea就去新世界酒店入面間桑拿,幾好環境o架,仲唔識死跳入個大浴池,揼 骨又唔使搭房,嗰陣富麗華酒店按摩房要搭房,撞到世伯就冇癮啦,噴一句埋嚟:「哈,你仲識歎過我!」新世界桑拿嗰度任點任食,啲水果、點心係由新世界酒店 送過來,中午hea到下晝,唔係peak hour,冇乜人幾爽o架。嗱,好似做新世界桑拿咁,純官識得全情投入參與,咪做得有聲有色囉。唔好攞個海濱嚟搞,幫自己教仔先得o架!

超人李愛欖仁

唔知乜嘢挑起《華爾街日報》條筋,忽然大讚超人李眼光獨到,叻到甩辮,一早由大陸撤資。譬如喺○八年高位出售上海商廈、一二年後再冇喺大陸投地、今年又整 合長實、和黃,將資金投向歐洲等等。呢啲通通係舊聞矣,較有新意者,係篇報導提到超人李喜歡喺長江中心頂樓以pilinut待客?乜嚟o架?咪即係欖仁 囉。網上資料話欖仁含大量鎂質,除咗提供蛋白質能量,更有助加強肌肉骨骼、提升免疫能力、促進頭腦及神經系統運作、平衡荷爾蒙、改善皮膚等等,其好處真係 十日十夜講不完。慢吓手仲勁過仙丹。超人李攞嚟待客,錯得去邊呢,請問?

插圖:朱桂葉centralman@nextmedia.com