2010-10-11  AD




 

新鴻基郭氏兄弟 有分家之說,當事人否認之。細看新鴻基地產發出之新聞稿,三兄弟所得權益有細微分別,就係「郭炳湘的家人」,「郭炳江及其家人」,「郭炳聯及其家人」,照 字面睇,郭炳湘本人冇份喎,但大郭發表回應又話他的權益與其他人「應」無分別。好一個「應」字,係主觀意願吖,還是實情的側面?

無論內情如 何,都唔關其他人事,但以一個千幾億元市值嘅上市公司嚟講,最大股東郭氏家族處理上一代遺留落嚟嘅股份,有少少兄弟糾纏不清之處,確令人嘆息。香港家族一 啲財產分配問題,往往導致兄弟產生不同意見,例如鏞記,例如福臨門,或者不止香港如此,最近南韓現代集團也有弟與孤嫂之爭,前年印度大集團 Reliance有兄弟之爭,台灣王永慶死後,各房兄弟姊妹亦係上法庭。

家族事業是否可以一直不分家,繼續旺盛?外國例子唔係冇,不過少 啲。美國杜瓊斯《華爾街日報》本是家族企業,享譽甚隆,卒之俾梅鐸嘅新聞集團買咗,但梅鐸不在之後,佢嘅子孫又如何營運「新聞集團」,保持威勢?仍是一個 謎。福特汽車去到第三代,就由家族外人士接管,洛克菲勒家族本是大通銀行大股東,而今在銀行已無多大影響力,JP摩根大通銀行只是一個名字,何來JP摩根 後人在銀行內話事。

前一輪與投資銀行家Y在銀行家會所(Bankers Club)請mentee吃午飯,mentee原來係靚女,已經畢業,在國金二期返工,賓架Y為免俾人見到(在銀行家會所請吃飯,就係要俾人見到啦!)有 所誤會,所以特登搵埋左丁山作陪。呢位港大生又係幾醒目嘅,由沙田去藍田去港大,而今在國金二期落腳,又係一個衝出平民區嘅好例子。與賓架Y講起,英國有 三百年歷史啲商人銀行,逐一消失,不再是IPO、併購、證券市場嘅重要參與者,有何原因?賓架Y話:「甚麼英國皇室財務顧問,拿破崙嘅銀行家,已一一俾美 資投資銀行或英國商業銀行吞併晒,大家只知高盛、大摩等等,邊度仲會記得昔日倫敦城之商人銀行吖。一個大分別就係,家族企業維持到一段時間就有錢財 (capital)與人才嘅問題,前者係因為子孫繁衍,大家長期食息,不願供股,後者係因為家族後人未必個個咁叻或有志趣為家族做事,此乃自然之事,非任 何人所能解決。」