來源: http://hkcitizensmedia.com/2016/08/30/%e5%8c%af%e6%8e%a7%e7%9c%9f%e6%ad%a3%e7%89%99%e7%85%99%e5%96%ba%e9%82%8a%e5%ba%a6/

獅子銀行前高層David Hall,退休咗六年,但似乎念念不忘將匯控香港(實際上係香港、新加坡、大馬、澳洲等地業務)spin-off嘅念,話匯控喺香港光輝不再,係時候考慮賣俾中資銀行。

獅子銀行其實大家都知佢係有一定風險,但唔係因為David Hall講,間行喺香港光輝不再,亦唔係坊間講,美國係咁罰匯控洗黑錢罪名罰到窮,而係匯控手上啲衍生工具太多,風險高到嚇死人。

其實今年六月IMF出過報告,指出世界三大銀行系統淨風險製造者(net risk contributor),呢三間銀行就係德意誌銀行、獅子銀行同瑞信,而獅子銀行係排世界第二。如果呢三間銀行是但一間因衍生工具暴露風險太多執笠,真係全世界嘅人都身痕,因為呢場風暴隨時勁過次按危機。如果依家俾中資接咗火棒,咁英國同歐洲可以甩身,至少有子彈應付德意誌銀行搞出嚟嘅大頭佛。

David Hall建議中資行接棒係有啲道理,因為根據IMF嘅報告,中資三大行(中銀、工銀同建銀)同日本幾間大商業銀行集團啲風險,確係卸曬落德意誌銀行同獅子銀行度。問題係中資三大行自己都一大堆潛在風險要處理,只不過佢地盤數唔清唔楚,David Hall唔知啫。至於日本仔啲銀行其實都泥菩薩過江,同埋日本政府都唔想好辛苦咁解決資產問題嘅日本大型私有銀行,接獅子銀行嘅火棒。

如果我係獅子銀行董事局,寧願請日本仔策略性入股匯控,同埋諗計賣咗恆生銀行換一筆錢應付未來危機好過。你叫自身難保嘅中國政府同中資大行買匯控,無錯喺政治上好吸引,但喺盤數上,呢個賭註實在太大,中環客相信習近平孭唔起咁大隻鑊。

中環客