http://partipral-hk.blogspot.com/2011/01/vs-vs.html

初買入大快活既原因係睇中佢中國業務既發展潛力同埋貪佢夠平, 但響牛市入面搵到平既股票唔易, 為左了解究竟佢係真係咁平抑或純粹係陷阱裝俾我踩, 今次將佢同其他兩間同業比較下. 快餐店要做得成功最重要在於標準化, 夠標準就能夠無限複製, 只要你有錢就得, 所以呢3間都符合呢個特點, 刻意唔加埋稻香係因為佢唔係快餐.




















味千6.7億固定資產可做20億生意而生5.4億現金流, 折舊率15%左右合理, 存貨控制能力亦強. 固定資產係07年既兩倍而營業額同現金流都有同步增長. 現金數目比起07年無大變化而且一直近0負債, 即係投資落固定資產既資金完全來自保留盈利而且投資非常有效, 公司處大力發展時期.

大家樂14億固定資產可做49億生意而生8億現金流, 折舊率13%左右合理, 存貨控制能力亦強. 固定資產比07年多23%而營業額同現金流亦有同步增長. 現金數目比起07年亦同步增加3成, 一直處於0負債, 即係投資落固定資產既資金完全來自保留盈利而且投資有效, 但發展步伐較慢, 可能同管理層作風保守或市場逐漸飽和有關.

大快活4億固定資產可做16億生意而生2億現金流, 折舊率15%左右合理, 存貨控制能力亦強但營運效率明顯較前兩者低, 固定資產比07年多3成同時營業額只增長9%, 現金流只增長2成. 現金數目比起07年增加3成而一直近0負債, 即係投資落固定資產既資金完全來自保留盈利但投資成效果未算明顯, 因此發展步伐緩慢.

流動比率來講味千最好而大快活最差, 已繳稅項顯示味千07同08年盈利接近而07年比06年增長一倍; 大家樂三年盈利穩步上揚; 大快活07同08年盈利接近而09年盈利倒退近6成, 反映大快活營運穩定性明顯不及前兩者.

本質上既比較就到此為止. 估值上味千市值162.5億對應6.7億固定資 + 17億現金, 比率6.8倍; 大家樂市值113億對應13.7億固定資產 + 9.7億現金, 比率4.8倍; 大快活市值13.8億對應4億固定資產 + 2.1億現金, 比率2.3倍. 味千最高估值正正反映緊佢既成長速度同質素; 大家樂雖然規模最大但因為增長力不及味千所以估值低3成; 而大快活無論營運效率以及增長力皆不及前兩者所以估值只及味千既3份1.

至於點為之平, 點為之貴, 選擇以高溢價去換高增長, 抑或以低溢價去換低增長, 就因人而異了.