http://blogcity.me/blog/reply_blog_express.asp?f=5YTPBH5B812303&id=284977&catID=&keyword=&searchtype=

    美股再上,GE業績強勁增長推動工業板塊普遍走高,推動美股造好,杜指上周五收高49點至11872點。以全周計,杜指升0.7%,係連續第八個星期上升,標普500指數及納指回軟,上周下跌0.8%2.4%。杜指期貨最新報11809點,較現貨低水63點。

 

港股美國預託證券靠穩,ADR港比指數收報23863點,比香港收市低13點。匯控收86.53元,比香港高0.2%,中移動收77.52元,比香港高7仙。

 

綜合性工業巨頭通用電氣(General Electric) 周四收市後公布業績,因大型設備與服務訂單飆升,上季盈利跳升51%,超出市場平均預期。Conifer Group的分析師Dick Del Bello指出,「由於GE的業務覆蓋面之廣,並且其下屬所有部門的業績都有所改善,因此該公司的季度業績具有標誌性意義。」GE股價更升逾7%。受GE業績推動,工業板塊帶領大市向上。金融與電訊板塊亦同樣走高。

 

杜瓊斯金融指數上升0.8%,除美銀以外,包括地區性銀行的大小金融股普遍造好。摩根大通及美國運通漲逾1%,地區性銀行SunTrust Banks季度業績超出預期,收高近6%。美銀因住房貸款及保險業務方面相關的商譽減值了20億美元,上季虧損12億美元,遠差過市場預期,股價挫2%,係表現最差的杜指成份股。

 

上周五全球股市兩極化,亞洲股市主要因為憂慮中國可能會進一步收緊貨幣政策,幾近全線向下。而歐洲股市則受德國IFO商業景氣指數連續第八個月上漲,創歷史新高的推動,全線造好。泛歐道瓊斯Stoxx 600指數上漲了0.7%,德國及英國升0.5%,法國、班牙及意大利齊漲逾1%

 

歐元大幅造好,兌美元由1.347跳升上1.362美元,最新報1.36美元。美匯指數回軟至78水平,最新報78.36。原油及黃金繼續偏軟,今個月分別下跌2.5%5.7%。原油最新報每桶89.27美元,黃金每安士1344美元。

 

    網友chuchu問起月供,話「我只是每隻股每月供$2000 , 如市高時就把平均價拉高許多了, 是否應市旺時把他們賣出, 待市況淡時再供呢??

 

    我就話選得月供這個「笨方法」,基本上就要跟笨方法的方式行事,唔好太多意見。月供的壞處好多,例如平又買貴又買,市旺時繼續買股會買貴好多; 又例如每月供款額固定,唔可以在便宜時多買等等。但既然選得月供,佢一定有好處,第一是固定供款,強逼儲蓄,唔會俾你有多餘錢使哂佢。第二是定期供款,唔使散戶去判斷市勢,大市難測,既然專家都係睇中六成,散戶睇中的機會更低,你想選擇便宜時買股,係唔係咁易選到?

 

    Chuchu話好唔好在市旺時把股票賣出。表面睇呢個建議幾好,睇番去年個市,都係升三步回兩步,波浪式上升,如果能夠把握到去高賣低買,回報一定好過死獱一隻股份。但咁樣去估市,其實同月供的基本理念有好大分歧,你睇錯又怎樣?例如你覺得個市由21000點升到24000點都好多,24000點沽貨,等佢跌,怎料事與願違,佢25000點、26000點係咁升上去,你就恨錯難返。如果你定力夠,無眼睇,仲好一鱓,但一般人初時見大市走向和自己估計相反,會唔信。但見愈升愈有,升到28000點氣氛好旺佢開始信,升到29000點就堅信無疑,那時才反手入市,就變成高位接貨的傻仔了。

 

    所以用得月供,就盡量少測市,盡量少出入,以減少自己誤判市況的機會。有時大市真係上上落落,唔出入月供回報好似少好多,但若你月供的前題是尋求合理回報,不是超高回報,賺少鱓無所謂。

 

    若 你要沽出月供的股票,只能是股市升到「好顛」的時候,那時人人皆股,個個話炒股賺錢好易,股市走勢圖差不多直線抽上,一枝枝大陽燭向上,咁或許係沽出月供 股票的時候。但要記住,若在這種好顛的市況沽出月供股票,佢唔大插你都唔好買番,唔好見唔跌心郁郁又在更高位買貨。近年的股市,只有07年的32000點算做顛市,所以沽貨,也都是幾年才沽一次,唔係一年幾次出出入入也。

 

陸羽仁