2017-02-23  NM

誠哥唔敢講自己提名邊個特首候選人,係咪「奶粉」詭譎莫測,但佢嘅「誠粉」就肯定好多。話說大埔慈山寺係誠哥前年用15億元興建,屬漢傳佛教的寺廟。入面有個全球第二高、達76米、以青銅合金鑄造的戶外觀音像,不時有善信去參拜。

今年年初四,誠哥亦著住羽絨,精神奕奕現身自己主場慈山寺,「高高在上」同各位善信拜年︰「各位新年如意,樣樣吉祥!大家好,健康幸福!多謝!」短短幾句祝福,已引來「誠粉」大喊「多謝你」。最後主持祝「大和尚同李生龍馬精神、身體健康」,誠哥雙手合十,準備離開之際,台下的「誠粉」更大叫︰「長命百歲!長命千歲!萬歲萬歲!」唔知仲以為誠哥做咗皇帝,接受民眾的祝福。誠哥仲坐住以金布包邊的工程車,由一樓「下凡」。落地後善信即報以熱烈的掌聲,誠哥都笑笑口︰「歡迎咁多位。」來到慈山寺點只得誠哥祝福,仲有一支啡色樽蓋、印有佛教經文的屈臣氏蒸餾「聖水」,聽講係資深善信先有。慈山寺出名的,仲有設防彈設備的宿舍,三幢宿舍中,有一幢的二樓,有5間房安裝了防彈玻璃,部分牆身內嵌防彈鋼板。據秘書長倪啟瑞話,防彈宿舍係供任何有需要的人士使用,並非為誰專設。但除咗誠皇帝外,其實仲有邊個有需要?

TVB令人遐想

有間神秘公司傳奇集團向TVB提出收購,搞回購又被持14%股權的第二大股東Silchester,質疑係「偽裝零溢價收購要約」,話如果回購失敗,要考慮派每股9.6元特別息。

TVB最大股東,是由主席陳國強、華人文化董事長黎瑞剛、台灣HTC創辦人王雪紅持有的Young Lion。一一年時,王雪紅、陳國強及美資基金Providence Equity Partners(PEP),透過Young Lion向邵逸夫及方逸華收購26%股權。PEP而家仲係Young Lion成員,外界有傳PEP的幕後金主,是江澤民的孫兒江志成。一○年時,江志成正是聯同呢間PEP的成員和聯想(992)前財務長馬雪征等人,成立中國私募股權基金博裕資本(Boyu Capital)。

TVB又染紅,又疑似太子黨背景,講咁多想表達嘅係:回購或派息,將公司啲現金派晒出去,究竟邊個最大得益?自己諗啦!

中環寸嘴:包島「登六」上岸

小弟今年「登六」上岸,實行搞搞新意思,等我啲至親至愛及老友有個驚喜,一於喺遊艇會包個島搞BBQ生日派對。我鍾意太陽落山先至出海,但次次都感嘆:「夕陽無限好,只是近黃昏。」所以要歎埋餘下啲日子,搵啲好嘢食吓,記住呀,男人唔補都好易冇!六十係人生一個關口,正所謂要「過關」嘛,最緊要同中學舊生會啲師兄弟拍埋,都仲「睇得吓」,總算老懷安慰。有個師兄今鋪真係招積,自己一個人揸艘船由深灣駛過嚟參加我party,咁佢就英雄有用武之地搶晒鏡。最搞笑係,有個富豪外孫女同個老外男友,走咗上個島過情人節,唔知係咪開心得滯,樂而忘返,miss咗最後一班駁船返遊艇會,向我求救,嘻,我哋好gentleman嘅,咪一齊坐順風艇囉!

楊國佳工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

邵逸夫侄孫召妓又醉駕

講開TVB鬧劇,不如講埋六叔後人嘅真人騷。佢位侄孫邵在禮,近日在新加坡被控涉嫌醉酒駕駛。事實上他早有前科,97年曾被罰款3000元及吊銷各級駕駛執照兩年,06年時更被判監禁一星期、罰款8000元及吊銷駕駛執照四年。今次第三度犯事,好大機會入返去坐。

六年前,本刊已寫過,新加坡打擊一個賣淫集團時,竟發現邵在禮是星級嫖客。他在新加坡旅館Hotel 81內,付出500蚊新加坡幣,與一名未滿十八歲的雛妓進行性交易,因而被判監禁十二星期。邵在禮Fb仲放過露股罅、舉中指及養蟒蛇的照片,極盡狂野。六叔曾講過自己「風流而不下流」;Well,佢嘅後人似乎演繹錯咗!