2017-05-25  NM

殼王陳國強後生時就揸殼,「登六」之後就迷上揸直升機,同金融市場一樣,皆是風高浪急之刺激玩意;喺挪威墮機大難不死,殼王向家人承諾不再玩命,經此一役在西貢的一個老外世外桃源——清水灣騎術學校可能得以保住。

舊年已傳出殼王打算買入涉及騎術學校之六幅地皮,興建直升機坪,有好友「寸」貴為TVB主席之殼王,問他是否打算揸直升機返工咁「大支嘢」?要買起呢幾塊地都唔容易,事關業權分散,有英國醫生、愛爾蘭商人,卒之殼王應承買入地皮後繼續租番俾騎術學校,等班老外有個小天地騎馬仔,單刁才得以拍板,涉資數千萬元。殼王今次挪威墮機死過翻生,睇嚟起直升機坪呢個鴻圖大計都要hold住先,騎術學校唔使被逼遷。

陸羽茶室憶起Danny仔

得喺陸羽地下飲茶,總有番咁上下級數,有番咁上下級數自然都一把年紀,唔通要撐樓梯上樓飲咩。上週五食晏時段,陸羽董事長冼為堅、陸羽股東之一盧玉樑就同甘草演員程可為撐枱腳;呢日坐正大門口嗰枱唔係以謝德富為首之名醫群,而係陳百強父親陳鵬飛,今年已九十四歲的陳父,坐住輪椅都要到陸羽歎茶,且悉心打扮戴上一頂「巴拿馬」帽,令人憶起Danny仔對衣著也一絲不苟。

中環寸嘴軟庫飯堂廁所夠照

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

既然股神巴菲特要將佢老牌科技股——IBM重新再定位,聰明嘅投資者都要溫故知新,否則哪有勝算?所以我都係徇眾要求講吓「軟庫飯堂」,等冇機會去食嘅人都知道吓。上個月同班紅酒腳飯聚,一坐低,個老友就話:「真係等咗幾年先輪到嚟食!」唓,呢個世界,有錢實有好嘢食嘅!

我睇好多花?仔都唔知,點解叫「軟庫飯堂」?科網股瘋狂之時,日本Softbank老細孫正義瀋胡椒粉咁四出入股公司,吖,佢睇中余錦基間祥華實業,借殼變身科網股,仲改名為軟庫發展,股價由兩毫子升到近十皮。舊年余錦基先將成幢軟庫中心賣俾李錦記,留住後面唐樓做個軟庫飯堂印印腳,讓自己緬懷過去。計我話,軟庫飯堂淨係睇廁所已經值回票價,入面有唔少「金句」,充滿人生價值觀。食完餐飯第二朝,晨早八點半,某大財團C.E.O.沿路坐緊車返工打俾我話:「阿楊,真係等咗幾年先食到呢餐,得償心願,你都得啦!」我就回應:「阿大哥,你身為Bordeaux Wine Club,又係Burgundy Wine Club會員,應該係你帶我去食,幾時輪到我帶你去。」

度身訂造遊艇事業

林建岳兒子林孝賢(Lester Lam)幾年前已有乃父之風,三十歲生日搵十一艘豪華遊艇,殺到去西貢大浪西灣舉行海上party,當然不乏索女洋妞陪伴左右,林孝賢不惜將興趣變成事業,去年麗展(488)及麗新製衣(191)聯手斥資1.13億港元,向意大利Fincantieri購入Camper & Nicholsons International SA [C&N] 49.96%股權,C&N是有百五年歷史的英國公司,專做遊艇買賣、包租及管理業務,對遊艇情有獨鍾的林孝賢今鋪「英雄有用武之地」,其實唔少名牌子遊艇「卜架」都係富二代,話晒由上一代承襲落嚟嘅人脈先有資格買得起艘遊艇,呢啲富豪玩意屋邨仔識條鐵咩。