http://manincentral.blogspot.hk/2013/06/blog-post_6.html
係咁既。尋晚響討論區裡面,讀到一個小故事。女孩子同男朋友拍拖六年,去到談婚論嫁既階段。忽然間,女孩子發覺,男朋友原來響同佢拍拖期間,有叫雞既紀錄,仲係唔只一次添,於是覺得好震撼,好難接受。

我覺得,比較吸引我眼球既,反而係討論區裡面既回應。有唔少朋友,覺得女孩子大驚小怪,男朋友去叫雞,平常不過啦。類似「個個男人都叫雞的。」同埋「呢個世界,邊有唔食魚既貓…」既睇法,都算係主流。

又因為「男人叫雞」係必然會發生既事,所以又有唔少朋友勸呢位女孩子,應該學會隻眼開,隻眼閉。接受呢個根源於男性生理構造既現實,否則只會自己受苦。

其實係咪真係應該諗得咁灰呢?世界總該有點例外吧?

如果有男人同你講,佢真係冇叫過雞喎。你會相信嗎?還是會覺得佢其實只係扮正經扮晒嘢,又或者只係響度呃女仔?

*****

對於女孩子應該要「接受」男朋友同老公,叫雞係好平常既事,唔應該大驚小怪既講法,我多少覺得有點唔妥的。我需知道男女既生理需要係存在住差異,但要求一個女孩子要接受另一半叫雞嘛…唔係唔得,不過我覺得做人其實應該稍為公道一啲。作為男人既如果覺得女朋友/老婆係應該接受自己出外叫雞的話,咁比較公道既做法大概係,假如女仔果一方出去叫鴨搵男妓的話,男既一方同樣都應該明白同接受囉。只係一直以黎,男性接受女性紅杏出牆既尺度,我主觀地覺得並唔係好高。如果響咁既情況之下,男性卻要求女方要單方面接受自己逢場作興,好似有啲唔係好講得通喎。

「叫雞」同「搵鴨」係岩抑或唔岩,合唔合乎道德,我其實冇資格去評論。不過我傾向相信,有啲事選擇做抑或唔做,afterall其實都只係向自己既另一半交代。我認識有對夫婦,係雙方同意各自各出去玩出去嫖妓,而大家係冇hard feeling的。當然,佢地既底線係,唔好惹啲咩病俾對方;與及最終大家要識得「返屋企」。呢個方式,buy唔buy當然係見仁見智,但so far佢地既關係,響我呢個外人睇嚟,其實係蠻OK的。

*****

男人叫雞之後,千方百計隱瞞女朋友同老婆,原因我諗其實好簡單,因為男人心裡面好清楚,即使「理直氣壯」地認為此乃生理構造使然,但其實呢個行為有住「傷害另一半」既成份在內。理直氣壯既背後,其實心裡面係知道唔多妥的。

我覺得比較合理既講法,係個男既響「同你一齊」之後,仲有冇做同樣既事呢?單身寡仔,冇老婆冇女友冇家庭,叫雞最多係金錢損失同唔好彩既話染病上身,唔存在「傷害另一半」既成份在內。但一個人決定結婚、又或者開始一段關係,其實總係需要有點犧牲的。響今時今日,一夫一妻既制度之下,大家要犧牲既,自然係要接受「揀定咗人」之後,會損失左「享受其他異性」既權利。咁樣講可能有啲肉麻,但「犧牲」係兩個人維持關係其中一個必須既element。要有一段長久而穩定既關係,但又拒絕犧牲的話,其實係冇乜可能的。

*****

又講遠少少。查實叫咗雞,有辦法唔俾老婆/女朋友知就得啦。佢地唔知,永遠相信你係果位純品既小羔羊,咁就唔會「傷害」到佢地了。

呢個講法,好難駁的。只不過我相信人都傾向高估自己。男人以為自己夠聰明醒目隱瞞到另一半直到死既一日,但「上得山多終遇虎」既故事,唔知點解總係不斷發生響你我他既身邊。有時唔係你唔夠醒隱瞞得唔好,而係呢個世界有太多「意外」係無法估計。你呃咗你女朋友十年八載,一直佢信到你五體投地,認定你係對佢一條心唔會嫖既乖仔好男人,一次不慎,俾佢發現事實真相,你原來過去咁多年都呃得佢透啦,到時,佢傷得仲重。

當然,正如好多人所講,叫雞總比搞婚外情好一啲,起碼金錢交易唔會上身,識得返屋企證明對老婆仲有感情。不過「欺騙」同「隱瞞」呢兩棍,作為另一半,應該都會幾難啃的。

我都有聽過有朋友講,「叫雞」之所以要隱瞞老婆,係因為唔想傷害佢既感情。同我講呢番話既朋友,事實上到呢一刻為止,隱瞞既工夫都做得好足好密,我亦好相信,佢老婆係一直都唔知,佢有出去搞搞震既習慣。但係假如「隱瞞」係為咗以免彼此感情受傷害的話,但不斷重覆既隱瞞,並且當隱瞞逐漸成為習慣既時候,同樣係破壞彼此感情既毒藥。相比那個「叫雞真相」,毒性可能只不過係稍為「慢」一啲咁解。

可能,已經講得太多了。