2009-04-30 AppleDaily






 

電 盈(008)喺上訴庭聆訊輸咗,私有化玩完,但財技智慧似乎陸續有來,首先大派特別息每股1.3元掏空公司現金,一眾管理層亦有巨額犒賞。8號仔噚日新鮮 出爐嘅年報顯示,董事會酬金開支雖然少咗2984萬,但主要係前副主席蘇澤光唔撈所致;主席李澤楷照舊斗零唔袋。董事總經理AA艾維朗冇收850萬花紅, 但基本薪津就升咗10.8%至1875萬,拉勻全年2016萬,按年少攞24%。

不過最盤滿缽滿嘅執行董事係「賣樓天王」李智康,佢舊年總薪酬3047萬,按年僅跌4.3%,認真和味。

睇 番電盈舊年整體營業額升34.7%至319.5億,但銷售成本卻急增69.4%至178.5億,呢個謎團終於解開,年報話,推售貝沙灣豪宅嘅成本就佔其中 嘅81.82億元,飆升3.03倍。8號仔自身成本亦升14%至96.68億,主要來自硬撼有線電視嘅新建NOW香港台,香港電話公司重組費用亦達 1.71億。

攞3047萬多艾維朗1031萬

講到幾時召開股東周年大會(AGM),電盈並無分開公告,反而靜靜雞喺年報最尾 一頁列出話喺6月26日。唔知嗰日小小超夠唔夠膽現身,但小股東大聯盟召集人梁國強估佢會避席喎。之不過,小小超同AA都冇喺年報交代派息後公司營運能 力,但非執董李國寶就以行動支持,星期一豪擲132.4萬,喺市場以平均價3.31元,增持電盈40萬股至100萬股,咁5月18日除權時,就穩袋130 萬銀股息嘞!李華華[email protected]