http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20131108/18497989

阿里上市好似係嫁唔嫁,唔嫁又想嫁,究竟嫁紐嫁倫還是嫁港,老爺馬雲是否真的想嫁女,還是拿不定主意,或是跳緊草裙舞,睇吓紐倫港三位男家,那一位肯送出更多禮金!
馬雲嫁女嘅禮金唔係講錢,而係講權,個女嫁咗出去之後,唔想守男家家規,而係遵從女家父母兄弟姊妹吩咐。香港港交所貪嫁妝吸引,心郁郁,但太上老爺證監會話舊家風要緊守,一於喝停,港交所總裁李小加見到靚女上門唔娶得,寫網誌警告:「香港或將丟掉整整一代創新型科技公司的上市機遇。」但港交所元老,前主席李業廣就罕有咁對記者講:「國企來港上市時,是完全跟隨香港標準,遵守國際會計標準,信息披露標準,交易所沒有給予豁免。」
李業廣係法律界(胡關李羅律師樓合夥人)、政界(董建華年代行政會議成員)、證券界(前港交所主席)之權威元老,半退休不理政事之後,已好少就公共事務發言,呢次突然開金口,港交所諸公唔會當佢冇到呀嘛?左丁山老早認識李業廣,與佢啲胡關下屬係同輩,最近有機會同佢吃飯,先至知道佢講普通話與上海話極其標準,完全唔似廣東人口音。問佢點解講得咁叻,佢對左丁山講:「其實我係廣東人,戰前在上海出世,奶媽同我講上海話,阿媽同我講廣東話,嚟咗香港讀中小學就講廣東話與英文。」原來如此,唔怪得佢出任公職,主持香港台灣經貿事務交流,有語言之便,如魚得水。
其實今天李業廣已經七十幾歲,人生事業乜都不缺,正是享受清福時光,但佢念念不忘自己年輕時讀英文書院及在英國留學,冇讀過中國歷史,甚覺遺憾,於是這十幾年來,大力推動學習中國文化,與朋友創立一個名為「燦爛的中國文明」網站,已有十年以上歷史,主要服務對象係中學生、老師、教育界人士,以跨學科、跨領域嘅編製模式將中國文化精華輯成18個領域,200個專題、涵蓋文史哲、科學、藝術,歡迎各界使用、採用,不收版權費。至於經費何來,李業廣話:「香港大把有心人,搵人捐錢一啲都唔難。」當然啦,佢係乜嘢人呀,只要佢肯出句聲,城中兩位李生點會唔支持。