2009-06-05  AppleDaily





 

康 文署修訂指引,讓前線員工在欠缺專業知識及適當儀器測試下,自行決定狗頭鍘侍候大樹,新指引令市民震驚。早幾年有本港發展商起樓,遇樹阻胡亂斬樹,都搞到 要罰錢,o依家政府就可以話斬就斬,美其名係提升工作效率,保障市民安全,但係自指引出台後即有20株被認為「危險」嘅大樹慘遭殺戮,連死因都唔使研究。 引用中資機構慣常用語「多做多錯少做少錯」,大家可以預期以康文署斬樹之效率,唔使一年就可以趕盡殺絕市區多數大樹。所謂市區綠化就係千祈唔好種好似榕樹 咁嘅大樹,而係要種弱不禁風嘅樹仔,雖然我哋唔使怕再塌樹,反而要擔心俾太陽曬到中暑。香港地容不下一株大樹,下一代人好難再想像咩叫「榕樹頭講故事」, 而咩係「大樹好遮蔭」,睇怕要離開香港始能感受。將來我哋在街道旁找到嘅,可能只有當局所種、對人毫無殺傷力嘅一棵唐生菜或者菜心。呢次事件,反映出一種 病態官場文化,就係只想為Close File而Close File,勞工處最叻就係叫勞資雙方和解,再唔係就叫僱主就範;最新一宗漁護署誤殺西施犬事件,都反映同一種官場病毒,更甚於H1N1變種,唔通咁樣就叫 做打好份工?

大行一條龍服務

類似的官場病毒無處不在,國家天天宣傳節能減排,卻有暴發者願出5億美金,想買人家視為國寶嘅通 用悍馬品牌,以展示大國崛起。外國人唔肯賣畀你嘅未必係寶,賣得畀你者多數係草,睇TCL當年收購湯姆遜,結果要變成漂流嘅魯賓遜;聯想(992)收購 IBM個人電腦,唔見得可以成功走向國際;中投入股黑石,慘過超人碰到黑氣石。不過區區5個億美金,影響唔到大家日常生活,冇所謂啦。假如有朝一日解剖驗 下架悍馬,原來只係一嚿廢鐵,或者到時擅長翻版嘅同胞,已經成功複製出千千萬萬輛山寨悍馬、悍牛甚至悍豬悍狗,一樣可以在爛路飛馳,咁5億美金嘅代價,又 似乎難以用正常價值觀衡量。近期同一家大行研究部出完唱好報告調高目標價之後,不足一星期已經由另一部門一條龍做埋配股,呢個現象已不只一次,令人不禁再 次質疑,呢一個行業所講嘅所謂Firewall係唔係子虛烏有,最新一宗可能出現嘅個案,唔知會唔會涉及利豐(494)呢?胡孟青