2014-01-23  NM
 
 

 

樣貌同「大嘥鬼」有七分相似嘅環境局局長黃錦星,早排立法會財委會審議擴建堆填區嘅前期研究撥款前,突然宣布撤回申請,仲話咁做係為咗「顧全大局」,令政界中人相當詫異。本刊綜合泛民及建制派消息,發現大嘥鬼絕非唔夠票闖關,真正死因係財經事務及庫務局局長「傻強」陳家強逼大嘥鬼犧牲嚟成全自己。

有建制派中人向本刊透露,唔少泛民議員會議前已表明反對撥款,仲警告政府會提出終止辯論議案,甚至大打拉布戰。傻強怕泛民一旦拉布,會影響佢自己個局其後提交財委會嘅議案,於是逼大嘥鬼讓路。所謂「顧全大局」,原來係要顧住財庫局,唔怪得當日大嘥鬼心情咁差,發言時唔單只面燶燶,仲罕有地語帶雙關,暗寸有議員嘅言論無視事實,又唔尊重既定機制。查實財委會前三日,劉皇發原本打算邀請大嘥鬼落去屯門區議會講吓堆填區,後來卻以議程太多為由改期,政界當時已流傳發叔刻意喺財委會前冷處理堆填區議題,鬆章俾大嘥鬼,等佢財委會執到死雞,點知大嘥鬼最終輸俾自己友。據悉此舉仲激嬲埋工聯會,事關工聯會不惜冒住被人話轉軚嘅風險撐政府,表態支持堆填區前期研究撥款,但大嘥鬼抽起議案都唔單聲,就算週一佢預告本月再闖關,都唔知以後仲信唔信佢好喎。

TVB誰是主席?

邵逸夫追思會上週五舉行,各界人士雲集送別這位影視巨人。電視廣播行政主席梁乃鵬親自打點,接待出席嘅致祭人士。翻查資料,邵逸夫創辦TVB後,其中三十幾年出任行政主席,直至一一年七月,一百零四歲高齡先放低所有TVB職銜,由梁乃鵬接棒。上市公司通告講明梁乃鵬嘅任期由一二年一月一日開始,任期兩年,即係做到一三年年底,年薪五百七十六萬元。佢亦係董事局成員之一。不過,梁乃鵬任期屆滿後呢二十日,未見TVB出通告公布新主席人選,佢繼續以行政主席身份出席活動,包括主理六叔身後事。究竟佢係留任,定有新人選?就唔見TVB公布。香港投資者學會主席譚紹興話,理論上高級管理層嘅去留,都會出通告向小投資者交代一聲。上市公司會計師同核數師,現階段會提醒公司處理人事到期問題,如果至本財政年度結束,即係今年三月三十一日都未有跟進,證監會就要睇睇咩情況。

廣西創業青年大起底

特首梁振英發表《施政報告》時講咗個香港仔勇闖廣西嘅故事,鼓勵「年青人」勇於北上創業。呢位後生仔十年前按咗層樓,加埋積蓄同問親戚借錢,就去廣西闖天下,依家已經擁有每年營業額超過一億嘅進口紅酒、咖啡及其他食品供應鏈企業。本刊追查之下,發現689口中嘅創業青年名叫潘家穰,已經係九間私人公司嘅董事,更進身香港海南商會常務會董及海南社團總會副會長。不過,佢名下香港物業唔多,只有一個荃灣荃豐中心單位,同佢嗰間物流公司嘅董事潘鵬雛共同持有大埔元嶺一間村屋。潘家穰喺新蒲崗嘅辦公室則由一間公司持有,公司董事之一正正就係海南商會當然榮譽會長、「紡織大王」潘正洲。背景疑似深紅,又同有錢商人關係密切,難怪唔少網民質疑呢個創業古仔水分好高。記者去咗潘家穰名下嗰間大埔村屋,撞到晾緊衫嘅潘媽媽。潘媽媽話,家穰同鵬雛係兩兄弟,但佢絕少過問兩人生意,亦唔知家穰當年有無按樓,只知一切都係靠佢自己。潘媽媽強調佢哋屋企唔係富有人家,「有錢就唔會住村屋,會住番市區啦」。潘正洲有無打過本俾佢囝囝做生意呢?潘媽媽話兩人只係同鄉,「(生意)呢啲嘢我唔知道呀。」潘家穰公司嘅職員話老闆唔喺香港,記者暫時求證唔到創業故事有幾真確。

我要全民選特首!

梁振英發表施政報告翌日,暗中去咗保良局第一張永慶中學,同一班高中學生見面,仲現場直播去其他保良局中學,學生事前完全唔知情,無機會準備點樣質詢特首,所以大部分時間任由689自說自話。特首辦當晚發放幾張活動相片,但官府中人睇唔到其中一張嘅特別之處:有學生哥影相嗰陣做出學民思潮嘅「全民提名」招牌手勢,唔知係咪對施政報告以聊聊一百二十六字講普選嘅無聲抗議?另一間保良局中學嘅老師話,之前一晚放學後先知道個活動同施政報告有關。佢覺得CY旨在政治宣傳,「袁國強都試過去青年論壇,佢大部分時間都係同學生答問,但係梁振英今次去學校就係佢講嘅多。」保良局主席、霍啟剛同其他嘉賓都有發言,真正同學生交流嘅時間其實好少。