http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20140225/18636322
左丁山並非IT人,對運用新科技永遠落後於人,譬如Line,幾個月前先知道其存在,識用WhatsApp係大概於2011年左右,之前用iPhone嘅messenger已經覺得好方便,但依家已經將之打落冷宮,只與沒有智能電話嘅朋友通訊,例如餐飲M堅持用舊式諾基亞,咪大家用番sms囉。時到今日,唔用WhatsApp唔得噃,尤其是時興將啲相片、專欄文章等等傳來傳去,老少咸宜,大家對WhatsApp倚賴得緊要,無日不可無之㗎。
即管如此,WhatsApp是否值得190億美元,有懷疑,但對WhatsApp嘅55名僱員嚟講,漏夜發達,有30億美元(有限制股票)可分喎,只要在合併後工作多四年,就可以一世退休印印腳,當然亦要上天保佑fb嘅股票唔會崩圍啦。
Facebook收購app,令WhatsApp嘅員工發達,可能會影響到香港學生噃!點解呀?WhatsApp嘅所在地係矽谷之Mountain View(山景市),此地已有一間巨企Google,兩間公司嘅僱員梗係高薪兼有錢啦!Facebook在Menlo Park,離開山景市車程頂多半小時,現在有三四百名香港學生入讀嘅社區學院Foothill位於Los Altos Hills,係豪宅區,離開山景市只有十零分鐘車程,好多Foothill學生住在山景市,搭巴士上學。此地租金並不便宜,一年嘅租金貴過全年Foothill學費,WhatsApp僱員發達之後,多數會買大宅,搶貴晒,山景市租金有升冇跌,國際學生有排捱。有意在今年九月送子女到Foothill嘅家長,唔該做好準備,例如朋友Y嘅仔今年考文憑試,驚住有差池,新年時趁往三藩市探親之便,特別租架車揸去Los Altos Hills視察Foothill環境,為兒子謀定後路,環境當然係好啦,佢問左丁山意見,左丁山話:「樣樣都好,只怕租貴,如果好彩嘅,就係捱咗一個學期之後,就搵到三四位同學共租一間細屋分擔租金。」香港學生係到Foothill攻讀IT嘅,住在山景市有機會大開眼界,因為著名公司如Google、WhatsApp、Apple、Facebook、Cisco、Intel、Twitter等等皆在45分鐘車程範圍之內,有野心想學習創業嘅,嗰度係聖地。