年結日,用早排收到新創建同SOHO的特別息買左2500股太古12.06,同埋10000股金達0.96

11月尾去香港時同湯財提過下紡織系列超低估,特別想買利豐,但到特別息收到時已經飛天,雖然仲有大把水位,但買升左的股心中過唔去,出於尊重本心而改買跌左的

總結一下,本年味皇投資組合股本由337萬幾下降至不足320萬,年內從組合中提取了18萬作生活貴同各種支出,難得的4次增資,其實兩次係日本樓租金匯款,一次係政府9000蚊,全年股息33萬,組合市值520萬,而上年市值440萬,股本計就10厘,以市值計就7厘半,加埋提取的股本部分,回報率應該係22%左右掛?跑輸盈富基金,但味皇組合在結構上存在大量所謂拖後腿的股票,因此22%回報率也算是意外地高?就結果而言,今年味皇所有交易今年都是以拖後腿的事實作結的,但味皇的真實目的會有幾多人察覺呢:)

呢度比大家睇下味皇大C美好的戰績\|/

3月3.18出春泉換3.08匯賢,現家春泉3.4而匯賢3.15 ,4月3.16再出春泉

5月1.6出貿易通2.38換CTM,現家貿易通雖然1.34,但CTM也2.07

同月33.1大塊木換2.26嘉士利,現家大塊木32,但嘉士利先得1.91

9月不過不失啦,之前幾個月太多特別支出,仙都唔仙所以冇交易

10月1.4出電腦網,現家都同價,但CTM跌左

11月買的太古,金達,CTM現家都跌左,而青島港:招高局的兌換比由4.95:20.85變成5.24:20.45

12月冇乜特別

簡單地說味皇今年做的全部都係蝕本交易,組合得以增值都是全靠幾年前撿的煙頭股,不過味皇不介意年年都做咁樣的蝕本交易,據說大球會的成績變差,該隊的主教練生活就會變好,當然形象就另計啦

今年股息33萬,比設定目標的28萬高,達至甚至超越股票組合想定的派息潛力,事實上今年派息很大程度係SOHO過度奮發的結果,並不是正常賽果,剩係SOHO一隻都派狠左7萬銀,正常應該派兩三萬,所以扣除後同目標差唔多,不過既然都收過了,下年的目標試下設定為36萬,一直咁落去,今年味皇成為大魔法師了,到成為魔導士時唔知可唔可以去到60萬呢?味皇覺得自已未成為賢者之前,現家已經可以立地成佛了,佛法無邊的魔法師,佛法無邊的賢者,甘道夫,你今日娶左未呀?

味皇已經退休就兩年,遠離顏色社會所開設的賭廳,最近亦冇點針對老千股指名道姓篤下篤下,股票組合也分成兩間銀行買,現家公開組合也應該唔會有人查到味皇係乜水,替月亮懲罰我掛?因此公開組合,前排想知的讀者可以自行參考,不過冇人同的味皇應該冇乜參考價值

                   股數         予期息率

匯賢REIT  202108         9-10%

越秀REIT  115000          6.8%

澳門電訊  200000          7-8.5%

太古B        37500          3.7-5.5%

開元REIT 100000          7.5-9%

惠記        146000            6.2-9%

佳寧娜    350000             3.3-12%

建業         44000            1.4-3%

世紀城市 240000           2.7-7%

華南城      90000            4-5%

SOHO       45000            6-8%

新創建       16000            5.5%

晨鳴紙業    20000           9-11%

美蘭機場    28000           3-4%

金達           60000          5-10%

建業建榮   200000         10-12%

嘉士利       23000           8-12%

周黑鴨          7000          3.5-4%

上實城建    42000          3%

輪船招商局  2000          4.5%

金沙            1200           0%

.......其實前僱主已經連續3期寄失股息支票,佢地址將B字當成數字13寫錯左

來年展望,組合中有好幾隻會有大概率大幅增加派息,順利的話味皇希望的不是繼續持有果D股收息,而是趁增加派息之後股價高升而變返相對低息股時,換馬成穩定型的高息收息股再加投機型的高息股的組合,可持續發展咁,老老豆豆,揸住大批REIT的組合仲想取得高成長其實係幾無理的要求,味皇估計新創建同CTM係一段時間內都會比較高息的水平下買到,如果換穩定型會以佢地為主,投機型的話,現時最失蹤人口的係紡織同零售果類,商品價格同運費上升的情況下,越近上遊的公司得益會越多,搵呢種出黎就係,招商局同REIT的策略之後會繼續同其他同類互換以提高派息,唔會係果度縮減金額,太古同CTM係收息膽基本唔會郁,新創建照計就冇乜可能同水平的情況下換到粵海或長建,同美蘭黑鴨一樣作為長期投資,其他的好價都可以賣,如果有乜事立即要味皇搾錢出黎,估計會係上實同前僱主度落手

現家味皇的收入主要來自股息,同埋換馬時套取部分差額,具體講就係用10萬的6厘股換成同質量9萬的7厘股,股息增加300之餘,仲套到1萬生活費咁樣,今年特別支出多搾取左不少,全年旅行都冇去過,雖然香港就去左幾次即日,下年正常化之後味皇可以恢復旅行同投資

早兩年去某島的時候空氣仲相當好的,但最近火力發電全開就四海之內皆契弟也,移民的實益價值相對低下,當然,政治的考慮上依然價值不減,50年不變對策某島還是有用的,不過藍綠都太冇想像力了,如果係味皇話事,只要準備幾百億美金同一條向東或南的航道,就有辦法取得正式的國際地位,對面的正字打鴨全都打落棉花度,方法基本上商港同呱太都適用,呱太宣稱不用直布羅陀只用蘇伊士都仲過到骨,但商港冇獨立的航線係死症,咳,味皇資金鬆動的情況下,打算正式的擴大係日本的投資規模,掉進稅網

澳門樓的部分,自住唔計唐樓得一層,名義上係味皇的樓A以193萬取得大半借銀行租大於供淨收2000,名義上唔係味皇的樓B有半層的時限收租權利及一部分空間的利用權基本上免費取得,時限權應該值起碼5200,利用權值3300不過打算自用或招待外人,日本樓依然係兩間開放式收緊2千5,但大陸舖位則進入減值狀態,湯財估我身家800-1000,比多一年時間我就差唔多,由於股票組合現時能夠立即收割的成熟部分不是很多,因此味皇身家好似幾多,但也不是有太多自由資金,銀行肯借的話就萬事大吉,關鍵的銀行歧視退休人士呢下衰

前日係某寶買左嘉士利,周黑鴨同佳寧娜的食品,仲未送到,食評下年寫