新力軍

5月出左糧,買股 =D

 

掛左五日,今日終於買到。今次買嘅係294長江製衣@3.01,收巿前做過3蚊,浪費左兩餐當當添。

 

今日收左先傳媒嘅息,之前賣左金又未買返野,隻隻野都咁貴,資金點用好呢?

 

真頭痛......

發表時間:2012年5月3日 | 評論 (4) | 全文

180日

近來已經忙到無寫野好耐~ (懶你就懶啦~)

咁點都要寫返一篇嘅~

呢篇就係180日喇。

4月24都過左幾日,都未寫添~

話說當日又的確係轉折點喎,呢次無偏差,如果跟買升應該可以食到呢幾日嘅升幅~

下一日就係225日 嘅6月27日~



發表時間:2012年4月27日 | 評論 (0) | 全文

賣金


今日終於狠下心腸賣左啲金@41.1,蝕左超過10%,2 bad!

不過算啦(想唔算都無得唔算啦 XD),留多點子彈等跌巿~

cup sir 開始做淡,個人亦認為個巿有跌勢嘅迹象,所以都留啲子彈,準備買平野~

至於最近買嘅一批朋友仔,個個都係高息穩陣派,所以唔打算賣,除非巿況真係壞得太緊要啦~

如果真係要賣嘅,第一樣會賣嘅係工行,因為佢跟巿走,所以跌巿佢會跌得急勁啲。

暫時係咁先啦~
發表時間:2012年4月11日 | 評論 (0) | 全文

工傷銀行


話說文仔5號買多左少少容祖兒@1.37,想寫返篇野,但係諗下諗下想寫第二隻先,因為遺忘左佢好耐。

佢叫做:工商銀行(1398)

呢隻工傷銀行,文仔一直睇左好耐。當年計佢條數,係值6.4,所以買左一直放到而家,更同人講唔到6.4 唔會放~

但點解,過左大大話話都成兩年,股價重係得5.03?

係呢,點解呢?

睇睇今年份業績,增長26.1%,用港幣計增長30%,重唔夠?乜都夠啦下嘩?文仔一直預期0-10%增長,15%非常滿意,家下26%,想點呀?完全超預期地好(其實主觀願望大概都係2x%,呢個都係可以話符合預期)

營業額大左,淨息差大左,利息收入多左,非利息收入多左,派息多左,核心資本充足率高左,撥備覆蓋率高左,壞帳少左。

喂!你想點呀?要多有多,要少有少,想點就點,重想點?

派息率跌左喎!

呢個係阿爺旨意,唔跌殺頭架。再者,跌啲派息率唔駛集資,唔好咩?家下有無派少左息比你先?

0.203(含稅)人仔(雖則唔知佢個稅係指股息稅定公司個稅,應該係股息稅,所以會實收0.25港元),舊年先得0.184人仔

所以話呢,我就係唔明。點解呢?

高盛減持可以理解,佢等錢使(可能唔係架),咁社保呢?佢無理由等錢使架(可能真係呢)。每次社保減持例跌,好x準,準過股神。對上一次係5.5

好多人講親內銀都話建行(939)好,文仔就一直死打話工行好,因為夠大間,資金足無有怕,增長亦可以持續。結果呢兩年出黎嘅業績每股盈利都係工行增長得快啲(雖然去年係快左丁丁丁丁丁)。

呢啲都唔係重點,重點係,點解唔升?

真係巿況關係?

業績年年升2成,唔駛5年就一倍,咁都過左2年啦..... 咁嘅增長率,重想點呀?銀行黎架大佬.....年年增長2-3成嘅公司 pe6.8 倍,無病呀?

賺到錢又唔係唔派比你,你老鼠已經成5厘咁制喇,我平時買啲非主流股都係咁上下,咁那(麼巨)大隻藍籌息率重高過公用股。(開始按奈不住粗口會衝口而出)

所以,我真係好唔明。現在好有被蒙在鼓裏嘅感覺.......

一係,我係眾人皆醉,包括社保都飲醉;二係,咁大盤數報出黎嘅好野我睇到,我唔識睇啲衰野睇唔到,人地睇到;三係,巿況真差所以隻野先反映唔到價值;四係,佢真係有個大劫,例如話內地房地產爆煲導致一鋪清袋,唔清袋都變重傷銀行。

估得中份業績,估唔到個股價,工傷銀行可以話係文仔投資以來最無癮嘅一隻,作為一隻藍籌,我係真係唔預佢會2年無尺寸之功。

發表時間:2012年4月7日 | 評論 (9) | 全文

出糧買野

出左糧梗係要買野~

本來諗住繼續金利來,但買下買下成3.28,有啲肉痛,所以想等佢平返啲先買~

咁買左咩?

今日買左聯亞(458)@5.08。其實好豬,當日4.51買丁c 咁多,今日又走去買5.08。如果當初一次過買,咪可以慳返10%有多。不過又淆底.....

而家出左業績,就唔怕唔好業績,因為好業績,所以就放心買

人類真係好奇怪 haha~

 

比左10%保險費,又成交左,都叫做塵埃落定,咁就唔理喇 =D

 

文仔而家問題係有輕微水浸,因為想重組個配置,將失敗左嘅金etf(3081)沽出,轉落另一隻到,加上出左糧,上次惠理(806)賺左拎返注本又未用返晒。

 

要好好地計下啲% 同埋搵下有無新嘅好股可以買 =D

發表時間:2012年4月2日 | 評論 (1) | 全文

又買野

話說利事錢一直未出擊,全因蘇民峰話3月跌巿入內銀/航運,結果等到三月都就黎完都無跌巿出現。早知就收齊利事就出擊啦~

風水佬有時都真係吹水吹中就神,唔中就算。

算啦,福係自己修返黎嘅,蘇師傅咁大眾化嘅評論要中的話又唔係幾好嘅,如果舖舖咁準佢都唔走出黎講野啦~

言歸正傳,利事錢買乜好?諗極都諗唔到!

結果,就比家姐話事,話晒大家大份。

最後佢揀左金利來(533) XD

結果,今日就3.25買左啲好貴嘅金利來。回調嘅就早響丫,等我3.2先買嘛......

無所謂啦~
發表時間:2012年3月28日 | 評論 (0) | 全文