溫故知新,明天派卷

話說早陣子,寫過長建(1038),今日電能(0006)出左業績,對對數先~

嗰陣……

「咁即是話,電能今年的盈利是:(無視一切其他盈利) 36.06+46.59=82.65億,除返股數,每股盈利就係3.8725,現價59.35,PE = 15.32倍」
 

結果,事實係香港業務並不能持平,由46.59億跌到45.12億,真係估錯喇(鬼知港島居民咁節約能源架咩....),但係,外國業務就好爆,最後係45.63億,重多過HK,問你死未。可惜報告未能查出UKPN賺幾多錢。但發現左少少野,證明文仔之前做研究唔夠小心,就係電能的澳洲業務。年報記載……

「南澳洲省唯一的配電商ETSA Utilities服務逾八十萬名客戶,於二零一一年達到所有主要財務指標。另外,由於二零一零年至二零一五年的規管業務檢討及上訴結果,令網絡收費提高,帶動收益超越目標。澳洲的CitiPower及Powercor 繼續錄得穩定的溢利貢獻。兩間公司的網絡可靠度較二零一零年大幅提升,而用戶數目亦於二零一一年增加百分之二。」

唔該晒喎....原來,電能澳洲業務同長建係一樣的,因為長建又係ETSA Utilities、CitiPower 同 Powercor.....咁又幾好丫,即係澳洲業績應該無問題,可惜佢無提供數字。

查下查下,又查到.......2010年一份港燈長建的新聞稿......

http://www.hutchison-whampoa.com/upload_docs/2010/06/Energy/2227/2227_chi.pdf

「港燈與長江基建的交易作價為港幣十二億三千四百萬元(折算約一億零八百一十萬英鎊)。預計港燈是項收購可於今年六月十日完成,而收購完成後,港燈及長江基建將分別持有Seabank 百分之二十五權益。」

咁即係話,無論UKPN定係Seabank,長建同電能都係一樣份額。佢地英澳二地業務基本上係99%相同(如不是請指正,我無仔細查察。雖然如此,我其實好想寫100%相同,因為我覺得係)年報記載……

「該百分之八十之增長,主要來自二零一零年十月收購 UKPN 及於同年六月收購 Seabank 的權益所帶來的全年溢利。」

咁又幾好丫,即係電能海外業務的增長,主要都是由英國業務帶動,而呢樣野可以完全套返在長建身上。可惜佢無提供數字。

無提供數字丫拿,就查你!

分部資料到有記錄,英國業務可報告盈利:35.58億,澳洲業務可報告盈利:8.43億。呢兩個數字,大概都不會偏離太遠。然而,香港業務可報告盈利:44.8億,與heading的45.12億有偏差,當中大概是在「所有其他活動」中隱藏了。但姑且先試用~

嗰陣:「咁即是話,長建今年的盈利是:(無視一切其他盈利) 31.4+36.06+10.26=77.72億,除返股數,每股盈利就係3.323,現價43.75,PE = 13.166倍」
 

現在對數字,38%港燈股權收益:90.75億 x 38%=34.485億 (其實應該係38.87%,所以係35.27億)

34.485+35.58+8.43=78.495億,除返23.94億股(股份增加左),每股盈利就係3.278。

 

其實,都差唔多啫 =D 不過我相信,英澳兩邊情況應該會比偏差數字較佳,再加上水廠及無視了的盈利,明天的業績,應該可以過80億。

又睇下聽日準唔準 =D

下面係大行報告,佢地估最多都係80.49億喎,睇黎都應該大機會好過預期了~

http://hkstock.cnfol.com/120307/132,1358,11922501,00.shtml

無息幣

無息幣,係太史公教我地嘅重要概念。《史記》裏的貨殖列傳,是文仔投資的參考寶典之一,多讀甚有裨益,大家有興趣都可以研讀一下。

近日賣左啲惠理(0806),拎返舊錢就梗係身痕,個巿咁牛,唔買野個巿係咁升個心理會好唔平衡。

但係,升下升下又升到21,000樓上,雖然小豬兄話齋,21,000係較16,000貴但其實實際係平,因為21,000對於好多股票黎講其實都未返返根本價值。 不過,感覺就真係無咁良好嘅。

所以,搵啲安全啲嘅野買啦 =D

有咩好?湯兄有隻好野,先傳媒(550)。佢分析得好詳細,我學到好多野,其實睇佢個blog好過睇我呢個 XD

不過,唔寫齋跟人頭買並唔係正確嘅投資方法,所以文仔係會自己再睇一次先決定。既然係咁,又寫下我嘅分析係點啦~

先傳媒剛剛出左業績,派息20仙,特別息20仙,連中期6仙,加加埋埋就係46仙。文仔中期未有此股,末期佢未除淨所以有,現價3.02來說,0.4就有13厘,0.26就有8.5厘,夠晒皮。

當然,唔可以只睇派息啦~

快速scan一下先,aastock有好方便嘅數字:

1. 現金流5年正數,年年有錢入。
2. 盈利5年正數,年年有錢賺。
3. 固定資產5年年年升,一直在擴展。
4. 營業額5年年年升,一直做大嘅生意。
5. 現金4.07億,總負債1.46億,雖不是淨現金公司,但財務穩健。

快速地睇,隻野似乎唔錯。

盈利方面,今年賺左1.74億,除返3.21億股,每股盈利0.54。咁應該用幾多倍pe估值呢?諗唔到有啲咩公司類似,做廣告嘅.....媒體......
南華早報(583)10倍左右、新華文軒(811)8倍左右、世界華文媒體(685)10倍左右。如果以呢個做參考,8-10倍pe嘅估值....咁咪值成5.x?

唔....咁估值好似唔係辦法,不如睇年報~

廣告業務及印刷業務分別佔本集團收益之55%及45% <-----
咁即係話........

廣告業務收益係:1.74億x55%=0.957億/3.21億股=0.298
印刷業務收益係:1.74億x45%=0.783億/3.21億股=0.244

如果廣告業務係8-10倍pe,即係0.298*8=2.384
如果印刷業務係3-5倍pe,即係0.244*3=0.732

咁公司估值就會係3.116,同現價差唔多。

咁講法,點解要買呢?真係睇息份上?

其實,詳情睇湯財嘅分析就會明白。 =P

因為,上述嘅分析有盲點,就係只睇盈利。如果計入資產質素黎講,公司估值就會提高。原因在於印刷業務係匯星印刷(1127),主版上巿公司係有一定的價值,如果用0.732去衡量先傳媒嘅60%匯星印刷嘅股權價值,就會低估左。

計埋低估嘅嗰舊入去,公司嘅估值就會變成大約4元instead of 3.11喇~
咁,現價就會有20-30%折讓了。

haha,係咪好混亂呢。所以,睇湯兄嘅正確示範會比我好得多~

星期五買嘅時候,其實奮戰左好一陣子。凱基不停掛買盤,買到3.07無晒貨,將自己啲3.06推上去3.07買,掛3.05嘅文仔覺得好無奈。嬲嬲地掛返落3.04(因為3.03有20k買盤頂住)。出左街無睇,收到sms以為收左巿話我知買唔到,點知睇真啲原來未夠4點,買齊晒。最後重收3.02添。

3.05掛買嘅原因,係計過有8.5%息,再高的話就無喇,所以打死都唔掛高過3.05 =P

其實,間公司唔係四大做核數師,呢樣係我係唔係咁有信心的。不過公司歷史耐,可以彌補一下嘅。當然,基於呢啲戒心問題,我都係買左少少壓倉,未用晒啲子彈啦 =D

艦長!我來也 XD (重話唔係跟人頭買!去死啦文仔 XD)

繼續金利來~

啲金無啦啦跌左4%,唔知搞乜鬼。不過,金利來(533)應該同金無關,所以唔理~

3月1日出糧買股,當然係港人情意結匯控(005)嘅朋友文仔情意結金利來(533)。掛左3.15買,結果當然買左啦~

原來,最後賣到鬼咁平....早響丫~

不過唔緊要,因為都係收息,唔爭在一仙半毫~

賣錯左惠理(806)之後拎返舊錢,都未買返野。近來個巿麻麻地,睇睇先再算~

食雞糊

見近來個巿麻麻地,本住袋左落袋嘅錢無話蠢嘅心態,一於食糊啦。

由於今朝有野要做,只能於開巿時把握少少時間出貨。5.44 沽清所有4.74買的惠理(806),獲利大約15%。很久沒有試過10%以上回報的投資了。
也算是滿足吧?雖然最高峰的時候是5.8差不多23%....果斷一點也可以20%。

算啦,當學習過程一個小結啦 =D

直至3時左右,坐車回家途中發現,恆指升280點@@

回家已經收巿,恆指升350點@@

在滿佈粗口的情況下,發現原來沽出價與收巿價都相差無幾,都會覺得好過一點 XD

其實可以做得更好,但現在都可以接受吧?

巿況仍然很牛,要為資金找出路呢~

但是.....要升的都升了(聯亞爆晒seed @@),應該買甚麼好呢?

要物色一下啦~

135日

剛剛過左第135日嘅2月16日,星期四,其實無乜大突破/轉折,反而2月15日升400點以上突破21,000「鐵頂」(我聽《星火燎原》係咁叫架,我聽到即刻安晒心,因為=破硬XD)

換言之,這次135日應該係早左一日發生突破。



已經用唔到半年圖,唯有用一年圖。aastocks 啲圖其實好靚,我覺得睇得好舒服~

由於圖細左,變得唔清唔楚。不過大家可以上返aastock查下個圖,咁就會知道的了~


其實玩到而家,都覺得無乜作為。無作為嘅原因係:
1. 都唔知佢升定跌,轉折還是突破差好遠
2. 早一兩日/遲一兩日,成5日差距,太大差別


所以,得啖笑 =D

下一次,將會係3月8日嘅150日,又睇下有無料到~

 

追擊容祖兒

今日追擊左英皇娛樂(296)@1.28~

文仔基金仍有現金,不過呢啲應該唔會再投入lu,留返黎睇下3月係咪真係有機買平貨~

惠理(806) 一直持有至今,不過呢隻唔打算長線持有,就算長線都會賣返啲出去,畢竟利潤都唔錯。

之後策略,就係繼續坐定定~

出左糧先再爭持金利來(533)~

27號開始,就由匯控(005)掀起業績公佈嘅序幕,3-5月,文仔基金都應該有唔少公司會出業績,包括金利來、惠理、中遠國際(517)、聯亞(458)、工行(1398)、太平地氈(146)

都咪話唔多呢~

做少少預期嘅(唔係預測)

金利來,應該有增長,派息會增加(派少左息我打佢)。
惠理,應該好核突,因為去年巿況唔好。不過呢個唔影響。
中遠國際,唔期望佢好,好有機會衰埋添。只望佢交待下母親大人幾時打野入去。
聯亞,有期望,不過唔敢太大期望。派返去年咁嘅息/加少少派息已滿足。
工行,死仔話明派少左息,真係打佢,但無計。盈利應該會升,最少升10%以上啦。
太平,盈警都發埋,重有乜好期望?搏佢快啲賣左單野派特別息就夠。不過如果有末期息派我都唔會唔要,雖則佢派我買得咁少都唔知會唔會比晒渣打。

就咁先啦 =D