新學問

話說個巿咁衡,文仔都多左鑽研《在巿場提款》,cup sir 炒股的確有佢嘅一套,雖然我對於佢所謂嘅「價值投資」意見不同(例如佢之前話建滔化工(148)、博士蛙(1968)係價值投資,我真係唔係好認同),但對於佢炒股嘅方法實在很想,很也值得學習。

經過一輪瞎子摸象,文仔大概掌握到少少方法,雖然學下學下覺得還有很多cup sir 嘅學問未摸到/應用到,但手頭上呢啲都寫下,做一個紀錄。

在現在這個巿況下,cup sir 主張嘅係買剛突破嘅股票,而當中亦有其中嘅學問。

我認為,cup sir 炒股嘅核心觀念應該在於成交與走勢二者,雖然唔知啱唔啱,不過姑且寫寫。

走勢,真係好難講....有時真係好似好唔科學,特別係用一啲唔知有無道理嘅原因去解釋走勢嘅形成,所以我唔打算深究,除非日後學到原來呢啲先係關鍵,先補數。走勢有好多種,好似之前寫嘅cup with candle嗰啲,呢啲圖表分析,方間好多書都有教,教到似是而非,虛文汩汩,認真你就算鳥咁,其實好靠唔住。文仔初入股場都學左一輪,所以叫做有啲技術分析底子,睇起上黎都易上手一點。老實講,如果你去方間搵呢類書睇晒按圖索驥,乃野情況高達80%。

所以,文仔認為cup sir 炒股嘅核心中嘅核心價值在於成交。(請不要學唐英年亂用「核心」二字)

文仔啲親戚成日同文仔講,成交係無得呃人嘅(真的嗎?姑且信住先....),睇成交有時候係好具備參考價值。然而,原來成交呢種具參考價值嘅東西,係要配合走勢一齊運用先會事半功八倍的。(請不要亂用成語) 例如,一隻股在1-1.2之間上上落落左3個月,升升跌跌載浮載沉,在trading range 無日無之,咁嘅時候,呢隻野無論成交多少,某程度上講係睇佢都浪費時間,唯一要知嘅係,佢浮沉時嘅日常成交係多少,就當佢係5,000萬。然而,到左某一日,佢突然升得好快突破1.2,成交重要大增例如至1.2億甚至2.3億,咁就係殺入去之時。通常地,呢啲大成交突破一兩日之後,都會有一啲回吐出現,而呢啲回吐重點,係成交大減例如至5,000萬、6,000萬咁,然後,佢又會再大成交大升。

除左突破爆升之外,成交重可以運用在跌之上。

例如,某股票升得好地地,一條升軌一直爬,爬到某一日突然好大成交下跌,跌穿晒條升軌,咁就係散水嘅時間。

隔山觀牛,可以學到嘅暫時係咁多,不過於近來係又升唔係又升嘅巿況,其實已經好好用。

就記錄於此,以作學習啦~

炒賣與投資

牛爆之勢,無可擋也,睇淡真係大件事,好在文仔都算醒覺,雖然比較遲鈍。

話咁快,繼續隊穿頂,公用股跑輸,逐版逐版10%輪流升,創3-6個月甚至52周新高股票不停增加,大成交突破,種種跡象都顯巿,不是熊巿。
文仔,你衰左喇,唔到15,000。
其實,我仍然覺得,歐美經濟一啲都唔好(美國好似還可以,歐洲真係noway),但係情況如同09年-10年,美國經濟一樣唔好,但個巿由10,676升到24,000,唔買眼白白錯失機會,哪怕11年尾怒插,當中都失去好多好機會。
所以,即使13-15先跌穿15,000,甚至12年年尾就插穿,都唔應該放過今次升浪。畢竟,機會是難得的。

近來的思維係:

1. 個巿短期內好明顯唔會跌落去,升多過跌,大漲小回,理應入場搵返啲。由16,000-21,000,基金一直掃貨,實在好明顯。
2. 買乜好?買穩陣嘅,對唔住,好明顯會跑輸大巿好多,心理會唔平衡。
3. 買垃圾,喂,話明垃圾都買,唔係掛?
4. 炒股還炒股,投資還投資,賭錢還賭錢,做生意還做生意,要分清楚。
5. 順勢而為,無謂同錢鬥氣嘛。

咁,即係點呀?

結果,文仔就咁咁咁......

1. 搵啲又炒得又安全嘅去炒。
惠理(806),基金的基金,個巿升,佢實跟升啦,佢咁多貨。個巿執笠?佢都有手續費收架喎,基金就係咁鬼唔公平。咁巿好呢?重駛問,梗係分你花紅啦。所以多謝投資惠理基金的朋友仔。咁唔升會點架?咪收3厘息囉。你方惠理基金會執笠咩,謝清海白手興家,由馬拉黎香港叠報紙,佢都唔係流架。

2. 搵啲唔炒得但又好安全嘅去買。
英皇娛樂酒店(296),被稱之為容祖兒(請不要亂改別人公司的名字),公司乃係做....生意的。酒店?錯了,乃係做賭業的。賭業佔88.8%,酒店佔11.2%。唔好意思,賭業股好似澳博(880)、銀河(27)、金沙(1928)等等,搵隻pe少過20嘅黎睇睇?搵唔到呢,但容祖兒都係在澳門擺檔,拎住10億cash(13億股)無負債,資產值1.3,按現價計去年派息7厘有多,業務好時又平成咁,重有主席喪爭持,咁嘅股去邊樹搵?唔覺唔覺,由文仔買左到家下,已經升左10幾個巴仙,你都咪話唔識郁。

3. 長線投資嘅朋友仔繼續fd底
金利來(533)、聯亞(458)、信星(1170)、中遠國際(517),隻隻都跑輸大巿,不如賣左佢追另一啲重快啦!noway 2!點解?因為佢地乃係長遠的好同伴(或者啦 =P),試問金利來何時跑得快過個巿?但係,你試下搵搵,由2003年至今,能夠跑贏金利來嘅又有邊隻股?唔計股息讓你(大把啦!港交所、騰信、康師傅……打飛!請不要拿一些股王來搗亂!)佢地嘅價值唔在於呢一兩年甚至一兩個月的時間。要行的時候,連我自己都驚呀!(btw,要同信星仔你講句對不起。話說當日我係打算在1蚊樓下增持你架,因為你去年派1毫息,如果今年你派返同樣,你就成為十厘股,我就可以在blog上大吹大擂。但基於貪心之故,我嘴砲了。是我的錯,對不起呀....)

於是,兩條腿走路嘅日子仍在。

但由於近來花多左心機在炒股方面,發現其實壓力還是有的。投資的學問很大,在炒股的時候更要遇上升跌的衝擊,挑戰各項貪婪、驚恐、信任等等人性,那種感覺足以令你浪費很多時間,甚至喪失生活,實在唔好。各種人有各種唔同性格,文仔似乎對於呢個情況唔係咁適合。

或者,係功力及經驗未夠吧?

不過要我揀,要成日搵好野入巿炒,重要計上計落,實在好攰。我都係鐘意無壓力等佢慢慢增長嘅情況多啲。

點都好,呢個月,投資方面都叫做有少少成績(咁嘅巿都無成績就唔好寫blog 啦文仔!),收貨啦~

cup with candle

其實點解買惠理(806)呢?真係要多謝cup sir。(今日第一日叫佢做sir,在炒股mode上,我服~)

鑽研左一排《在巿場提款》,其中學到一樣叫 cup with candle.

其實係一個走勢,好似頭肩頂、雙底等等啦~ 不過,據cup說呢個形態好得。咁,我又試試啦。
我學啲唔學啲,都唔知有無錯。不過有啲重點都拎出黎寫寫啦~



話說,cup with candle 就係好似一隻杯咁,重要有個杯柄。
上圖黑線係股價,開頭好似一個圓底咁,後來會在突破關口向下回調,但回調的成交會縮少/持平。再之後,就係大成交突破之前的阻力位(藍色線)
有一個重點係,杯柄係要向下/打橫,唔可以向上,如果唔係形態就會無用。
大致就係咁啦~
cup sir 話,如果出現杯柄之後個支大陽燭+大成交,就係追入嘅時候。

學左啲,又想試試。



咁啱又有一隻惠理係咁上下樣~ 係咪好似呢~

其實,個巿好,個巿升,惠理自然會升。惠理又係一間有規模的公司,重有三厘幾息,安全呢。
個圖又咁似樣,走勢又咁好,搵野炒搵佢實在係有基本又有走勢,不可多得呢~

咁,就一於試試佢囉~

除左學呢個走勢之外,cup sir 亦講左另一樣野係我用得上,就係試試看 XD
話說cup sir 買野係先買少少,試到係掂就再追擊,唔掂就啪。
我又學,所以噚日試一試,衰左壓力都無咁大,今日確定,追擊又會有信心啲。

又真係幾成功喎。

如無意外,聽日應該會繼續向上爆。此股,應該實食無走雞了。


的確,開頭係唔係好like cup sir 成日針對 ckm sir,但《論語》講得無錯,「不以言舉人,不以人廢言」,cup sir 的炒股能力的確係優秀,所以「擇其善者而從之」。


投資的確係一門好大的學問,要慢慢學呢~ 各位都要加油呀 =)

2月2號,新年快上~

話說噚日中左伏,4.66追入惠理(806)就即跌到4.5左右...收返巿都係4.62,唔見左4仙。
今日一開巿,拾級而上@@
案原定計劃,如果今日大成交突破,就追擊~ 1個月高位係4.8,如果突破就追擊~
做野做野做野....
下午食飯睇睇,4.85@@ 唔係呀fa?!成交8百萬有多=之前成日。早排最高係2,300萬成交,其餘都係400萬-800萬成交,今日上下午加埋應該都過1,000萬啦。咁即係話,會符合計劃喎~
食完飯,即刻黎料。咦,4.85vs4.86,成10xk賣@4.86喎。睇睇先... 1秒後,a盤4.86掃清,4.86vs4.87@@
唔係呀fa....
4.85有65k買,咁我排隊應該唔到我啦?結果,趁人少少即時落盤@4.86。三條友在我前面,不過都應該買到掛?
成交~
做野做野做野
4.97 @@ 得左 =D

呢次,應該有得贏喇掛?

除左806,今日重買左英皇娛樂(296)@1.1。買左好少,因為驚羊生千我。同時,因為買得少,所以目標遠大,1.5先諗放唔放~ 反正有8厘息,應該都會派比我嘅,中期都派左0.043~

今日,就係咁喇~

難得炒股有錢賺~ 寫返篇短炒小技先 =D

2月1號,新年快樂

話說呢兩日,好想買惠理集團(806),一開巿4.55,好想買又好淆底,淆下淆下佢爆升,即衝入去@4.66,一睇返見到買盤@4.67,都唔知買唔買到。
結果,成交晒。約15mins之後,新年快樂.... 4.6 @@

我果然好老散....頂......

點解錯極都唔識改架呢? 哈哈~

其實,4.66都啱價嘅,畢竟我最怕唔係買貴少少,而係怕慳2毫唔見20毫。

燈神出手了,各位,有貨好快沽喇~

文仔投降

巿況發展至今,文仔投降了。

睇淡似乎唔乎合現時巿況,應該唔會跌返落去喇。

有人話,睇得最淡嗰個都睇好,就係開始跌爆之時。唔知呢句話用唔用得著呢?我睇好了。

照估計,而家將會係大漲小回格局,今日回吐應該係超買的回吐,然後會再行過。

2月,文仔應該會出手,最少,都將而家現金比重降低。

固定投資將會繼續,兩條腿走路策略不改,收息以至財務自由的方法係會繼續沿用,金利來(533)仍然係長線收息的重心,唔升唔打緊,派多啲息就ok了 =D

朋友仔,準備入巿未?