120日的大限

很久不見,各位朋友仔好 =D
新年快上,步步高陞~

話說之前講到,21號係大寒,前後一兩個交易日會轉折。等左好耐,終於黎到,結果係?

乃晒野囉 XD 文仔預早兩日同家人出貨,結果中晒招啦 XD

整返個圖先~


又要鳴謝下aastock 的版權,十分感激。


話說,第120日乃係1月26日,結果轉折無出現,無回過,第121日的1月27日,繼續升,問你死未。
去到今日122日,連升六日後,又係周易的「七日來復」mode,終於出現轉折。

文仔經常話,呢個遊戲會有一兩日的誤差,可能早一兩日,可能遲一兩日,咁呢次都叫做準?
如果咁都準,咁就真係無野唔準喇。老細呀,預佢早兩日,散定水,結果最後係遲兩日,前後差左五日呀,點準呀?

所以話,呢啲所謂的準,實在參考價值有限呢。手術很成功,但病人死了,意義何在?

不過,呢個遊戲文仔都會繼續玩落去嘅,因為幾好玩 =P

就當一個統計數字啦~ 都無壞~

下一次好快到,係135日,即係15交易日之後,就係2月16日。到時又睇下點~

未等到216,先有204的立春。咁啱又咁橋係周六,唔通又要遲2日?

發表時間:2012年1月30日 | 評論 (0) | 全文

偉哥回歸 =D

原來偉哥回歸係堅料 =D 除左超開心之外,以經無形容詞喇~

小fans文仔真係好開心呀 haha~

雖然,偉哥話唔寫blog,不過,佢返黎,又有一班朋友返黎,呢都係失而復得的好東西呀~

最開心就係有一班fd 一齊傾計 =)

在realforum裏有一班,yahoo又有一班,偉哥那邊又有一班,真係好開心呀 =D

識左咁多fd,文仔覺得呢啲就係股票巿場上最大的收穫 =D

哈,真係好開心~

我的最愛裏偉哥blog的書簽一直都在,靜左好耐,而家又可以發揮作用喇 =D

好開心~ 感覺就好似買左隻股票等左好耐終於升咁 XD

發表時間:2012年1月20日 | 評論 (2) | 全文

深深不忿.....

近來個巿一直升升升,睇住自己個組合唔識郁,真係好意興闌珊。
有時候都幾沮喪,學左咁多野,做左咁耐買賣,無尺寸之功,真係會懷疑自己能力同走的方向係咪正確。
人地話,黎明之前必定會係最黑暗的時期,問題係,過唔過到今晚先....

睇住cup 日日操作良好,都真係好堅,文仔寫個服字。佢的確係我觀察以來的少數炒炒貢而搵到食的人,實在好野。
有時事實勝於鴻辯,佢係得就真係得,無得好拗頸~ 如果佢唔搞針對的話,我會更加佩服。
今日睇到,有人話偉哥復出,等我即刻仆去睇,點知...流料....如果真係就好喇....

講返今日先。今日文仔買左太平地氈(146)@1.61。不過,呢個純粹投機,所以買左好少。講下原因啦。

話說文仔好耐以前整左一個鳯凰錄,搵一啲好抵買又好高息的股票做觀察名單,主要方法係用祖師爺的pb*pe<22的方法做。其中一隻當時唔識但又符合標準的叫做太平地氈。睇睇佢當時因為重組而虧損,但又有交稅,用返味皇方法回算,好似會幾好。不過時間一耐,就放低左忘記了。

直至近日,realblog 的Wilbur兄提及此股,所以再次留意。翻查近來公司資料,其中一項令我注意這隻股票。

公司公佈,在董事會通過接納威海山花地毯有限公司對該公司收購3間公司49%股權的方案,該3間公司分別是威海山花華寶、威海山花惠美、威海山花博美。簡單啲講,就係威海山花有限公司將與太平地氈合資的聯營公司私有化。作價是2.8億人仔,即係3.4億港元。

計計數,3.4億/2.12億股=1.6$HK

而太平地氈的股價是,1.6。

換言之,3間公司一賣出,已經=現價,公司其餘的東西都是送的,包括1.56億=每股0.73的現金。

本來,知道件事都無乜動力去買,原因係呢間公司近來出盈警,虧損喎,文仔最唔like就係呢啲。不過昨晚食飯同親戚傾開計,就令我立下心買佢!
事關,親戚認為,呢啲野,你都識睇,方間咁q多人又會唔識睇,係咁堅又會無人買等你買,懷疑有鬼陰你啦!
興興地,就買佢老母同佢賭一鋪。

當然,文仔都有問過各位前輩觀點,自己亦都諗過度過先買的。

首先,公司唔係幼萬,因為係超老牌公司,而且同大酒店(45)有關係,所以被千機會唔大。

第二,公司無借貸,現金有0.73,其實好穩健。不過業績唔好亦係事實,會虧損,現金就=等蝕的錢,所以呢點說服力其實唔太大,不過都可以用以參考,斷估全年佢都蝕唔到1.5億掛?就算蝕到,都重有資產丫,清盤計返開應該都唔止值1.5。比較上,仍然安全。

第三,單deal 應該做得成。呢個係我自己斷估嘅。原因係,3間公司唔係佢話賣搵人買,而係人地黎同佢買。換言之,作價係人地出,呢邊係接納,所以賣得出的成數係高的。當然,人地會唔會反口係無得預期,但照常理黎講,提得出收購意見而又自己退出,感覺上可能性就較細了。

基於呢啲原因,就越來越想上馬。

再查查提出收購的公司,個網站都似樣,重有雜誌出添~ 可惜的係無公司年報,想查佢啲野都查唔到。

anyway,今日就上左車,買左少少,目標? haha~

佢賣3間野1.6,如果佢派返20%特別股息,有0.32,當10厘,股價都有3.2。

利欲薰心,加上怒氣攻心,於是下定決心,出擊。

所以,感覺上好賭錢,重要賭埋啖氣 HaHa~

呢啲咁唔理性嘅野,點解我會做架? XD

都唔係我風格。

點都好,又睇下結果會如何?

發表時間:2012年1月18日 | 評論 (2) | 全文

好耐無見

都無乜時間寫野,越來越多野做..

近來個巿又升返,又好似無晒事咁。其實...歐盟做左啲咩?點解可以突然無晒事?

我唔知呀 haha~ 不過我睇錯巿的機會越來越大,唔到15,000當我輸的遊戲睇怕又要輸多舖 XD

投資..真係好難...^^""

諗住揀的長江基建(1038)一直升一直升是正確,結果2日就證實我錯左... 升左十幾日都唔及2日跌幅,世界真難撈。

如果金利來(0533)都瓜埋柴,真係唔知我到底學左啲咩....

不過年頭同real blog 的網友玩tip股遊戲,特登揀啲自己覺得貴但又好的股票做試驗,效果又反而唔錯喎。佢地包括偉易達(303)、ASM太平洋(522)、聯想(992)、第一太平(142),4隻野年頭至今回報都好好。如果呢個實驗成功的話,或者我又認真諗諗,自己的方法係咪應該調節一下喇。

或者,冥冥中自有天數?燈神之命,都係叫我好好讀書罷了....

發表時間:2012年1月14日 | 評論 (0) | 全文

悶死~

個巿實在悶到爆炸.... 好多朋友仔啲blog都靜晒。
唔升又唔跌,升丁丁又跌少少,呢啲巿真係悶都悶死。

所以文仔近來都努力做其他野 =D

其實跌真係唔緊要,唔該跌得多啲囉 haha~ 咁搞法真係好鬼悶架嘛~

cup 近來的買賣,轉來轉去,稱之為汰弱留強。或者啦,但佢近來買的東西,我個人真係無乜興趣。不過,建滔化工(148)我都覺得感覺良好嘅~
個巿唔升,又唔跌,持續trading range之間,要賺錢真係好難。cup 呢類炒東炒西的投資者,呢段時間就好難做野喇。其實我認為佢好似當初索性撇開晒啲野睇下書咁重好。
近來佢話等到突破之後買/賣野就太遲(類似咁意思啦~),呢句話講得啱,但同時亦有另一邊的問題。如果未突破就先買/賣,結果唔突破/向反方向走,就會好似現在的情況一樣,或者成日要止蝕喇。針無兩頭利嘅,各有各做法,好難話咩啱咩唔啱,特別佢話「股票就係賭」,咁賭錯輸錢都無話可說的~

至於我自己呢?無資格話人 XD

因為我其實都做左好多好搞笑的事~ 例如個個月買金利來(533),其實幾個月個價都係咁上下,2.97、2.91咁,其實一次過買同分開買分別=0...^^""
之前啲聯亞(458)排來排去,其實一股都無買過,分明搞搞振無幫襯。而家有人出黎隊個盤1xxk買喺4蚊到,想4蚊樓下買已經無機會嚕~

都唔知有咩好講,不如收聲~

發表時間:2012年1月9日 | 評論 (1) | 全文

2012年第一交易日

2012年第一個交易日,買野!
月頭例派手痕,諗左好耐買唔買一仆一碌(1883),最後都係揀返金利來(533)。
掛頭盤,2.91,因為見到2.90有勁多人排。點知....一野質到2.90啲盤都清晒@@... 早知就掛2.90啦,邊個咁大手出貨呀?
搞到我都比佢嚇親.....唔通....隻野有問題?
係就大件事了......
不過,最快都要3月先出業績,有事都係到時先知。文仔有信心無事嘅 =D

終於辛辛苦苦整理返自己究竟幾錢買手頭上的貨,將啲派息等等加加減減就係以下數字,咁今年就可以由頭計數喇 =D

工行:5.38

信星:1.62

金利來:2.921

聯亞:4.01

中遠國際:4.23

黃金ETF:47.1

雖然話手頭啲貨有啲買落好耐,有啲自己唔識中左伏,但睇下睇下,都幾失敗。
我諗遲啲都要處理返呢班大帝,必要時可能要換血~
而最大機會換血係隻黃金ETF,因為佢無被動收入同前景最不明朗。
其他的,信星我早排掛0.99買唔到,因為無人賣。我諗緊再買,所以呢隻應該唔會殺。
中遠國際,仍然在等運到,但估唔到個運等左咁x 耐。不過我諗我應該都會繼續等,所以呢隻都應該唔會殺。
工行,其實一直都會用黎做下range trade,可以用來養老,用來炒,呢隻唔需要搞。
金利來同聯亞,個人信心最大,唔係考慮之列。

車!講咁x耐,咪剩係得隻金會考慮啪左佢....浪費讀者時間。

今年一定要做好啲 =D

發表時間:2012年1月3日 | 評論 (0) | 全文