真係無晒事?

好耐無寫野,畫返隻龜先~

感覺上,好似真係完全無晒事咁,歐債問題已經解決了嗎?

老實講,好似真係想唔認輸都唔得,走勢真係好好,完全唔似會出現之前的大跌了。

下一個關口,就到20,000,如果真係收復埋22,000-23,000嗰啲位,文仔就真的輸了。

唉....無左個勁低位入巿機會。原因係太過相信歷史?太有自信?(呢啲係咪cup 所講的bias?)

點都好,照做自己做的事,最少我還有很多低估值的東西 =D (金利來、聯亞等等)

寫呢個blog最好的係,有得交流,睇左其他人的blog,就學到新方法。除左湯兄搵幼萬的能力、也有cup炒炒貢的功力,也有瘋子兄ckm兄固定投資的學問,也有味皇兄關蛇兄基本分析的技巧等等等等,救左文仔唔駛食白果 =D

所以呢,三人行必有我師焉~

一直處於半倉mode的文仔,可能都要逐漸調節下,變成70-80%倉mode了。

講返大巿,好快就到12月7日呢個重要關卡。呢一日,係新一個江恩理論交易日轉勢點,又係大寒,會出現轉向下/大升突破的情況,又睇下到時有乜反應。

大家都話9號有方法解決問題,唔通7號會大升?

但升左咁多日,睇怕都係時候跌跌的了。大漲少回都總會回架?

文仔就買跌~ 睇下又會點先 =D

發表時間:2011年12月6日 | 評論 (0) | 全文

繼續買貨

12月1日,升個不亦樂乎

出左糧,就更係做固定投資啦~

又排左一日金利來(533)@2.92,到差唔多尾巿,收左一半@@ 幾驚佢比得一半我....好在,最後收得齊 =D

一個月之前又係咁上下價,一個月之後又係咁上下價
咁其實我呢個固定投資嘅效益係咪好低呢? haha~

anyway,當保險工作啦~
話時話,政府嗰6,000都未出擊(其實平倉的已經當係,所以已賺回200 keke),諗下買乜好先~

今日咁升,我諗唔多唔少都會升返一轉,炒炒貢應該會搵到食嘅,試試啦~

兩條腿走路啦~(呢句野都唔知邊個諗出黎嘅,行路唔通一隻腳咩....)

發表時間:2011年12月1日 | 評論 (0) | 全文

大合唱

前日平倉工行(1398)大吹大擂完之後,昨天爆炸還原基本步,諗住又要寫中晒招之際,夜晚突然黎一個聯盟大合唱,今日實行升爆廠都得喇。

cup 認為,16,000見底機會很大。佢對巿場觸覺真係好敏銳,時間掌握得好好,睇黎文仔要認輸機會都唔細喇呢次....

12月1日係第一個交易日,文仔又出左糧可以買野,固定投資金利來(533)唔少得,另外都唔好浪費左機會,今日一於都入巿炒炒貢啦~

昨晚睇住個adr 升足800點,睇怕呢次都唔會咁易罷手,升返上20,000點機會都幾大。

但老實講,其實我真係唔係好明白,點解可以升得咁勁。睇返啲大合唱歌曲,主要係咁:

直至2013年2月調低美元低50個基點,即係易啲借到美金,但問題係:1. 去到2月咋喎。2.借到錢又點呢?問題真係解決到?
即使2008年出qe,借到周街都係錢,美國的問題真的解決了?
中國調低RRR 0.5%,影響力有幾大呢?又係借多左錢出街,可以幫到經濟幾多?
巴西減息0.5%,呢個消息基本上同樓上二者差好多,因為無人留意,對於升巿影響有限,但實際效力可能大過上述二者。

所以,事實係咪真係咁好同真係可以無晒事?文仔係有保留的。即使最後歐洲真係qe 埋,時間又延長了,過多一兩年,可能又黎過一輪海嘯呢。

不過時間睇得太長,一切都會變得無意思。十年二十年咁睇,香港未試過熊巿,只有牛巿,這是沒有意義的看法。

現在睇得太淡,可能真係好容易失敗。一向主張淡淡淡的文仔,幸好有瘋子兄的交流,建立了固定投資的方案,即使睇錯邊都無壞,點都有最後的根源,唔會連根拔起。

自寫blog以來,學左好多野,同時亦證實左一樣野,就係文仔的燈神地位。如果我是一支燈的話,請大家就將我寫的東西調轉看啦 haha~ 這也是一種貢獻呀 haha~

今日,殺入去買野,短炒一轉先~

發表時間:2011年12月1日 | 評論 (0) | 全文

平倉

11月29日

文仔近來忙到甩碌,經過一個周末,發現世界真係好大,開會被片到遍體鱗傷之後,實在覺得自己要急急急急起直追,所以唔可以花費太多時間好似以前咁跟巿同寫blog了 =(

不過,文仔係唔會放棄投資呢項興趣嘅 =D 不過,用懶散少少的方法吧。

言歸正傳,今日平左工行(1398)的倉@4.32。當初諗住3.77先平倉,但見個巿跌足八九日,無理由唔反彈,所以見佢升,就諗住買野。諗黎諗去都唔知買乜好,最後決定平返工行個倉,食左4.77-4.32之間的差價,順便炒炒貢。

一買返,即刻跌落4.29@@ 以為自己中左招,心態轉為平左倉賺左差價算數。點知下午返屋企,又有料到喎~

所以唔計到盡,有時都係一件好事。

近來好多公司都出左業績,文仔都無時間細看。關蛇兄寫左幾篇回應,好中肯好有用,大家可以參考下,文仔又學到野,謝謝你關蛇兄~

文仔都寫返幾隻字:

信星(1170),預左佢跌,因為工業難做。開心的是,派息照舊唔駛減,現金價值仍有0.77,等佢跌到0.8咁上下可以買下。零售繼續燒銀紙,不過燒少左好多(信住先啦呢期,下期可能又爆炸....)

慕詩(130),當初揀都有諗過,事關佢現金高派息高盈利ok,但佢不務正業,所以最後揀左包浩斯(483)唔揀佢。點知世事就是如此,包浩斯有邪人入侵,加上內地消費力下降,瓜左;慕詩呢,炒樓炒完一次又一次,次次賺,派埋特別息,問你死未?

波司登(3998),盈利勁升,但派息減喎,咪理,照升爆。雙登大戰應該要慘敗了。

銀基(886),盈利勁升,但唔派息添喎。咪理,又係死唔去。

漢登(448),盈利跌,但加派息喎。盈利跌,咪跌囉。

總之呢,睇完一大堆野,做完一大堆分析,好似都無乜料到,好無癮咁囉.....文仔有點意興闌珊.....

發表時間:2011年11月30日 | 評論 (0) | 全文

長江基建(1038)

登登登櫈(唔好燈喇!你重唔夠燈咩!),關子開估了,今次主角係:長江基建(1038)
今日有少少時間,zip 上黎寫返一篇股評,好耐無寫過了。

話說,當日偉哥重倉之一的長江基建,實在其鋒難當,一口氣升到上50,得個睇字唔敢追,家下巿況差,隻野都叫跌返啲,又可以睇過 =D

睇完偉哥的分析,其實拎左呢隻野的核心來做,基本上唔太難搞,一於用黎寫多次,實習一下 =D

首先,講講長江基建係咩股黎先。文仔認為,長江基建乃係掛羊頭賣狗肉的公司。事關,呢隻野唔係基建股,而係公用股,更準確黎講,係電力股。

點解咁講?因為長江基建現時盈利來源主要在三個地方,1. 香港電,2. 英國電,3.澳洲電。咁重唔係電力股?

玩數字之前,要拆解長江基建先要睇一睇電能實業(0006)。

電能實業,之前叫做港燈,可能係唔鐘意「燈」呢個可惡的形容詞,所以改左名。(李大巨:請不要將人家和你自己相提並論!)

2011年中期報告寫住,盈利係:
香港以外盈利:22.75億
香港電燈盈利:17.46億
香港其他盈利:0.35億
共40.56億
股數:2,134,261,654股

香港以外盈利其實主要集中於英國的盈利。港燈擁有英國UKPN電廠的40%股權,而呢個盈利佔左其中的大部份。
UKPN首9個月盈利貢獻是27.05億,除返開9個月乘12個月,全年就會係36.06億。

香港電燈的盈利:
06年 61.73億,07年67.27億,08年70.08億,09年(變身成電能實業)46.46億,10年46.59億
由此可見,每年都係持平/約略上升。
假定今年都同舊年一樣,賺46.59億

咁即是話,電能今年的盈利是:(無視一切其他盈利)
36.06+46.59=82.65億

除返股數,每股盈利就係3.8725,現價59.35,PE = 15.32倍

明明話講長江基建,家下又港燈,文仔你先係掛羊頭賣狗肉喎!咪住咋....黎緊黎緊....

長建2011年中期報告寫住,盈利係:
電能實業盈利:15.64億 (話說,長建乃係擁有38%電能實業股權的公司,故可分38%其盈利。)
英國組合盈利:18.79億 (話說,長建及係擁有40% UKPN電廠的股權)
澳洲組合盈利: 6.94億  (話說,長建係擁有澳洲配電項目包括 ETSA Utilities、CitiPower 及 Powercor 的盈利,其中1.45億是賣左野的一次性收益)
內地組合盈利: 2.15億
加拿大盈利:    0.52億
紐西蘭盈利:    0.26億
基建材料業務:1.62億
共45.92億
股數:2,338,709,945

由上述顯示,長建盈利比重是電能(34%)、UKPN(41%)、澳洲(15%)三者加上而來,佔(90%)
重唔係電力股?

剛才計算過,電能實業全年盈利82.65億,38%就是31.4億

UKPN 就是36.06億

澳洲業務:
09年 8.05億,10年10.26億 (新野黎架喎)
當今年亦持平,10.26億
 
咁即是話,長建今年的盈利是:(無視一切其他盈利)
31.4+36.06+10.26=77.72億

除返股數,每股盈利就係3.323,現價43.75,PE = 13.166倍

又睇埋中電(0002)丫
2010年全年每股盈利 4.29,當今年全年升10%(2011年中期盈利跌2.04%),即是4.719,現價69.45,PE = 14.71倍


三隻比你揀,揀邊隻?


寫完三隻電力股,其實上述一大堆野乃係假的 XD

原因
1. 電能實業香港以外業務唔只得UKPN,重有第二啲嘅,加埋其他業務都比你一概無視,好過份啫,又估人地全年無增長,搞到人家15倍PE,我不依啦!(嘔....)
2. 中電盤數,你咁計一計就算喇?兒戲左啲掛?可能人地今年好勁增長呢?前景好好呢?家下又話要加成5%電費喎!

不過我還是覺得,長建是較好的選擇 =D

1. 電能實業好,長建都好,因為佢有38%股權。
2. 據說又有個英國水廠買左返黎,呢個應該都有錢賺的。
3. 計長建啲數字一樣hardish (一概無視的部份都有唔少),但都贏喎~

咁,長建值幾錢?

偉哥嗰時話,呢類股票用10-15倍PE估值,但近來巿場似乎用左較高的估值(如中電及電能都15倍),故以15倍PE 作估值,大約50元。
文仔認為,呢個估值對長建應該仍然準確,所以現價仍是低於價值呢~

不過,長建乃係地產霸權,加上1手要4萬幾,文仔就唔會買lu,睇下大家有無興趣啦 =D

ps*(補充@11月24日) 查一查,UK Water 的情況如下:
UK Water 由長建、長實、長實基金會三個單位買晒,分別佔40%、40%、20%。
UK Water 年度溢利22億
由於收購日係10月中,所以長建可分派2.5個月的盈利:
22/12*2.5*40% = 1.83億
數字咁細,無視左佢啦 haha~

發表時間:2011年11月23日 | 評論 (0) | 全文

中晒招

話說早兩日,寫左一份出業績的post,其中一隻係文仔發掘自身又幾喜愛的股票叫做包浩斯。出post唔夠兩day,隻野即刻出盈警!

駛唔駛燈成咁呀.....

諗住隻野由1.9升到3蚊,有得叻返次大吹大擂一番,點知又中晒招,直頭係slap on my face 呀呢個盈警。

發生咩事呢?

話說,很久以前,文仔寫過包浩斯的股評,湯兄大駕光臨留低左幾隻字,「主席跟左壞人」。

文仔諗,有邪人入侵,都未必一定衰嘅,如果一直都經營良好,邪人都一個污點,唔會影公司太大。但事實係,文仔太天真太傻鳥。

邪人一入侵,即刻就開波,從此此股變成幼萬股,買左永不超生。炒到上3蚊,出業績前一個星期先出盈警,擺明炒高散貨啦...核突到呢....

webb哥仔最近重增持到6%樓上,呢舖睇佢會唔會大鬧天宮了。

所以話,千萬不要買著幼萬股,中者必定周身蟻。

最近睇生果日報,講起天山彤老,真係好認同。周大叔上巿,成30倍pe,咁嘅巿況都可以30倍pe,重唔叫做貴,真係夠威勢。但筆者講嘅重點好有意義:姑勿論30倍pe貴定平,最重要係唔會再受坤了!十大惡人之首,真係當之無愧。呢個專欄雖然質素未必最好,但講的都比起吹呢隻吹嗰隻來得有意思,最少肯講啲真話。

近來大巿南行之勢都似乎走唔甩,文仔重未收到六千,可以買平貨 =D 不過如果比我揀多次,我可能揀等埋佢嗰200,反正買了都要向南行,得個蟹等,收買六厘先買一來一回應該有著數多啲。唔緊要啦,早買早享受,遲買多折扣 =D 望就望3月出業績除淨埋到4月升返,咁收息就著數過200蚊了 =D (無得計到咁盡嘅~)

好鬼多野做,寫blog都寫少左好多,遲下得閒先再黎料 =D

文仔其實有一篇股評想寫,不過要有時間先出到。可惜的是,已經錯失一點點機會了。不過小豬兄講過(唉...又一位前輩停筆...)價值就係價值,所以無問題啦 =D (係關於邊隻?賣下關子先=P )

發表時間:2011年11月23日 | 評論 (12) | 全文