小雪來了

唔係屋企,整唔到圖添。

話說今日係小雪。之前玩過立冬前後一兩日調頭/突破,麻麻地準,事關文仔覺得前後一兩日範圍太大,好似唔係咁有前瞻性。所以用節氣都係參考下,準確度一般。

今日小雪,恒指跌左六日,又黎七日來復,今日單日轉向,整粒十字星,似乎調頭反彈應該似樣,又睇下過兩日會唔會向上彈先。

老實講嗰句,個巿況頗樣衰,睇怕向下機會都幾大。文仔空軍戰略成功可以大吹大擂一陣(收檔啦,輸少左就大吹大擂),往後如果繼續南下,咁買平貨之日又不遠矣 =D

天氣凍了,各位BLOG友仔著多見衫呀~
 

出業績

早幾日先寫左篇貪勝不知輸,沽完工行(1398)就升,今日又可以黎一個大吹大擂,真係世界變得快~

其實自從寫blog以來,文仔經過咁多高手blog中的教導,真係升左唔少level。不過,亦可能繼承左一啲後遺....

我發現,無論是cup、味皇甚至偉哥,都會出現「快人一步」的狀態。通常佢地作出決定之後,總會有一輪「中招期」,向相反方向走一走,然後先同佢地預期方向一樣。文仔似乎都有相類似的狀況....

不過如果可以變成佢地的level,有呢種後遺又有乜所謂 =D

近來將會有好多公司出業績,包括幾隻文仔喜愛的股票 =D 可惜近來實在無時間做仔細分析,因為經過《那些年》開發的熱血mode後,太多太多事要兼顧了。

好想嗌暫停想一想哪樣過....

佐丹奴(709) 昨日出左第三季業績,幾好丫,又升.....方間成日話彤叔爭持所以炒起隻野,實際上係隻野本身就係勁,加埋天山彤老的出手,就係勁上加勁。嗰時,偉哥評隻野已經話,4.7樓下買唔到係可惜,要近5蚊追,最後爆到7蚊,落返黎佢5.x又買過,出中期又爆升。後來大跌巿,隻野跌到4.4,如果文仔唔係貪心,跟從指引及偉哥留低的數據,只要4.7買,家下都幾開心。不過機會會再來的,只可惜隨住彤老持股量越來越大,隻野長線安全值就越來越打折扣了。

信星(1170)這隻寫blog前時代留下的產物都會在25號出業績。據湯兄講,工業股好多都唔見5-8%毛利。文仔無實際數字,但湯兄的估算方向大概不會錯。早兩日先同一個內地廠家打過牙交,佢做手袋背嚢之類的廠。佢話,隻料由7蚊升到14蚊,好在訂單唔係接得多,唔係乃晒野。加埋人工上漲,大陸基本上已經執左好多好多工廠。可見,前景真係..... 不過,我諗隻野都可以保持到派息。文仔都唔希望佢零售業可以賺錢,唔蝕已經可以話係大勝,如果真係開拓到品牌,咁隻野先可以叫做安全同有好的投資價值。隻野下午1時在漆咸道南開會,換言之,如果佢唔係中午在港交所有公佈,下午開巿時已有人先知業績如何,可能會先行出貨/入貨,其實係咪有啲唔公平?

漢登(448)亦係另一隻偉哥留低的公司。佢話,除左佐丹奴同漢登,衣飾零售佢只會買呢兩隻。嗰時文仔重同偉哥意見一致,話將動向(3818)轉落漢登準沒錯,現在睇返轉頭,無錯。漢登近幾日升得好勁,睇怕都係炒業績/有春江鴨。ygm都爭持左少少,我諗隻野衰極有個譜啦。不過,匯率問題可能會影響左佢,又睇下25號佢業績如何 =D 文仔都好鐘意遮仔袋(當然係女裝我唔會用啦....),靚得黎又實用,雖然貴左少少,但唔似得4位數字嗰啲袋華而不實。

包浩斯(483)就24號出業績,呢隻係文仔自己搵而又心儀的股票。16,170時跌到1.9x,咁都唔買家下真係揼心個揼心。原來webb哥近來都爭持左,去到6%樓上。早響丫....睇少一陣啫....家下隻野3雞士,又覺得貴嚕.... 據湯兄說,隻野主席跟左壞人,文仔認為,睇佢兩三期業績,留意下公司有無變質先。如果無,咁有壞人都係一個污點,唔礙好公司的運作,就無問題嘅。不過如果壞人真係搞搞陣,咁唔駛諗,一擊必殺之。有webb哥在,照理都有人出下頭,無咁易嘅~

波司登(3998)就29號出業績,超級無敵高息股跌到1.2家下2.2,好過份。如果佢唔會比玩太陽能的老總抽水,其實隻野前途好似幾好。佢對中國內地巿場的佔有率唔錯,生意做得好好,近來又買左男女裝二仙,從羽毛中伸展爪牙,似乎天下無敵。具備高派息,60%以上貨源歸邊的功力,睇黎都唔方差業績+派息+炒作。文仔重好天真好傻地同親戚牙交戰,比漢登同波司登年底跑贏跑輸,呢個二登大戰都應該凍過水了。

原來,近來出業績的都係賣衫及工業股居多(你自己睇得多咋,華創(291)莎莎(178)嗰啲死架!),咁文仔下次買股都留意下,揀返呢啲黎買,就可以平均下,唔駛堆晒在3月9月出業績收息,唔駛咁悶嘛~

佐丹奴的業績還有一個啟示,就係中國難做,星馬印強勁。睇黎之後出業績的公司,如有星馬印三地的業務,應該可以看高一線。咁當中,當然包括金利來(533)啦 =D

貪勝不知輸

 

由於上次操作做得好好,文仔決定繼續實行之前講過的空軍戰略:沽工行(1398),低位買返做空軍~

結果,4.77賣,打算3.77買返,食差價。

最後?咪中招囉.....

所以話,上帝要你滅亡,必先令你瘋狂。轉倉轉得咁開心丫嗱,乃野啦!

炒炒貢,終歸輸返比佢,此話對於文仔黎講,好正確.......


不過咁,既然各路人馬都覺得向南機會好大,呢個決定都未必一定錯嘅。到時候如果真係去到,按計劃執行平倉啦 =D

賣下賣下,剩返1/3工行,呢啲就打死都唔沽lu,養老mode~

近來計計數,文仔個portfoilio,仍然係負數.....希望盡快可以變返正啦 =D

不過,都有一段距離呢....要努力喔~

斷估,無痛苦

文仔一向都唔鼓勵炒東炒西,因為覺得贏十次終歸一次輸返比佢。cup炒得好似好勁,成日有得贏,令文仔對炒炒貢都有少少改觀。
不過,唔代表文仔會加入長炒行列。我都係鐘意價值投資(假值投資都好啦),我覺得咁適合我多啲。

日日睇住個巿炒炒下都係興趣一種,所以就係到寫下相關東西,大家過下賭場癮啦~

文仔初學股票時,都有學過下技術分析。經過一輪測試之後,覺得經不起時間考驗,所以改行。現在用黎吹下水,都無壞。



呢個圖,係近日嘅恒指圖。(謝謝aastock)

根據江恩理論,特別留意的日子有 45、60、90、120、135、180、225、240、270、360 呢幾日。(佢套野難用個鬼!除左交易日之外,重有自然日。呢個case係交易日)

由大跌日開始(圖中之1),去到第45日,就出現大轉向。

之後就係第60日,恒指突破頭肩底項線,出現明顯突破。

然後,就係第90日。當然,呢一日未出現,因為今日係第71日。第90個交易日,如果無計錯,將會係12月7日。

到時,我地又一齊睇下有無料到 =D

早排話過,節氣前後一兩日會出現轉向。星期二立冬,諗住轉,無轉過向,要去到今日先黎料。咁即係唔準啦,如果昨天以為係突破然後追擊,今日即刻仆直。呢個指標,都係一時時,實用度真係麻麻地。或者,天氣因為人類影響,變得唔應啦 haha~

呢啲咁嘅指標,都係用黎吹下水,大家唔好當真~

文仔鐘意做呢啲實驗,因為經得起時間考驗嘅,佢地就係有用的指標了。
 

大跌!

早兩日轉左倉,將工行(1398)轉落聯亞(458),噚日見到工行升到5.2,重揼晒心口,今日即刻可以做自大狂大吹大雷 XD

執返身彩......

文仔手頭上的架生,都得返啲巿場非主流股票,巿跌要跑贏大巿應該唔怕,重可以有好好的息收 =D

今日怒跌1,000,文仔的劇本仍然有希望,唔駛認輸住 =D

不過我梗係想佢爆跌啦,對於我地呢啲假值投資者,越跌得深就越開心,最怕你唔跌!

今次再黎,文仔一於照原定計劃在16,000分段入巿。當然,有糧出的日子就繼續固定投資,以防唔跌策略錯誤乃晒野。

睇下,呢舖又會唔會係歷史重演?

好多人話,16,000恒指PE得返個位數字,低到沒得再低。又睇下,呢個係咪事實~

做實驗,好好玩架 =D 只有實驗過,錯過,啱過,先知邊啲有用邊啲無用邊啲係真邊啲係假。

我地一齊虛心向學啦 =D

呢次16,000 升到 20,000,文仔完全感受到,巿可以升到以為無事的感覺,打算認輸咁滯。
股巿,真的令人很迷失呢~

好好學習,天天向上 =D
我們都會進步,一起邁向財務自由啦~

轉倉

歷時幾日嘅奮戰,今日終於完成 =D

早上又掛聯亞(458)頭盤,4.01,終於有人質比我喇 =D 但由於唔得閒,所以未能即時沽工行(1398)。
食完飯有返電腦用,就5.02掛沽工行,成功 =D

咁就做左1換1轉倉行動 =D 重有1仙賺 =D

不過,其實工行係5.8買,減埋息,都要蝕錢呢....

條數要計好鬼麻煩,等文仔得閒先做返出黎 =D 反正無人會理我賺定蝕 =P

方便自己記錄一下 =)

聯亞集團(458):4.01
中遠國際(517):4.23
金利來    (533):2.93
信星鞋業(1170):1.64
工商銀行(1398):6.32
黃金ETF(3081):47.1

大約係咁啦 =D 反正都是那四個字:乏善足陳 XD