Chain Reaction

今日行動名為Chain Reaction,結果....失效....

話說今朝繼續望天打卦掛聯亞(0458),由於一開始4蚊比人極速掃走(1min都無...),文仔做頭盤就掛4.01。等下等下,工行(1398)就繼續升個不亦樂乎。文仔就咁諗喇:

5蚊賣工行,4蚊買聯亞,中間嗰蚊可以補錢換信星(1170),咁就剛剛好。

於是,就制定左chain reaction 行動。買到聯亞,就沽工行同買信星。

睇下睇下,文仔見到有人掛聯亞4.02,爬左我頭...文仔見工行5.04,就改掛聯亞4.03爬返佢頭,過左無耐,爬我頭的小朋友(凱基@20k股)又掛返4.03喺我後頭。但係,賣嗰個仍然係4.05.... 等了又等.....

等下等下,工行升到上5.05,咁文仔就打算出工行4.05買聯亞。竟然....4.05的聯亞一個交叉盤比人食左...(匯控架,玩野呀...左手交右手....唔係嘅話文仔已經行動左)

4.05之後的聯亞,係4.1.......

又等又等....

等下等下,始終等唔到,但係聯亞突然開車,有人怒掃4.1,結果要4.15先有得買。文仔越來越遠.....

凱基的小朋友結果急不及待,再掛高一層,已經去到4.06喇。文仔已經進入放棄mode.....

竟然!竟然連4.15都比人掃埋!要4.2先有得買!

kuso.....

凱基按奈不住,掛到4.13,但都無人放。重有人4.2都掃埋,升左5%!! 要4.25 先有得買!!

有無搞錯......

但無幾耐,賣盤出擊了。質質質,由4.17開始,質落4.15,質落4.13,再質落4.1,有幾多殺幾多.....

結果,凱基小朋友就咁收左貨

然後,就由36k買盤@4.05 vs 36k賣盤@4.1,直至收巿。

工行,成日都無上過5.1,所以.....

文仔,仍未買貨。T_T

故仔講完~

今日工行似乎受到100天北回歸線的結界限制,所以無得再行。
寄望下星期一工行同聯亞啲價錢可以調配得好啲,咁就可以繼續進行換股計劃。不過聯亞易升難跌,升到4.1 真係有啲頭痕... 好在近幾日工行都行得比聯亞快,文仔都叫做著數左 =D

據說,節氣前後兩日有機會係轉折點(75%成功率啦)。如果,立冬真的轉勢,咁星期二就應該係轉折點。周一再上周二始跌嗎?一話節氣效應失效?

家人的金近來升得唔錯。文仔當初無跟cup沽金反買的獨立思維成功左。當然,如果唔係買金轉而買股,成效可能更佳。但如果追錯股呢?所以文仔覺得已經ok,無話邊個好邊個唔好,只有適合同唔適合啦~ cup選擇左沽金買股(如果佢唔沽金又買股呢?更勁?),咁佢亦的確係賺到更多(掛),如果硬係要分贏輸,咁佢贏啦 =D

文仔唔care~ 每個人都有每個人的步伐嘛 =D 愛跑步的我是這樣想的 =)
睇cup的blog,成日都會見到人抽水。今日ckm sir 講起中人壽的三個原因,對面就有反對意見。文仔就覺得無野好講,為反而反,都唔真係諗下野嘅。所以,我實實在在回應ckm sir 的blog,留言認同佢睇法。

講起北回歸線,文仔近來入巿的金利來(533),啱啱過左100天北回歸線,再下一條結界就係150天。老實講,文仔唔係好信呢啲咁嘅結界,不過有得講又拎黎講下啦~ 如果係咁,金仔應該好快上3.15-3.3的了 =D 係咁又好喎,文仔唔駛做燈神 (講完之後咪做囉 =P)

點都好啦,有咁嘅價值就有咁嘅價值,終歸有一日股價會去返價值的level,我是這樣相信的,這就是價值投資。

當然,文仔亦唔會忘記被動收入財務自由的方向。所以金仔有7厘幾息,聯亞亦然 =D 文仔試圖一直增加被動收入~

星期一,睇下咩環境再作打算 =D

味皇兄去完旅行返黎,又有野學了 =D

發表時間:2011年11月4日 | 評論 (0) | 全文

Deep V

今日出現 Deep V mode,殺左文仔一個措手不及。

隨著越來越多人向見底靠攏,文仔都開始動搖。

唔通呢次真係要認輸?!


講返今日,文仔繼續望天打掛,掛聯亞(458)頭盤,3.98。結果,掛足一日,又係得個吉......

但係,工行(1398)就怒彈,收巿差唔多5雞添喎。

計計條數.....

文仔買工行係5.8左右,如果現價聯亞4.05,要升上5蚊唔難。咁其實同當初差不多,轉倉都係一換一的等價交換。

明天直入直出?

文仔又諗,假如個巿真係無事,工行行得應該會比聯亞快好多,最少聯亞要出業績先會有人留意多啲(睇我日日旱災望有兩滴雨落落黎都知啦...)。如果係咁,持有工行似乎比持有聯亞更具時間價值。當然,如果個巿係怒跌的話,就當然係拎聯亞比較舒適,最少佢上次比起工行跌幅少好多。

所以都在諗......

大家有無乜意見,比個意見文仔丫 =D

發表時間:2011年11月2日 | 評論 (2) | 全文

出擊

之前話過,11月就開始固定投資買野~

今日係11月1日,就出擊啦~

下午見到金利來(533)買賣2.96 vs 3.03,於是就掛2.97。
頭盤嘅文仔,最後就梗係買齊啦 =D 嗱嗱嗱,咪話文仔唔比面,又chok 爆佢比大家入巿喇,燈神出手,保你無憂 XD
點知收巿重有得升下氹文仔開心,真搞笑~

其實個巿升左咁多日,隻野又升左咁多日,而家買諗返轉頭都有啲笨。不過……

小豬兄話齋,價值投資就係投資價值,唔會因為巿場價格升跌就改變。的確,文仔認為金利來係唔只值3蚊,大把水位。
成日睇埋一堆二堆話價值投資無料到的物體,文仔就唔信邪!即使我係假值投資,我都要試下我嘅假值投資最終係咪真係賺唔到錢。
金利來係文仔的重鎮,無理由唔撐場~
我就係要試試!如果自己都唔覺得佢得/嘴砲一輪算很數的,話比人聽有幾成功都係無用。

嘴砲是不能殺敵的啦!

所以我來也,上車!

而且,做人係應該要有誠信嘅~
瘋子兄,我來也!我又再養一隻8%被動收入的怪獸喇~

之前講過,會將工行(1398)換落去聯亞(458),當時工行乃係5雞,聯亞就係4.1-4.2左右啦,今日工行得返4.75。
如果當日文仔直賣工行@4.98 換落去直買聯亞@4.1,咁計返開,而家都重有著數。

所以話,真係要啱timing先得。
錯左timing又點呢?
其實都無變過,文仔的步伐仍然一樣。就係乞股mode....

乞左三日,仍然無人施捨丁咁多多聯亞過我,所以仍然未賣工行。等到有一天,工行升返,文仔可能考慮兩者直質直攞的方案。
不過暫時直質工行似乎唔係咁明智,所以hold 住呢個策略先。


近幾日,睇到唔少評論+埋個巿的表現,文仔都開始會諗,自己係咪真係睇錯巿?如果係,都幾頭痕.....

不過點都好,文仔一直維持適量的保險倉同現金,睇錯巿的話都有固定投資,現金方面最多當儲住錢,應付遲下巨大的開支。

睇啱就當然好啦!文仔一向望跌唔望升架 =D

過一排之後,等文仔執執啲數字計計數,點下文仔基金點先。不過未來減持工行嘅行動,好可能會帶來虧損了。

發表時間:2011年11月1日 | 評論 (0) | 全文

錯晒~

恒指繼續怒升,文仔本來計算的19,200 已經灰飛煙滅,事實證明,錯.晒!

近來越來越多聲音話已經跌完同見底,文仔仍然半信半疑。可能係主觀願望?或者啦... 但我仍然相信呢次係反彈多於無事。

好在文仔之前無沽清所有貨,仍然留有一堆保險倉,以免自己睇錯巿得個吉。而家都總叫有啲渣拿。

不過又錯失左一個咁好的機會啦。

近日都不得不佩服cup的厲害,時間掌握得好好。佢轉身快,下決定爽,實在抵佢賺。以前文仔總覺得炒炒貢終歸中伏,但cup的方法就係一個反證,所以實在值得睇睇。不過咁,文仔始終都覺得,每個人有每個人的方法,適合佢唔代表適合我。我都係鐘意買落慢慢等佢收息收息。

小豬兄講得啱,價值投資就係價值投資,隻股有咁嘅價值就有咁嘅價值,係唔會因股價或巿況而改變。所以,文仔再foucs on 股票的價值,搵下升左咁多日重有無股價低過價值的股票。原來,重有唔少。

文仔講過,19,200 沽工行(1398)做空軍,其實我唔係想fake大家,但時至今日仍未沽 =P 原因係咁嘅...
話說早兩日,文仔正打算沽部份工行@4.7換入去金仔(3081),點知就比家人封殺,話我燈,唔准買。結果佢地就買左金,我就郁都無得郁...
咁唯有放係到啦。
放係到又有放係到的好,事關工行出第三季業績,果然係具有中國特色的財務報表,又雙降,都唔知壞乜帳。鬼佬的確係估極都估唔到點解架 haha~
結果?炒爆~
文仔同家人就雙贏,事關佢地啲金都升左~
昨日工行炒到上5蚊,文仔仍然希望出貨,原因係工行佔portfolio比較重,而且每年利是投資計劃將會不斷增加工行的投資,所以唔希望太重倉,換換馬。於是,文仔就掛聯亞(458),事關味兄買入價仍在此價之上,而且呢隻野價值有排都未反映,大把水位。
但掛左成日頭盤,都無人施捨下發財錢。掛足一day,又收唔到貨....
買唔到野,咁當然都無出到工行啦。
今日繼續,又重演昨日情況....(今日重衰,全日零成交...)
係咪真係咁缺貨呀.....
如是這,文仔呢幾日都無出到啲工行,亦買唔到聯亞......

文仔打算星期一再黎過 =D 如果11月都未買到,就考慮下直接攞啦~

星期二就係11月嚕。文仔出左糧,係時候做瘋子。唔理價,到時買返1,000股金利來(533)先算~

發表時間:2011年10月28日 | 評論 (0) | 全文

固定投資

 

今日恒指收係19,000樓上,又有熊被殺。

基本上,呢幾日恒指已經去到核突頭肩底的頸線,基於殺熊行動的關係,文仔相信佢係會升穿頸線繼續升。
不過唔緊要,最重要係佢遲早跌返落去,文仔呢個信念重係好強~

早排話,升到19,500點就沽工行(1398),換金。其實早幾日真係好想做呢個動作,但係基於文仔的燈神能力太強,於是比想買金的家人封殺左。
結果,佢地買唔比我買,最後升.....

算啦,佢地賺同我賺都係一樣好事,最多我唔買金囉....

如果真係升返上去,文仔仍然會打算沽工行,到時可能搵第二隻股轉,到時先算。

近來諗到嘅反而係,有返人工,都係時候每個月買返啲野做下固定投資。成日估估下無行動乃係文仔最失敗的地方,要克服呢個缺點,就用最簡單同機械的方法去做就ok啦~
所以,文仔打算每出糧後都買1次金利來(533)。入場費平,息高,買多買少因時制宜~更重要係,金利來股價有排都未到佢實際價值。

文仔都要加入瘋子行列,增加被動收入 =D
發表時間:2011年10月26日 | 評論 (7) | 全文

又升

今日恒指又大升~

恒指圖,雖然核核突,不過都叫做一個頭肩底,到左頸線,加上要殺19,000-19,500的熊證,呢舖都係開大多。

不過,文仔仍然認為大巿會再度向下。

cup 近來以大多數人看淡認為巿未必太壞,文仔都喜歡呢種相反思維,經驗上的確在炒股乃係好有成效。然而,文仔並唔認為會咁快轉好乜事都無。

當然,文仔都可能會睇錯,咁就憨居居錯失左一次低位入巿機會。

再看下去 =D 時間會證明一切。

昨天看了《那些年》,現在仍處於中毒mode,輕機左兩日。

這是第一齣讓我有「買多次飛睇多次」的衝動的電影,大家快啲去睇~ 超好睇!

近來無乜心機寫blog,沉醉於《那些年》同工作之中,加上巿況同文仔期望又有出入,所以唔係好積極。

就快出糧,到時再細想一下啦~
發表時間:2011年10月25日 | 評論 (0) | 全文