雜記者會21/10/2011

 

個巿成交咁細,都無指標作用,股仔亂炒,第一視頻(82)乘鳥飛,安寧控股(128)注豬(資)狂,總之炒過不亦樂乎。
咁中移動、匯控呢?
唔好意思,十大成交榜都係恒指瑞信一隻11月到期的熊證……
搞到范巧如都食晒螺絲呀陰公

既然個巿咁,文仔都無乜野想講,索性唔鬼睇慳返時間。

近來睇報紙,又見到某大財經評論員講完金利來(533)又講信星(1170),文仔又係時候講下故仔。

話說當年文仔在電視台做財經節目,發現某大評論員講股同一眾財演與別不同,而且講左後來堅係有糊食,具備前瞻性,於是特別留意。當時的文仔剛剛接觸味皇兄等前輩的文章,發現講嘅都同主流巿場提及股票差距十萬八千里,漸漸明白原來有一套分析方法,係會搵到與主流不同的股票。而有趣的是,某大財經評論員的number降係與一眾前輩有所接近,所講分析方法亦同出一轍。
結果,文仔就開始發掘呢條路,據說這就是價值投資。
然而,識少少扮代表的文仔,見到某大評論員好似好堅,中左好幾舖,就中下number降,試試。
咁最後,某大評論員梗係敵唔過文仔呢個燈神啦。
當時中左的number降有愛高(328),重有信星,而信星的number降到而家重未走。
跟蹤左一段時間之後,發現某大評論員評論完之後,股價係會走高好一陣子,然後當然係從此訓唔著啦。
隨住文仔努力向各前輩學習,慢慢發現某大評論員的不足及功力所限,故漸漸亦遠離佢的number降。

文仔常常跟別人說,如果財演能力係1,某大評論員能力就係15,但各前輩的能力係15嘅15倍或以上。

咁當然,文仔亦一直努力希望成為具備15的15倍能力值之一員,所以都努力不懈 =D

日子日漸過去,文仔開始有自己的主見,半偷半發掘地找出最心儀的金利來。某日,見到某大評論員竟然推金利來!結果?當然係推完無幾耐就跌啦。
今日睇報紙,撞鬼,推信星.....
唔怪得近兩日回升啦.....

不過又咁講,某大評論員用的方法部份同文仔好相似,事關係同出一源,有時候都好難避免撞股。但係,佢推東岳(198)等等,就唔係文仔的style了。

至於,係咪代表佢推的就唔係好野呢?咁當然唔係啦,只係短期會有吹高派貨的情況(天下財演一樣黑),但本質其實應該係好的。

講完故仔,又講下今日的特別野。

1. 行街巡視業務,唔睇唔覺,原來包浩斯(483)的東西都堅貴,兩條褲買到一手金利來有找。比你揀,要2條褲定要1手金利來?跟住行埋佢老死izzue,一件衫可以買1手金利來有找。「買佢公司股票好過買佢啲貨」呢個諗法,從未如此強烈同實在咁係文仔腦入面浮現。所以話,讀萬卷書不如行萬理路,真係有啲道理。
不過講還講,要買包浩斯/IT(999),係需要3條「80/20」褲同埋3件izzue衫,佢公司股票都堅貴....或者文仔係時候去下金利來舖頭感受一下先得。

2. 今日睇到有單咁嘅新聞:

工信部話,頭九個月新接船舶訂單,按年跌左差唔多43%。咁即係話,中遠國際(517)乃野啦.....
雖然話佢唔止淨係呢方面有生意,重有其他,之但係咁搞法,咪即係在所餘無幾的盈利上再減低.....
哈,你咪理,今日隻野升夠7%,問你死未。
巿場,真係難理解....

不過咁,文仔始終認為,隻野有3.6現金,無理由3蚊出貨。所以我係唔會沽,況且得雞碎咁多。


就寫住咁多先啦 =D 諗到乜再寫~
發表時間:2011年10月22日 | 評論 (0) | 全文

觀察名單更新

近來個巿好詭異,十大成交榜一堆唔知乜東東野。成交又細,又唔知升定跌,亂晒大坑,文仔都無乜特別想寫。

唯有寫下自己的觀察名單啦~

早排拋左一堆number降出黎,話會focus on 以下幾隻:
423、2877、536、3888、1883、886、709

而加要有啲更新先得。
1. 423 將會剔走,原因唔係免廢報紙,而係有消息指,公司會用2.2億買印刷公司。家下有現金4.5億,買完得返2.3億,盈利增加係?。
文仔係現金怪,呢個水平唔滿足~ 所以唔買。
2. 709 比世界彤老買左21.6%,成為左單一大股東。唔知隻野將來會變成點,但以往經驗係,十大惡人之一的世界彤老乃係無好野,所以都係敬而遠之算。
可惜嘅係,呢隻係偉哥留低的好野,唔多唔少有點感情.....
3. 536 息仍然好吸引,但係睇個樣都無乜前景,似乎唔太理想。

要再搵搵好目標喇 =D

不過咁,文仔近來都諗一樣野。話說08年的時候,爛容容的股票反而係彈得無限勁的股票。如果今次同08年一樣,文仔係咪應該買返啲勁樣衰的股票呢?

如果係咁,文仔可能會揀航運1919、水泥3323、內房3333(其實我好憎3333,死老千) 等等....

但係,如果呢次係2003年mode,咁就大件事。事關2011-2013 有一大段時間,無得彈,重要2014慢慢升,2017先會爆升,咁買著呢班大帝就中足4-6年招。

所以,可能要好好地計劃下買幾多垃圾同買幾多筍貨收息。

今日寫住咁多先 =D

發表時間:2011年10月21日 | 評論 (0) | 全文

價值投資

近日,個巿升下升下,搞到文仔成日想做空軍。文仔個倉有5隻怪獸,左望右望搵邊隻開刀。

尋找開刀的故事展開後,諗返起小豬兄的話,文仔就有以下決定。

1. 中遠國際(517),好鬼霉,跌極都有得跌。當初諗住4.25 都已經現金價值,應該都無得點跌,點知撞著巿壞,繼續跌。
時至今日,中遠國際出左中期,盤數寫住:5,450,925,000 銀行存款+現金,股數約1,513,530,000,計返開每股值 3.6。現價3蚊。
如果文仔現時沽出517,我除左認為自己係一個白痴之外,我唔會有另一個諗法。
小豬兄提醒左我,價值投資就係知道隻野嘅價值,如果係值呢個價,就係值呢個價,唔應該因為股價升跌而左右到核心價值。
所以,我覺得唔應該沽,況且得雞碎咁多(撞鬼,派中期息40蚊比人收左30蚊手續費得返10雞...)
不過,隻野盈利能力係差呢樣野的確係我要反思的問題,呢樣野之前都講過,交左學費。
另外,當我買入隻野時佢係有4.14現金,何解現在得返3.6?派左息?做左投資?呢個要研究一下。如果當初買入價值係會隨住時間一直下跌,咁嘅話,即係現金買現金好可能都會中招。

2. 信星鞋業(1170),近來湯兄話工業股會無運行,事關毛利率會跌。文仔同意,原因唔係無工開,係人工同成本升得快,好自然就賺少左。
既然係咁,沽之換馬?
現價1.2,年報寫住現金:530,190,000,股數677,310,945,每股現金價值0.78。
對一隻野的估值,1.資產,2盈利能力。資產當然有廠、貨等等,但現在一概無視,眼中只有錢,值0.78。即係話,盈利能力值0.42。
用6倍pe回算,每股盈利就係0.07,2011年全年盈利0.185,即係倒退62%,亦即係去返2008年的盈利。
工業股無運行,無運行都未至於倒退62%掛?

3. 金利來(533),老細呀,7厘幾8厘息,家下個股價同當初買入個價差唔多一樣,沽佢做乜鬼?用黎收息咪算囉......

4. 黃金ETF(3081),cup近日不斷沽,但係文仔就成日諗住買,因為傳統經驗係十月低位入巿,年尾會升。諗住買嘅野,又點會沽?

5. 工行(1398),呢隻堅係想沽佢,因為佢比較重貨,又多問題又跌得急。

經過一輪分析,其實文仔想講的重點係頭兩隻。小豬兄講得啱,如果佢係值呢個價,點.解.要.沽?的確無沽貨的必要。再者,文仔都有現金係手,無為殺錯良股丫。

價值投資者,咪收下息囉 =D

至於工行,睇下到時點啦 =D

發表時間:2011年10月19日 | 評論 (6) | 全文

組合重組?

好幾日無寫過野,係時候寫返兩隻字

做左笨蛋之後,日日睇住個巿升好無癮,於是努力做功課,離開股巿幾日~ 唔覺唔覺,差唔多又到19,200 呢個文仔之前講嘅位置。
有部份保險倉的文仔,之前重話考慮19,200 做空軍,家下都未到就跌返落黎喇。
工仔走勢麻麻地,不過都叫做上返4蚊樓上,可以夠文仔一換一金仔(今日話咁快唔夠喇...),如果巿之後升上去19,200,文仔就將部份工仔轉落金仔到。
金仔近來走勢唔錯,重拾升軌,慢慢升。當然,股跑得快好多,都跌得快好多添。假如文仔係預期佢會繼續深潛,咁將工仔換落金仔到,就將會跑贏返工仔。

不過都係打算啫,到19,200先算~

講起金,近來我發現左一個情況,而終於諗到少少解釋。話說文仔開始留意金之後,就發覺原來歐美開巿的時間,金通常都跌到好平,但係到亞洲開,金又變返原來的價錢。結果買金仔ETF的人就經常miss 左最低位買的時間。呢個現象持續左好耐,近來終於明白。我諗係原於一個故事。

話說歐洲人好等美金洗,但係用歐羅又換唔到咁多美金,結果佢地就走去買金,再將啲金換美金。咁就搞到歐元對金升極唔停,而且往往金跌(因為歐洲人賣金)的時候就是亞洲收巿後的時間。

每年十月,都是低吸金的時間,原因係9月有黃金周,買到貴貴,11月-1月乃係中印兩國大喜日子,好多人會掃定啲金結婚或者過年,所以10月係一個入巿低位。

文仔爭扎左好耐,打算入巿。

其實買金的原因,係想保住值,等巿跌就賣返出黎換入去買股。然而,9月的時候事與願違,撞著拆倉潮。如果再做一次,會成功嗎?

爭扎中……

下周內銀季度業績開波,一個唔好在啲工仔就露斯瑪莉再見,雖然話文仔長揸十年都無所謂,但係有得泊好啲碼頭梗想轉陣(特別係識多左野又覺得有啲更正的投資目標)。

所以,一直諗左好耐。

行動力低仍然係文仔的最大弱點,其實係咪我計得太盡呢?

發表時間:2011年10月18日 | 評論 (0) | 全文

6天過去~

恒指升左六日。
據《周易》:「七日來復」的爻辭,恒指應該差唔多現調整。江恩理論好重視7呢個數字,據說同聖經有關喎,大概係神用七日做世界咁上下啦。

不過呢啲都唔係重點,重點係文仔在過去六日得個睇字,感覺上真係幾傻。

既然無買到貨得個睇字,就當然係四圍觀察下其他blog友仔有咩輝煌戰績啦~

cup 真係好強,連日來放量入巿,入者中中者升,好勁。不過睇佢地回應的討論中,發現佢其實同文仔立場都係一樣,認為現在係熊2。
呢個令文仔反思左自己又係幾咁笨。其實自己一直都有觀察到,而且亦進行左預測計算,估計恒指將會在16,000/14,500出現巨型反彈,並直至19,200/17,400才調頭。現實同文仔一直的計算劇本一模一樣(係差左個120點唔跌落16,000...),但到頭來自己竟然乜都無做過,成件事真係好蠢,直頭係蠢過預算錯誤/失效10萬倍。

小豬兄亦一直入貨,雖然佢無勁平買勁升,但平均計起來一樣好好利潤,佢時間都掌握得好好,而佢掌握時間的方法乃係無方法,因為佢係睇價值。為無為而無不為。文仔睇完之後都覺得,其實我都係睇價值,但係自己貪心又唔守規矩,咪出事囉。往後都要好好實行自己的方針。畢竟有很多好的價值機會在巿場,為了區區細數而錯過了,實在是很可惜。不過文仔仍相信,往後會再出現這些機會,所以現在也不用心急。

ckm 兄入左bb車,近兩日一樣執唔少。雖然文仔對bb車無乜好感(源於很久以前偉哥同味皇都用信星同隆成做過比併,而偉哥係揀左前者),據說公司盈利好浮動,不過事實就係ckm兄的買入係賺左,而且佢對派息仍有10厘的情況是值得留意的評語,所以應該繼續跟進,睇下ckm兄之後會點行動。

味皇兄就一直都係100%持股mode,佢的神威、一仆一碌近日都非常亮麗(其實文仔都好想買呢兩隻野架....貪心....)最近味兄用左股息碌落去集優2345到滾存,文仔就對2345無乜興趣,因為息少股唔係文仔杯茶。所以日後仍然繼續跟進神威同一仆一碌。目標係平過味兄買入價買。

瘋子兄就用6,000買左reits,而且搵緊月供股票,早排發掘的536決定唔加入戰團,因為唔熟唔食。文仔認為呢個做法好正確,揀最適合自己的就可以了。536都係文仔觀察名單之一,但近來都覺得隻野好似無乜前途咁,唔知係唔係路,所以唔參與唔係壞事,反正大把好選擇 =D

blog友太多,不能盡錄~ 寫完之後,希望文仔睇返會記得自己蠢左,要引以為鑒,唔可以再咁傻,唔係有排都追唔到咁多前輩~

寫完閱讀報告,又想講第二啲。

回想早個幾星期,文仔估個巿有機會出現巨型反彈,除左係以08年歷史預測之外,重有另一個因素。就係殺熊行動。
話說早陣子,通街牛牛,最後比人一hit 爆晒頭,死得七七八八,就快要申請成為受保護動物。牛已殺清,要獵食就得返熊仔。結果,文仔一直聽開的「如果想搏工行反彈,可以買12345call」某天突然消失,變成左「大部份熊證街貨收回區都在17500-19000點之間,繼續睇淡的投資者可以選擇23456的恒指熊證」。
嗰時文章重話用黎做下實驗,睇下呢個指標有無效,估唔到,都幾堅。
近日,牛牛又開始建倉,今日聽收音機,據說某某牛證成交重大過祖國移動,睇黎到養肥左牛牛們,又會開始新一浪殺牛行動。

不過,養肥牛牛並唔係六日可以做到的事,所以未來可能反反復復都會升升跌跌,直至時機成熟,熊熊又要臨絕種邊緣的時候,大家就要小心了。

加油!我相信未來還是會跌的。信念不改,16,000再來。

發表時間:2011年10月13日 | 評論 (3) | 全文

開始新一頁

yahoo 個blog 比人抄左家……既然湯兄都叫我過黎寫,咁就過黎啦 =D

之前從關蛇兄口中得悉有一位稱為小豬兄的blog友,文仔跟進左幾日,覺得小豬兄的文章很有sense。

以下是一段節錄(最鐘意無版權的網站 =D 都很大方分享,文仔很鼓勵這些無私研究的活動 =D)

「早前才說萬6點不敢買,萬7點又怕買貴,今天萬八點了,敢追嗎?其實如果是真正的價值投資人,又為何會認為萬7點是貴呢!記得在2萬點樓上時,有人還說當時某些股很平鼓勵買入,但到萬7點時竟然會說怕買貴了,最靈異事件莫過於此。價值投資已死的確無錯,因為連自稱是價值投資的人都在萬6點時認為要等一等才買,價值投資在他們心中的確已死,只有活在口中。還有如果認為未來恆指可以到達3萬點,但萬七點認為會買貴了,不用等到3萬點,今天已經知道這是白痴的想法!

 

無論是萬8點跌落萬7點,還是萬6點升上萬7點,萬7點的價值是不會改變的。跌下來的時候,人們參考了萬8點,所以感覺上萬7點是平了,但相反升上去的時候,人們反而參考了萬6點,因此感覺上萬7點是貴了,這就是參考點心理。真正的價值投資人當然不會受參考點影響,因為無論是跌下來還是升上去,價值都是不變的。貴就是貴,平就是平,不可能2萬點樓上是平,2萬點樓下反而變貴了。

 

正如海嘯時經常聽到的聲音是:"等跌多啲先買啦""等回返先買啦"。結果海嘯後經常聽到的聲音是:"早知萬2點去入貨啦""下次再返海嘯價一定訓身買"。早前一些股已經返回海嘯價,甚至比海嘯價更低價,說這些話的人有訓身去買嗎!沒有,他們只有重複又重複這些說話,正如紙上談兵,口講就天下無敵王道滿天下,但真正發生時就滿腦子都是人性的弱點,什麼價值投資長線投資都會忘記,只有事後才會再次回復記憶,回顧歷史的再次說三道四紙上談兵。」

http://smallpignotes.blogspot.com/

 

 

 

這說得實在太對。文仔這幾個月正正就是這個失敗mode中。這等老散心態實在不要得,小豬兄的話實在是當頭棒喝。如果要對號入座的話,文仔好明顯是其中一員~

 

故此,文仔不可以再不守規矩,一切要依計劃行事。

 

小豬兄今天的文章說:儲錢、儲經驗、儲資產。文仔近來只有儲錢同儲經驗,但做不好儲資產了。

 

不過,成功就是從經驗得來的,在投資的領域上更是如此。錯失了機會不要緊,最重要是學懂。

 

近來功課甚忙,要好好處理生活,平衡一下先~

 

至今,繼續堅持16,000 入巿的大原則。我相信,即使彈至19,200,也只是一個巨型反彈,詳情之前文章已講(不過比人抄左家...)。如果大巿真的回升至20,000樓上,才認真檢討一下吧。

發表時間:2011年10月12日 | 評論 (5) | 全文