一個出身在離異家庭的女孩,憑著一技之長找到中產工作,再加上做果行愛果行 200% 投入而步步高昇

又因為工作關係遇上富二代,最後拉埋天窗,雖然說不上飛上枝頭見鳳凰,也算可喜可賀呷得杯落﹗

奇怪的是,大部份月月聯絡的兒時玩伴和大學 buddy 唔出席喜宴,家中除了老母外,剩姐霉弟都唔出席……翌日胞弟更發出最後通諜,要求二姐立馬回家執包袱到夫家,否則所有物件通通扔掉,母親涕泗縱橫,24 小時內體驗極喜到極悲,真係前世唔收

更盞鬼,是 friends of friends 得悉她泊到好碼頭,第一句並非祝福而係睇佢幾時離婚﹗

其實無他,女孩平時傻傻下,行為 down to earth,相識人總覺得自己優勝過佢,誰知哪一天人家來個大變身,香車香檳馬會包廂等閒事,更能與自己可能一生都 unreachable 的人物交流,內心之不平衡,雙眼實行紅過紅眼症

十零果時見同輩威,就會話:「佢家底好嘛﹗第日出到黎我賺到錢一 X 樣有﹗」

人到中年,不少人就無左呢團火,慢慢地變成妒火,心理扭曲變態的著實不少

最經典一句:「唓﹗佢衰好彩之嘛﹗如果我遇到邊個邊個,咪一樣可以咁﹗」

實情卻係自己放工就吃喝玩樂睇電視 relax,人地放工時間仲忙緊公司野,再唔係忙私幫野

就算大家都有努力,人地間中就黎個賽後你點睇跟手作出修正,自己反覆失敗卻依然故我

屢敗屢戰令人鼓舞,屢戰屢敗引人恥笑

兩種 green eye 雖有分別,但都係五十步笑一百步

呢次唔講冶遊唔論大巿唔寫股票,有感而發而已



邊果打下商業王國,右邊果位打工皇帝