大年三十,黎個翻箱倒篋

有說歷史由勝利者締造,中國近百幾年,由滿清、到割據、到國民政府、到現在既共產政權,一次又一次篡改,令近代史一片模糊

歷史唔會簡單咁重複,但過去卻係現在的延續,利用唔同既史學觀點,將事情立體化,亦有助瞭解當今形勢

初中三年級題目:咩事件令滿清滅亡?辛亥革命,由於四川發生保路運動,導致湖北新軍入川而武昌空虛,混入新軍既同盟會人乘虛而入,然後各省響應,中華民國成立。不足 50 字講了一堆名字,卻略過了社會氛圍以及各類背景人物的活動

光緒雖然推行戊戌變法失敗,卻推動唔少人對君主立憲既支持,當時唔單止讀書人,連放洋回國既軍官,乃至政府智囊都認同,儘管清政府及後既皇族內閣令人失望,但畢竟社會各階層精英都享受緊既有體制恩澤,同孫中山一眾革命者既理念仍然係天南地北

1911 年 10 月 11 日,一批有政治訴求而被鼓動嘩變既新軍唔知點收科,於是發帖招請各界代表開會,找來曾經日本留學又進士出身既湯化龍主持大局,然後再找來新軍協統黎元洪,半推半就下做左湖北都督。黎湯二人來自清體制,亦係立憲派,因為咁而做到最大公約數,為軍政府拉攏最多支持。同一時間,負責清剿湖北既軍團就等候袁世凱意思而按兵不動,結果各省有政治訴求既軍人有樣學樣,湖南、陝西、江西、山西、雲南,一個一個變天

於清政府而言,六省嘩變還未到不可救藥,失去既地方可以靠北洋新軍一個一個打返黎。清政府應無唸到,攞佢命既一刀,竟然來自體制內既三個軍人 —— 張紹曾、吳祿貞同藍天蔚,為左迫朝廷真正立憲,佢地扣起發往武昌前線既軍火,再透過呢個機會聯絡其他北洋軍頭,集體向清廷提出十二條政綱,亦即係灤州兵諫

遺憾既係,皇室並無第一時間真心答應,而北洋新軍亦唔妥協,就算往後真心頒發憲法信條,明眼人已經明白清廷手下無兵,革命黨人亦乘勢混水摸魚,其他省跟隨獨立,手握重兵既袁世凱審時度勢,再補上一口棺材釘,而溥儀只能乖乖住在紫禁城

最後不得不提,文章部份史料,曾參考中社科院近代史所研究員馬勇著作,觀點是否鼓吹變革只能發生在體制內,見仁見智,但政治是光譜,黨內無派,千奇古怪也

附圖為日本大阪印製《清國大地圖》