http://hk.myblog.yahoo.com/ckm001/article?mid=50940

昨日恆指跌391點(-1.75%),收21953點,散戶風聲鶴唳,一時又話美股大跌,一時又話希臘債務危機,投機賭徒最信奉嘅走勢與圖表分析都 認為,現在恆指已經遠遠跌穿250天移動平均線,港股已經跌進熊市區域,我經常同大家講,圖表分析根本無預測大市能力,如果信奉圖表分析,現在應該完全清 倉,沽貨離場,雖然「止蝕」屬廢招,但壯士斷臂,好過死無全屍,不過好可惜,十個有九個投機賭徒都係重倉持股,並無止蝕離場,呢種就係所謂嘅短炒變長揸, 投機變投資,但投機賭徒往往借貸投機,做大孖剪,兼成手窩輪、牛證、垃圾股或當炒股,個市跌多一、兩千點,基本上無險可守,只有坐以待斃。

財棍與二打六會同你講,什麼什麼蝕1/3,要升50%先至打和,如果蝕50%,要回升1倍先會打和,所以要嚴控虧損,吓! 窒住窒住,陰吓陰吓,咁叫賭錢咩,唔識賭唔好學人賭,無預輸清光,就唔好寄望贏大錢,賭神最後一招係「晒冷」+賭埋條命,你身家、性命、財產玩唔起,根本 無資格做成功賭徒。今日你地會話我打落水狗,我一向講得出,做得到,我投機買入隻嘉漢林業(TSX: TRE),入價4.7加元,現價已經輸三成,不設止蝕,下望輸清光,上望倍數利潤,沽神普爾森隻Advantage Plus 基金揸幾千萬股嘉漢,比混水班友食挾棍,股價輸足7、8成都一樣硬食,難保他日沽神反撲,捲土重來。有網友問我港股隻綠森(0094)又點? 你地夠膽賭就同我照版煮碗,唔夠膽賭可以作壁上觀,等我表演咩野叫做投機賭博,呵呵!!