2011-6-16  AD




 

Prada選擇 在港上市,是否受到歡迎,尚未可知,曼聯見獵心喜,又傳話想在香港上市。買呢類大名牌股份,一般投資者識唔識風險呢?好難講。買股最緊要講理性,不講感 情,但買手袋、做球迷,最緊要講熱情,理性可拋諸腦後。聽過黃毓民講賭波未?佢講得非常好,二○○四年世界盃有中國份,對着巴西,你捧邊隊?記得毓民對左 丁山講:「梗係買重巴西啦,睇電視就為中國打氣、加油!」如果感情凌駕理智,幫中國打氣之餘,兼下注中國隊,輸實啦。賭波可下注曼聯,買股票就咪搞咯。

可 惜好多人鍾意與股票談戀愛,理智與情緒糾纏不清,犯上曹仁超所講之投資大忌。前日講商業信託簡介,立即有朋友提醒:「喂,唔好得罪人噃?」得罪乜嘢人,朋 友話:「心照啦!」唔,心照啦,可以講多啲,商業信託目前在香港未有規則監管,新加坡就有,故此和黃分拆碼頭業務為商業信託上市之時,選擇新加坡,當時有 報紙發表社評感嘆香港身為金融中心,唔夠新加坡爭,依家有電訊盈科初步構思分拆成熟業務(即電訊業務,包括電話、數據、國際電訊、銷售客戶器材、顧問業 務、流動通訊等等)成立商業信託,保留至少55%商業信託權益,成為商業信託之信託人/經理人,繼續持有企業方案及媒體業務100%權益以及61.53% 盈大地產。

換言之,如果商業信託成功在港上市,投資者就要考慮電訊電話業務之穩定性及增長性以及派息高低,電盈作為一家上市公司,就持有(一)商業信託至少55%,(二)增長業務如企業方案及媒體,(三)地產(61.53%)等三大業務。

小 股東又點睇?要請教股票行專家嘞,最緊要研究分拆商業信託之後,有冇蝕底到,揸住電盈嘅合資格股東,仍持有(二)及(三)業務,至於商業信託方面,股東會 獲派5%至10%合訂證券(stapled securities),另方面有最多30%合訂證券優先向合資格股東發售,分拆後未來三年,電盈股息維持於0.153元。何謂合訂證券,解釋要用幾行 字,左丁山唔講得咁多咯。最後詳情要由監管機構與電盈傾掂,以符合香港規則。