週末抱恙,本來打算看看寫寫幾隻下跌的持股 (560 / 1700 / 3399 ),結果只能勉強用了少少時間睇朱璇,依家宅低少少嘢。

叫做朱璇嘅其實就真係做船務,副業做港務,三奶先係貨運。以上係從除稅後溢利黎講,如果以營業額黎計,就掉番轉。AASTOCK將佢歸類為航運及港務,但其實有一半以上溢利是來自旅遊及觀光。

貨運一年收10億幾, 除稅後賺得嗰一千幾百萬, 2%以往績黎講算得好盡。港務就是做啲倉儲,咖哩物流個倉嗰啲storage嘢,除稅後溢利20﹪左右,25﹪都好盡(貨運是賺唔多,但我估計貨運同倉儲是一條龍生意啦)。2011年這方面的營業額和溢利大增。

至於主業,除稅後溢利近年攀升也是盈利上升的主因,2010年開始搞客運,直至2011年,一年都是搞60M左右,除稅後溢利率是50﹪。2012年中接埋金光渡輪啲生意,下半年生意同比升50﹪左右,13年年頭又俾央視報導,生意再上一層樓(可能是澳門生意為主),仲盈喜埋。

呢間嘢的母公司是廣東省航運集團有限公司。朱璇轄下公司分兩種,一種是全資附屬,另一種是非全資聯營,其實大部份都是阿媽嘅資產,朱璇係窗口公司。年報每年“聯營業績”是唔穩定的,我估都是睇住聯營邊間好賺就買起邊間。阿仔俾錢阿媽,阿媽賣啲嘢俾個仔,但係自己又係阿仔嘅大股東,阿媽拎住啲錢又係廣東省買嘢,都是變相將自己啲資產上市。

既然是阿媽的窗口公司,呢種上市公司總有注資的憧憬,我最憧憬嘅就是阿媽將啲房地產及管理業務射落黎。港務倉儲呢啲嘢雖然係一地經濟的脈膊,寒暑表,但係呢啲業務本大利少。從股東利益黎講,最好就將啲碼頭拆左佢做地產,無論是做租務定一鋪賣左佢都爽。

上年5月底搞左啲認股權證,180M佔整個股權的20﹪,仲有一個月就到期,唔換左佢就變廢紙,可惜個認購價俾依家高水成15﹪。我就奇怪,點解上年升到3個幾都唔換左佢?如果依家溢價都換,真係十分睇好;如果唔換,公司希望用以集資和給予睇好的投資者多一個投資渠道的方案就落空,說不定也因此令股價再度被看淡。

長線來說,公司三項業務都是穩步上揚,業績來說是不擔心的。注資,自貿區都是很好的炒作理由,但在消息出爐之前還不知要等多久,在價值未變更吸引前不會再加注了。

﹣﹣﹣﹣﹣﹣﹣
記錄近日的交易:
8207見勢頭不對,在50天線被轟破前清埋餘下一半@1.54,俾第一注賣得仲差。
炒股就係咁,明知是炒就要睇位走人,今次錯左賣左一半時就大安旨意,沒想到其實股價不斷下跌雖不入肉但也會影響回報。呢個都係投資與投機的最大分別。