流年

自從睇左RF巴打分享自己2013年年回報嗰個post之後,個心真是煩左幾日。

煩,姐係多嘢諗,而呢啲嘢,多數都是“做咩諗嘢”  ﹣ 點樣可以賺咁多嘅呢!?

呢個問題,表面上是一條歷史題(已賺左嘅錢點賺),實際上是一條物理題(在未來的時空裏,點樣賺錢?)。

其實,我成日同自己講,然仔,入世未深,股又唔識多隻,唔蝕已經偷笑了。我時常提醒自己,七輸二和一勝,在股壇唔損手已經算係咁了,而且仲有35,296之痛,2877 之蝕,前車可鑑呢。2014年要達到20﹪回報,已經是一個不容易的目標了。要堅持,也要穩打穩扎的前進。

回顧2013年,雖然參與股壇只有短短七個月,但呢七個月裏面,以我所知,有幾類型的股票跑出。首先是,最令人欣慰的,是業績好的股票,升幅由幾十﹪到幾倍不等。其次是整個板塊跑出,例如濠賭,澳門概念,科網。其三是殻,多數是暴升。其四是至今也令我費解的(例如1145),又或者一些財技股。

在這四類當中,第一類靠做功課(或者抄:P),第二類是先機,但又最講不準,第三類是彩數,或者捉異動,第四類是唔識捉也唔識計數。只有一二三類可作14年參考。

參考過幾件2013年刻骨銘心的教訓,2013年尾,在最近五隻上市新股中揀左咖哩物流黎追落後。主要原因
1)物流是跨年主題,有市場動力
2)第一日由高位跌到落招股價,橫行左成個禮拜,在招股價上下浮遊,大難不死,必有後福
3)憧憬追國際物流股PE大落後,同埋入MSCI,心諗,呢個價downside頂多蝕10﹪,upside 破頂是無上限
4)既然有混亂交通,加埋咖哩物流做雙物流(咩原因?XD)

因此加持了細注的咖哩物流。一日抽升上11.5, 回到11時入左注,第二日再同價加多注。不過無做過仔細研究,總計都是細注好了。

持股數日,今日清晒,平均價13蚊(特登做呢個價出黎,好計啲:P),獲利18﹪。第一注沽貨是3/1忽然轉勢,13.1殺落12.8,怕獲利盤一齊走,所以沽左一注鎖定盈利先,雖然之後上番13蚊收市,好似沽早左,事後諗番3/1大市跌成500幾點,一朝早咖哩仲破新高,三度掂頂都唔破,落番13.1,上到13.3又唔破,之後直跌,自己反應減持都合理。今日(6/1)見大市再回調,升到13.26就放晒了。點知636繼續反地心吸力再破頂,收市又回到大阻力位13.48.

我信咖哩物流會繼續保持升勢,但依家只留下點醬錄嗰五份之一的paper trade 大哭 正所謂,賣仔勿摸頭,賺走左就夠。

2014開市第一擊總算順順利利,希望大家今年都開年順利,行運到年尾!




發表時間:2014年1月6日 | 評論 (8) | 全文

遠東復仇記

話說上年在35損手以後,一直想找機會向呢個一格廁紙大法先師邱生或其後裔覆啅,賺番嗰10﹪。

機會終於黎到!可惜今次見到隻鹿連條繮繩都未套上去就俾佢走甩左,仲要走甩左60﹪咁多,睇黎我同邱生嘅大仇仲未有得報。

話說邱氏兩房人,二房操控嘅36一向都唔是好掂,一條製衣一條航空工業控股嘅業務都無起色。今年終於賣埋航空工業嘅股份,將呢四千萬投資年回報都是百幾萬嘅籮底橙賣番出去,套現600萬。區區600萬點夠我咬番邱生一口呢?

機會來自8255。

36做左8255嘅基礎投資者。8255大炒,一於計下數。

36總股本454M,用1000萬買左成本價0.6嘅8255,大約是有16M股左右啦,即是說每30股36就有1股8255,3000股36(一手)就包含左100股8255。

36有112M現金,即是說每4股36就有1蚊,3000股(一手)就有750蚊。

根據每日開市價,36及8255的股價為:

24/12    0.33                1.12
27/12    0.305              1.19
30/12    0.33                1.65
31/12    0.32                1.85
2/1         0.335             2.46
3/1         0.35                3.35

連埋750蚊現金,唔計手續費,在以上各日一手36的成本和價值,及持有36的價值折讓率分別為

24/12    990   862     ﹣13﹪
27/12    915   869     ﹣ 5﹪
30/12    990   915     -    7.5%
31/12    960   935      - 2.6 %
2/1       1005  996      - 0.9%
3/1       1050  1085   + 3%

如果在8256由6毫炒上1.2,轉馬36,是有先見和膽識;就算無,計算36潛在價值,過年後的值搏率也變得吸引。

但我還是錯失這機會 / 。 \

原因是3/1諗住入市,點知大市插水,8255也有回調,我就勒左彊。下晝見8255升番,想追入36,又係慳嗰半仙蝕嗰一毫。炒家追入,過左4毫就無睇了。全日36爆升60﹪,收0.56。如果根據以上model, 8255升到幾多先至support到36呢個價呢?


發表時間:2014年1月4日 | 評論 (9) | 全文

2013年結(2) ﹣深刻的教訓

唔喺嗰啲咩買遲咗沽早咗嘅老散常談,慳粒糖輸間廠,年輕人總是不會控制時間。

深刻的教訓是那些一次性而影響深刻的錯誤,寫出黎是要提醒自己於14年勤加改善的。(無錯,然仔博客是一個紀錄給自己睇,務求加深記憶提升功力的反思集)

1. 沒抽新股
13年底多隻新股炒旺,但自己因為懶+“唔識”+“孖展高風險”而迴避。事實上13年底如果俾啲時間學,俾啲信心一齊喊Go Go Go! 以我手頭上能抽出的小量資金做孖展,年回報最少可以提升5﹪。

解決方案:會開新post求教抽新股攻略。

2. 沒留意新股

無抽新股都算了,無暗盤,Fine,但就連新股上市後也不跟進就實在太懶了。雖說新股欠缺往績未必是長線投資的好對象,但我發現不少質優新股上市後,估值回落到一定水平都會出現反彈(事後孔明的說話,但沒留意是大過),例子如1271, 1373,留意14年會否有撈底機會?

解決方案:都係嗰句,咪咁懶啦。 

3. 沒留意配售股份

最近才知道原來有些新股是以配售/分銷(個名大概係咁上下啦)方式上市,圍飛情況容易炒上,例子如8107(首日),8255,14年會否有同類式機會,做小注投機?

解決方案:要好好利用個aastock手機版,要睇多啲嘢先得。

4. 留意過的股票沒有立即加進觀察名單,錯失低位補飛機會

例子如557。11月尾出公告後(唔係點解嗰日咁勤力係度刨即日公告),已計算出現金連殼價是1.8,股價已到位,就無左回事。誰知一週後股價輾轉回落到1.2! 結果自然是走寶了。

解決方案:跟進完一個冧把不論平貴都先加入觀察名單。每日都會睇一次,當接近低位時要留意成交同盤路。

大致上係咁,諗到會再補充。
發表時間:2014年1月4日 | 評論 (0) | 全文

2013年結

2013是充滿感恩的一年。人說,悲悲喜喜,喜喜悲悲,喜與悲不過是相對比而沒絕對的事情,最重要的是否極泰來,絕處逄生,那為甜而經歷的一切苦,都變值得,都變成甘。我的2013大概就是這麼的一回事。

要不是因成家立室而產生的金錢需要,我想我就永遠埋葬在本科畢業以來的安逸裏。在這半年來面對學業事業成家立室的壓力,太多太多事同一時間壓落黎,真的好幾次忍不住落淚。喊過後又如何?還是繼續朝著要走的方向走,相信最艱辛的日子總會過去的。

回顧這一年,首先要感恩一位摯友救急扶危,在然仔俾人迫去買澳紙收息幾乎墮入銀行陷阱的時候,教我轉投價值投資,更提供兩隻可資重倉的收息+增長股,又借啲價值投資書俾我進修,免我誤入崎途。其二就是一班RF的巴打絲打照顧,沒有將我呢個股壇白痴排擠,仲解答左小弟好多白痴問題,多謝你地 - 文仔,湯財,qt,Wilson, 鐵爐堡,肥B,00,Wilbur老闆,周周姐,roadman, mannishmark,遊浪潮,VC,VA,筆兄, ... etc 可憐

自2013年5月中開始接觸股票,第一次買股在五月尾六月頭,所以第一個投資年(2013)大約有七個月的交易時間,以2013年6月1日起始,本金是低六位數字,每月入錢。根據Modified Dietz Model 計算 (https://americanfunds.com/pdf/mfgefl-431_prrhowto.pdf),2013年7個月的投資回報為14﹪,比我九月時的預期超出一倍。對我這位新手而言,此成績可足鼓勵矣。

揭開2013成績表﹣

主要勝仗﹣

1)跟Jazzf機,短炒119(+7.49%)
第一注沽得太早,最後一注太遲,股價三度破5, 但都錯失機會沽貨,太大貪。Jazzf兄第一次破5已一次沽清。這次操作實在有欠成熟,是年輕人的錯,不然可獲利再多10﹪。

2)估值投資869,有偉哥一同操盤,信心倍增 (+55﹪)
此股股東信譽麻麻,加上中績前已炒到興烚烚,有點戒心,幸得偉哥一同操盤,自己至夠膽在一注外再加多一注。此役學識偉哥沽貨果真不賺盡最後一個零頭,在發盈喜後3蚊邊出清,自己多賺10﹪沽清,炒家最癲,推到4蚊邊,大股東都減持,短期內玩完。

3)跟偉哥機,中績後追入319,收埋息,出遠門前沽清 (+29﹪)
無法等上3蚊,而且在低位沽出是有點可惜的,不過為左出門時輕鬆,賺走就算了。

4)深信貿易通是好東西,以不便宜的價錢買入,又以不便宜的價錢沽出,賺走 (+12﹪)
1.54坐到過2蚊唔放,1.8平層唔放,DJE減持,最終放手。在前篇已有較長篇幅記敍。我也因此而問過湯財,到底收息股被炒高後是否要棄車?值得一記的是,這是自選股而獲利,雖然利不甚豐,但也是小小鼓勵吧。

暫時領先﹣

5)跟偉哥機,中績後買入匯星印刷,收了一次息(+20﹪)
會升印刷,好名好名。

6)跟偉哥機,中績後買入英皇證券(+11﹪)
英皇系小師妹,小名Mag, 希望在2014繼續快高長大。

7)跟偉哥機,長線投資南粵物流(現粵運交通)(+16﹪)
期望變身港鐵發展模式搞地產。

8)跟湯財機,沿用祖師爺價值投資法,買入比現金價還低的卓仔(+49﹪)
我只是太好彩,買左唔到一個月就升。

暫時平手﹣
9)超市,百貨雙頭馬車,華DEE (+2﹪)
10)跟偉哥機但後悔,因為唔想買煙,貴聯 (﹣3﹪)
11)腎虧,好在細細注(﹣5﹪)
12)咖哩物流(0﹪)
13)路訊通(+4﹪)
14)風濕膏(+9﹪)

平手收場﹣
15)英皇娛樂 (+2﹪)
(前述)

16)中信國電(+4﹪)
可謂最胡黎胡塗買賣嘅一隻股

17)理袋(+1﹪)
明白中績前抽升...

損手收場
17) 遠東發展 (﹣9﹪)
(前述)

18)聯亞(﹣10﹪)
19)魏橋(﹣10﹪)
20) ... 616 XD (﹣10﹪)
係,我真係試過炒呢隻老實股,盈喜後衝入去,連年報都唔識睇啊嗰時陰公豬...好在即日cut左,未至於要供股XD

至於重倉股方面﹣
21)新鴻基公司 (﹣2﹪)
聯合系真是好難炒,等吧,收息吧...

22)金利來(﹣1﹪)
中績業務一般,開始多左地產業務,等吧,收息吧...

23)路勁(+8﹪)
期望的入帳落空了,繼續一路收息,一路等它坐大...

前瞻
回顧呢20隻股票,出現得最多的字應該是“跟機”吧?確實,以然仔的年資尚未到發掘靚股的級數,但資金又急需成長。作為一個合資格的跟機者,我要求自己查找清楚先入飛,做足功課,而且為自己的投資付上全盤責任。一味課金不練等級最終只能成為小正太啊啊啊...

2014依然是充滿挑戰的一年(點解啲口吻咁似年報嘅?),仲有三個月就會面臨斷糧(No kidding!),刻下不斷搵工,應徵,考試,返工,讀書,睇paper,睇年報...每日都是overloaded. 貼近地面的生活,我體會到撻沙的感受,但我不會放棄的...

2014,放馬過來吧!!






發表時間:2014年1月2日 | 評論 (0) | 全文

[舊聞] 揮淚斬左貿易通

今日是2014年第一個交易日,首先祝各位看倌新年進步,買左嘅股票節節高昇,無買嗰啲就石沉大海大笑
最緊要都是身體健康,生活美滿,畢竟股票都只是人生一部份啊。

今日要補番兩篇文,第一篇(如題),是要寫下自己買左,等待,升左又唔賣,跌左先黎賣,賺少少離場,想翻啅又升晒嘅貿易通。斬嗰下真是一殼眼淚,想同佢1314架(姐係過埋14年啦最少)。

利申:我覺得536真是幾好的,只是(我覺得)不便宜而矣。

真是花過不少時間研究呢隻嘢,但最終都不能持久。在我的立場而言,536十分雞肋。能看出它會增長,但它的致命傷,就是不便宜,基本上沒有錯價的機會。這個原因,可能是它真的是很好,或者有基金,或者少交投,等等,但是,這是不能長線投資的致命傷,刻下只能等待,或者短炒。

以下呢篇文章寫過響536專帖,不F巴打也繼續討論。總括巴打們的論點,可分為 1)認為基金減持不是利淡因素 2)認為基金減持是利淡因素。無論是1或者2,都需要時間引證。


原文打左喺536的專帖,如下:


本來想在realblog寫番篇紀錄低自己沽出536的原因,但最近手頭太多工作,所以遲遲未有動筆。
上星期寫番一篇沽出296和35之後股價暴升的紀錄,我覺得是536篇的前篇(http://realblog.zkiz.com/hoyin86/84616),因為我沽貨的往績真的...哈哈。
蝕走/平手的不計,就算賺走的往後也有一定升幅...但最近實太太忙,容我在這兒打少少,算是對笨小孩兄和鐵兄遲來的回覆吧。

首先投資決定是很個人的。平均價1.71沽出536,當然比2蚊高峰時低15%,但相比於DJE沽貨價只是低5%。我的成本價不低,大約是1.5左右,
可能有師兄師姐們的成本價更低,覺得可以坐耐啲,但眼見股價每況愈下,我不得不考慮偉哥講過嘅一番說話,大意是,
股價下跌時首先要想,是自己分析出錯(基本因素改變),還是市場出錯,如果基本因素沒變,應考慮是增持。

經小弟盡力的審查,536基本的業務基本上是沒變,甚至有增長的預期。

早十幾個post有一篇吳主席的訪問,我覺得他提及的數字是打了開口牌,而訪問中提及公司應該公開“未來盈利的預期”,因為普羅大眾沒法如基金得到更深層的資料。
http://hk.apple.nextmedia.com/financeestate/art/20131118/18512695

貿易通(536)CEO吳偉驄嘅背景好巴閉,做過證監會副主席,之後又北上做過中國證監會同上海交易所高層,2002年之後先開始投身上市公司展開新事業,位置調轉,佢而家反而投訴證監機構對上市公司嘅監管過嚴。
封鎖消息不利小股東

佢有好多投訴,例如唔明點解唔畀上市公司講盈利預測,「作為管理層,梗係有好多發展計劃,唔畀佢講就好似黑箱作業,投資者點樣value間公司?」
「例如原本一間公司賺緊8,000萬,新生意可以令公司賺到1億,現股價2蚊,即係話仲有20%升幅都冇問。」佢認為,封鎖呢類消息,只係益咗機構投資者,因為機構投資者有能力喺市場搜集訊息,更易掌握公司動向,現行監管制度其實對小股東不公。
「同傳媒講,唔得;喺股東會同股東講,又唔得。喂,股東係老闆嚟喎,太過份!」
如果有上市公司故意弄虛作假誤導投資者,佢認為,懲罰犯事者就可以解決問題,而唔係懲罰所有投資者,免去佢哋嘅知情權。調轉身份,諗法真係完全唔同。

如果屬實,根據536年報的預期,三年後真的能達到1.5億,就是現在的double了。

然而,自打嘴巴的是,DJE減持了。老闆首先發現,湯財及後也提出DJE是一同減持信星,理袋和貿易通,似乎不單單是貿易通被沽,也許不是貿易通的問題。
但我對此有所保留。如果基金增持被視為利好消息,減持固必然是利淡,誰會和錢作對,而且投資目標是一間預期三年來個番的公司?
基金減持無損貿易通的基本盈運,但我不確定它能否維持高估值。事實上,自09年起計,536幾乎沒有做成過錯價,一直在維持一個中至高的估值。
沒有錯價就很難達成長線投資的誘因。

在審視以往的沽貨紀錄,和對536尚有不明不白的地方,我無法100﹪SURE自己做得啱,不過既然是賺走套現,也不肯定股價在甚麼位置會得到支持(如果按圖表就是1.5﹣1.6吧),
套現後也能保持購買力,就算食回頭草,都可以低價平番倉(因為它的基本營運能力好)。

當然,以我一貫的燈神往績,股價由1.6終止跌勢,開始上揚。

發表時間:2014年1月2日 | 評論 (5) | 全文