價值投資的真祖不是吸血鬼,單純是補魔愛好者而已,當地上有空瓶撿時,搖下佢博有幾滴汁水剩,反正唔駛錢,祖師爺爺自然會感嘆人們何不補MP
惠記(610)同川河(281)有好多共通點,平,乾,鬼祟,輸出高,贈品多,而且兩間都係老母
平成點?
惠記市值17億,少少淨現金,但佢手上有4成路勁(1098)股權,按股市市值為21億,按資產淨值為50億,另有半間利基(240),值兩億,一間營業額三四億的水泥廠,而某相同營業額的OT水泥股市億6億幾,當一半,一個營業額8000萬的石礦場,當1億算,另外仲有1億幾的REIT收緊美金,計計埋埋惠記值30-60億左右,喲,市值17億,折讓大冇問題,反正現時派息7厘左右,佢主要都是股息同租金收入,派返呢D出黎啫,具有一定穩定性,比祖師爺的要求更平質量更高
川河市值約8億,現金都成8億,冇欠債,手上有湯臣(258)12%的股權,按股市市值為3.5億,按資產淨值為13億,上海有個停車場,年租600萬,按5厘計值1.2億,從37%地產子公司分到2.8億盈利,有D商場同寫字樓收租,咁子公司值幾億至十幾億,計計埋埋川河值20-40億左右,喲,市值8億,折讓大冇問題,反正現時派息6厘左右,佢唔少租金收入,派返呢D出黎啫,具有一定穩定性,比祖師爺的要求更平質量更高

另外惠記真係比祖師爺爺買到的話,會有好得意的財技玩法:
祖師爺爺大量買入惠記,持股量具一定程度,買入價假設為2.5,祖師爺爺要求開特別股東大會--A.向惠記股東實物派發路勁股票,每2000股惠記派800股路勁,價假設路勁股價為7,一手惠記5000蚊成本,分到5600蚊的路勁,除淨後一手惠記唔會變負600蚊掛,B,逼宮惠記出售路勁同派特別息,假設有人出價12買路勁,一手惠記5000蚊成本,派9600蚊的特別息,除淨後一手惠記唔會變負4600蚊掛,C,在股東大會上高調建議郁路勁,第日惠記勁升,就放鬼曬佢
(修正:冇注意惠記同路勁股數唔同呢點,應該用百分比計才對,當買入10%惠記成本只需1.7億,咁派實物可派到2.1億路勁,而拆骨則可換錢高達3.5億)

惠記有路勁4成股份,而路勁一年派息3億幾,惠記齋呢度已佔成1.4億,股息D野留住冇用,本業又唔係冇錢賺,而惠記派息不足1億,因此--A.財政極速改善,B.加派息,C,揮霍
唔恨佢D租金啦,剩係叫佢轉派返曬路勁D股息,每股已派成2亳了,10厘在望,而且路勁仲唔一定冇增長添

川河冇分開收租同賣樓的數字,所以穩定收入佔幾多就唔多知了,但佢呢幾年投資項目同現金每年增加兩三億,而且仲有D賣樓收益等入帳,減派息的動機不足,可能會增派,唔增派都會有其他消費項目
但湯臣財政不算極好,手頭上有大量地產項目,因此川河很可能向湯臣買野,變相注資,從而淘空手上的現金,呢點算係隱憂
另外,佢係氹仔卓家村度有大塊地皮,即係澳大隔離果度,值錢非常,齋塊地已經貴過成間公司,問題係塊地將來要發展的話,就需要非常大量的資金,川河比得起,但多數會因此減派息,川河價值極高,但以收息為目標就差D