唔知乜叉以為係思捷的公司,原來係印卡片的,早兩年上市,保薦人叫信達證券的物體,未聽過,照計就即刻打為老千股先,不過見到律師係李偉斌會唔會冤枉左佢?現家同N年前做保薦人研究的時候已經相當的世界變,好多老千同潛在客戶黎唔到澳門已經廢左9成功力,馬會果邊又避緊風頭福臨門都少去左,殘存的老千保薦人數量同搵食密度己經少左,所以最近爆出黎的保薦人就唔一定可以即時落定論,當然,照舊咁話"你就係兇手"絕對係安全的做法

貌似可以平反的著眼點唔係李偉斌,呢D最多只係篤屎入面的一粒豆,不用拿來品嚐細咀嚼,真正有用的要係睇佢有冇花標左出黎,味皇指的是派息多唔多

佢未上市時的盈利聲稱為11年2300萬,12年4000萬,13年4200萬,而11年有4400萬淨債,12年少1400萬,13年少左3200萬,假設11年高估盈利總額4400萬,12年高估盈利總額為3000萬,13年就再冇高估仲低估左200萬,由於欠債冇上升,因此在盈上總額上冇做假,只係將三年的盈利調左去之前的年份,上市後發盈警咁賺少一半,但係資產負債表度分佢唔到,咁味皇買呢隻新股就有機會中伏

集資1億,扣除後欠債量同之前一樣,冇加冇減,咁呢年的盈利冇高估冇低估,係佢講的2100萬,之後果年欠債量亦同之前一樣,盈利係佢講的3200萬冇錯

固定資產1億左右,現金流5-6000萬,折舊千幾萬,盈利數字100%派息,而淨現金冇多到,即係折舊係實際扣錢的維修費

5年間現金流2.7億,己繳稅2700萬,稅率10%偏低,用盈利數字計5年間盈利1.6億,稅率17%就合理,現金流最終得6成可用,因此佢的派息唔會超過現金流6成

11年6100萬債務利息260萬利率4.3%,12年3.9%,今年4%,佢冇增加固定資產,有錢剩係用黎還債,即係話佢現家冇賺超過4%的有效駛錢途徑,100%派息只係佢冇其他用途而且唔差錢

但係佢營業額增長左,係唔投入財力的情況下取得增長,即係奴役員工發揮作用,咁佢的前景就預測唔到了,因為勞力冇得量化,類似保險AA開到幾多張單好大程度關乎運氣

PB近3,以1億固定資產賺到3000萬的公司來說也不算特別貴,但前提係佢的經營模式可持續先得,PE16,對於想通過投資賺多過4%都難的公司的估值似乎又高左,不過6厘息又有成長好似好吸引,黎到呢度為止唔係老千股先,總體而言呢隻股好難正確評價,因為唔係種豆得豆的類型,點講呢,呢隻業務貌似工業股,但財務特徵完全是服務業股,唔係屁股就係神股

BUT,最近折讓配股比人,而呢間公司又冇資金需要,人頭機會大增,因此業務唔老千但性格已經係OT,人要變心可以好似F1咁快的,雖然派息高,但難保以後會唔會配完又配,何況冇用途下集資,之後應該會用一D途徑整走筆錢,如果接貨的人係有人借錢比佢買的話,好快就會有還錢的動作,買入的股票相信是以賣出為前提的

只是味皇多心也不出奇,如果要買觀察多幾年會較好,寧願錯過神股都好過踩中OT股