今日用2.58買入8000股奧普,私有化價錢係2.71,仲有4仙未除淨,因此最終水位係2.75,有打算賣晨鳴同日本城換奧普的,但冇足夠的成交量所以放棄

另外比較早之前,3.38賣出11000股春泉,3.1換入10000股匯賢,冇乜特別內容所以留返一次過講返

講返奧普個出價,由於奧普從來未去過呢個價,所以在奧普上市後任何時間買入的小股東都唔會因此蝕錢,理論上出價唔可以話低

但味皇等老屎忽深知奧普的價值,就算佢出到3.2,吾輩都會認為唔夠,但係味皇呢類人,係市場上只係好少數,現在同之後持有奧普的小股東:

1.私有化宣佈左之後買的投機者,拉倒就即蝕,所以一定會支持通過

2.見奧普升跟風買入的大媽,佢地唔會去投票,而且接佢地火棒的一定係大媽同投機者是但一方,所以一定唔會妨礙通過

3.私有化前高位2.4買入的股東,現家解套,唔會反對通過,或者已經賣左,由於接佢地火棒的一定係大媽同投機者是但一方,所以一定唔會妨礙通過

4.私有化前一兩年低位個幾兩蚊買入的股東,2.71比當時價高幾多下,唔會反對通過,或者已經賣左,由於接佢地火棒的一定係大媽同投機者是但一方,所以一定唔會妨礙通過

5.多年前買入的股東,嘗盡高息的甜頭,反對私有化

由於香港地買股票的人,大多都唔會揸股票超過一個星期,何況揸幾年,所以反對私有化的成功率非常低

咁如果有辦法可以拉布,咁博唔博呢?

呢度用越秀作對比例子,越秀的主席,只是打工的,收購IFC成功與否,並不會影響上頭下達的派息政策,雖然影響到撈到的油水,但否決左對其仕途影響不大,另一方面,否決越秀收購IFC,好大幾會令股價上升(唔收購IFC現家值7蚊),所以小股東有反對的動機

而奧普唔同,奧普係老闆自己的公司,而奧普老闆在香港上市公司當中,算係比較高道德水平的,相信佢平時係用輕快的心情黎決定派息的,而今次私有化涉及佢切身的利益,假設你係小股東,你否決左私有化,否決左老闆的切身的利益,你就係阻人發達,佢會唔開心發脾4,一個發緊脾氣的人,會唔會對仇人大方呢?可唔可以對仇人保持高度的道德水平呢?由於方杰收取微薄的人工同派好多的股息,只是向來係咁,而唔係乜野文字規定,如果佢一個心情唔好走向腐化,對繼續持有的味皇唔係好事,對將來A股班人都唔係好事,對君子可以講道理,但唔能夠保證任何人一直都是君子,如果把無故減派息視為開始作不君子行為,咁同佢地抗爭的下場唔一定好,同老千股對抗就話自己冇乜野可以失去,但同收息股對抗,等於比人揸住春袋,而且否決私有化股價會打回原形,係上面的黑5類..黑4類最唔想見到的事

強扭的瓜唔甜,味皇自己就好來好去算了,如果佢自已肯放棄當然最好

在2.71這個價錢,味皇會視奧普為6厘股,派咁高息又省心的股票,唔係話搵就有,作為味皇收息主力之一,換成其他股必定做成股息收入下降,唔係話賺果幾萬就好著數,對味皇黎講係令收入下降,係私有化呢個時點味皇只有認裁,後奧普時代,味皇要速搵可靠的代替品,姑且搵到兩隻候選,可惜息都比奧普少