早日閒游火兄個博客,見到一個名叫陳仔的人用現金流分析嘉華建材而得出同火兄相左的結論,姑且不論那個更有道理,對於兩人分析的著眼點味皇都自言自語吹兩嘴先

陳仔用現金流分析,因為嘉華年年的現金流不穩定,而且07年出現30億的資金流出,加上現家借大錢唔易,今年市道又唔係特別好,如果不是出售銀河的股權得到的37億,公司可能一早就破產,因此得出"嘉華經營惡劣"的結論

在這一點上,味皇係完全同意的

火燎森將嘉華作為隱藏資產類型股票分析的,因為嘉華拥有優質地皮,僅地皮價值已超越公司市值,所以得出"嘉華超值"的結論

在這一點上,味皇雖然不喜歡地產佬,但係都同意嘉華確實如此

為什麼個個都質疑陳仔的結論?可能係名氣的關係,況且火兄的論點的確係正論

兩個相反的結果一齊出現時,一般人都會認為一定有一個岩一個錯,這是想當然的結果,但味皇卻認為兩個相反的結論,一個是正確的另一個卻未必不正確,同樣兩個相反的結論一齊錯都時時有

對於兩人的結論,味皇想莽自補充一下,嘉華營運確實非常糟糕,銀河係澳門乙水仔的地盤因為冇錢起停工兩年,這都是味皇親眼所見的,但由於佢係銀河集團的其中一部分,銀河賭場由年半開始已經有正現金流入,銀行的信用額度亦提高,嘉華冇錢時可以係銀河賭場調過去,大陸難借錢,但係佢有本事係澳門香港借到,現金問題應該冇問題,甚至可以維持現在微薄的派息,而嘉華同時拥有大量地皮,而公司因為營運確實糟糕而股價低落,變成"一間劣質但同時非常有收購價值的公司"而現在確實吸引都一個叫呂志和的傢伙通過自己公司收購嘉華,不過咁岩線呂志和係嘉華主席,即係變成嘉華收購嘉華

舉一個例子,當年置地收購牛奶公司,唔係因為牛奶公司經營得好好,而係想搶走佢農場的地皮;和記收購黃埔船塢都係貪佢個船廠塊地,同樣現像九倉,南華等等都有類似情況

舉多個特殊的例子,有條友著到爛身爛世,人又痴呆,又冇穩定收入來源,但係佢收收埋好多金條,咁此君可能係一個唔錯的離婚對象

而這種情況,九流的營業加上一流的資產,就係超一流的收購目標,最終壞公司的價值會由"好公司"吞噬"壞公司"後顯現,今次咁岩"好公司"同"壞公司"都係嘉華