跌巿的學問
每臨大事有靜氣
慌亂的時候，只要想一想這句話，便可以冷靜地處理手頭上緊張混亂的事。恐慌性的跌巿中，冷靜的確很重要。
言歸正轉，跌巿該怎麼辦？
偉哥、Jazzf 等前輩師兄懷有期指期權上乘功夫，當然是long put、short call 賺過不亦樂乎。但文仔未涉獵這方面的學問，純股票操作又可以做些甚麼呢？
熊證？put 輪？讓莊家看著食，80%輸錢的事我可不願幹……再者，我也不懂。(或者懂的的確可以大賺吧？)
沽空。這是我喜歡做的事 =D
股巿不一定升才可賺錢，跌亦一樣可以。舉個例，在5.5沽空1000股工商銀行(1398)，再在5元買回(平倉)，變相就是賺了0.5x1000=500元。
當然，要做沽空不容易。畢竟這於香港散戶界似乎不太普遍。不過，這個方法卻可以用在我們身上，因為我們都有自己的組合和股票，自然可以沽出完成上述的操作。
這方法有甚麼好處？很簡單，巿向南走，跌9升1，要在正確位置買入博中反彈，難。先賣掉手上的股票，下跌後平價買回，變相便容易多了。去年跌巿，文仔便是用這個方法沽空工行，獲利一點點 =P
今年文仔看看自己的組合，好像沒有太多貼巿的股票(連工行都賣左...)，這個方法也許未必合用。不過基於覆巢之下無完卵的道理，即使不貼巿也總會跌跌，怎都可以起到作用吧？
效益不大，又有沒有別的方法？
有。這是從味大叔身上學懂的。
由於組合裏有多隻股票，跌巿時總會有些早跌，有些遲跌，有些多跌，有些少跌。通過對組合裏的股票作估值，把跌得少的換進跌得多的，跌得遲的換進較早跌的，便可以提升組合價值。
舉個例，早幾天大巿喪跌600點，那日金利來(533)跌幅很微少，但富豪產託(1881)卻急跌不少。把跌幅少的金利來換為跌幅多的富豪，今天反彈時便會增值不少。當然，要處理得好，先決條件是對每隻股票的股值都了然於胸，那才可正確判斷哪一隻錯價較多，安心換馬。
跌巿來了，大家看看這次會否適用吧 =D 每次跌巿都是一個實驗，都是增進經驗的好訓練。資產轉移的遊戲又再上演，大家準備好未？
價值投資
近日，個巿升下升下，搞到文仔成日想做空軍。文仔個倉有5隻怪獸，左望右望搵邊隻開刀。
尋找開刀的故事展開後，諗返起小豬兄的話，文仔就有以下決定。
1. 中遠國際(517)，好鬼霉，跌極都有得跌。當初諗住4.25 都已經現金價值，應該都無得點跌，點知撞著巿壞，繼續跌。
時至今日，中遠國際出左中期，盤數寫住：5,450,925,000 銀行存款+現金，股數約1,513,530,000，計返開每股值 3.6。現價3蚊。
如果文仔現時沽出517，我除左認為自己係一個白痴之外，我唔會有另一個諗法。
小豬兄提醒左我，價值投資就係知道隻野嘅價值，如果係值呢個價，就係值呢個價，唔應該因為股價升跌而左右到核心價值。
所以，我覺得唔應該沽，況且得雞碎咁多(撞鬼，派中期息40蚊比人收左30蚊手續費得返10雞...)
不過，隻野盈利能力係差呢樣野的確係我要反思的問題，呢樣野之前都講過，交左學費。
另外，當我買入隻野時佢係有4.14現金，何解現在得返3.6？派左息？做左投資？呢個要研究一下。如果當初買入價值係會隨住時間一直下跌，咁嘅話，即係現金買現金好可能都會中招。
2. 信星鞋業(1170)，近來湯兄話工業股會無運行，事關毛利率會跌。文仔同意，原因唔係無工開，係人工同成本升得快，好自然就賺少左。
既然係咁，沽之換馬？
現價1.2，年報寫住現金：530,190,000，股數677,310,945，每股現金價值0.78。
對一隻野的估值，1.資產，2盈利能力。資產當然有廠、貨等等，但現在一概無視，眼中只有錢，值0.78。即係話，盈利能力值0.42。
用6倍pe回算，每股盈利就係0.07，2011年全年盈利0.185，即係倒退62%，亦即係去返2008年的盈利。
工業股無運行，無運行都未至於倒退62%掛？
3. 金利來(533)，老細呀，7厘幾8厘息，家下個股價同當初買入個價差唔多一樣，沽佢做乜鬼？用黎收息咪算囉......
4. 黃金ETF(3081)，cup近日不斷沽，但係文仔就成日諗住買，因為傳統經驗係十月低位入巿，年尾會升。諗住買嘅野，又點會沽？
5. 工行(1398)，呢隻堅係想沽佢，因為佢比較重貨，又多問題又跌得急。
經過一輪分析，其實文仔想講的重點係頭兩隻。小豬兄講得啱，如果佢係值呢個價，點．解．要．沽？的確無沽貨的必要。再者，文仔都有現金係手，無為殺錯良股丫。
價值投資者，咪收下息囉 =D
至於工行，睇下到時點啦 =D