睇返d相原來我都幾癡線, 由九月到而家都做到無停手, 仲要一次過連住做三個袋, 無停手唔係多生意, 而係無生意, 想增加存貨, 不過可幸係有人見到我d野想搵我教班, 前日就有個女仔搵我教佢整個散紙包, 教左兩粒鐘感覺良好, 聽講十一月中有另一壇人數四人到時就可以收多少少錢, 叫做幫補下買工具啦。

另外之前整完個劍橋包我女友個同事話想搵我訂造但要一星期後先覆我, 我見得太多, 都係無米粥多, 有就當bonus啦, 都係賺微利同埋小小皮碎咁。

講下皮碎, 呢排唔知發咩神經好想掉返所有屬於我既野(除左錢), 唔知你會唔會有我呢個諗法呢, 我覺得記憶係唔可靠, 即係佢唔可以將100%既事實記低晒, 因為記憶有佢既延展性, 即係如果佢只記得80%期餘個20%會幫你fill in the blank而你係不自知, 所以我好嚮往呢種不確定性, 我好矛盾, 想人地記得我但同時又唔想人地記得我咁清楚......

就係咁, 所以想盡快清理所有皮碎, 於是今日用左三粒鐘到整左呢個鎖匙包, 圖2個兩粒銀色撞釘其實有個血的教訓, 話說之前我唔識係淘寶亂咁買原來粒釘隻腳既長度都好講究, 加上無工具dup, 所以dup到好肉酸, 後尾比我係深水步搵到一間d料好好既鋪頭又有工具賣先解決到, 但而家仲有幾百粒撞釘......我開始覺得佢地好篤眼篤鼻, 我諗來緊要整多d鎖匙包同活頁文件套先可以解決晒佢地!